Ис дьыала үлэтэ: Саха сирэ Уһук Илиҥҥэ 1-кы миэстэҕэ

СӨ-гэр ис дьыалаларга миниистир Владимир Прокопенко коллегаларын эҕэрдэлииригэр бу кэмҥэ биэдэмистибэ, «бастатан туран, өрөспүүбүлүкэ нэһилиэнньэтин санаатын учуоттаан» бэйэтин үлэтигэр сыллата сыанабылы оҥорорун бэлиэтээтэ. «Өрөспүүбүлүкэ полициятын тус састааба сүнньүнэн туруоруллубут соруктары ситиһиилээхтик быһаарара кыаллар. 10 ый түмүгүнэн ИДьМ үлэтин сыана­лааһыҥҥа Саха сирэ Уһук Илиҥҥэ бастакы миэстэҕэ сылдьар. Билигин өрөспүүбүлүкэҕэ ыарахан уонна ураты ыарахан буруйдары оҥоруу балайда аҕыйаата», — диэтэ ми­ниис­тир.
Министиэристибэ үлэтигэр өссө биир суолталаах түгэнинэн Владимир Прокопенко дьиссипилиинэ уонна сокуону тутуһуу туругун ааттаата: «Биһиги сотрудниктар буруйу оҥорууларыгар принципиальнай сыһыаннаахпыт. Полицейскайдарга туһаайан, гражданнартан сокуону толорууну ирдииргитигэр, эһиги бэйэҕит эҥкилэ суох холобурунан буолуох тустааххыт, диэн бэлиэтиибин. Хас биирдиибит быһыытыттан-майгытыттан уопсастыба дойдуга бүттүүнүгэр сокуон­нас туругун туһунан өйдөбүллээх. Өрөс­пүүбүлүкэ олохтоохторо хас биирдии көмөҕө наадыйыыларыгар биһигиттэн суһал уонна болҕомтолоох харданы күүтэллэр. Чуолаан итинтэн кинилэр биһиги үлэбитин сыаналыыллар. Биһиги күүтүллүбүккэ сөп түбэһиэх тустаахпыт».
Ис дьыала миниистирэ биэдэмистибэ былаас уорганнарын кытта бииргэ үлэлээһинин туһунан кэпсээтэ: «Бүгүҥҥү күҥҥэ Ил Дархан, Бырабыыталыстыба уонна Судаарыстыбаннай Мунньах (Ил Түмэн) болҕомтолорунан уонна өйөбүллэринэн буруйу оҥорууну уонна сокуону кэһиини сэрэтиигэ туһаайыллыбыт судаарыстыбаннай программалар ылыллан олоххо киирэллэр. Полиция салаалара автотранспорынан, аныгы саанан-сэбинэн уонна анал техниканан хааччыллаллар. Үрдүк технологиялар киллэриллэллэр. Сотрудниктарга олорор дьиэни тутуу боппуруоһа быһаарылынна. Оройуоннарга полиция отделларын 3 саҥа административнай дьиэлэрэ үлэҕэ киирдилэр, өссө 4 дьиэ тутуллуоҕа».

Ил Түмэн аатыттан ис дьыала уорганнарын сотрудниктарын уонна бу бырааһынньыкка сыһыаннаах бары дьону Саха сирин парламенын Бэрэссэдээтэлэ Александр Жирков эҕэрдэлээтэ: «Бүгүн Саха сиригэр ис дьыала уорганнарын профессиональнай бырааһынньыктара бэлиэтэнэр, бу структура өрөспүүбүлүкэбит, дойдубут историятын кытта быстыспат, бэйэтэ дириҥ силистээх-мутуктаах, үгэстэрдээх уонна дойдуга, биһиги өрөспүүбүлүкэбитигэр буола турарга барытыгар кыттыгастаах».
Кини бэлиэтээбитинэн, өрөспүүбүлүкэ парламена бэйэтин боломуочуйаларын чэрчитинэн быраабы харыстыыр уорганнар үлэлэрин хонтуруолга тутар уонна өрөспүүбүлүкэҕэ бэрээдэги бөҕөргөтөр, нэһилиэнньэ правовой культуратын үрдэтэр уонна ис дьыала уорганнара уопсастыбаннаһы кытта алтыһалларын туһугар сибээһин бөҕөргөтөр. «Биһиэхэ бэрээдэги харыстыыр уорганнар үлэлэрин тупсарыыга туһааннаах программалар ылыллыбыттара, тирэх сокуоннар үлэлииллэр, сокуон суолталаах правовой нормативнай аакталар ылыллан толоруллаллар. Итини таһынан парламент бүгүҥҥү күҥҥэ ис дьыала уорганнарын кытта хардарыта үлэлээһин атын көрүҥүн бөҕөргөтөр – бу СӨ-гэр ис дьыала миниистирэ Судаарыстыбаннай Мунньах (Ил Түмэн) иннигэр сыллата отчуоттааһына. 2013-2014 сс. миниистир отчуотун түмүктэринэн этиилэрдээх тэнитиллибит уураахтар ылыллыбыттара, олор Саха сирин парламенын хонтуруолугар бааллар», — диэтэ Ил Түмэн спикерэ.
Александр Жирков ис дьыала уорганнарын сотрудниктарыгар, ветераннарыгар үтүөнү, этэҥҥэ буолууну, дьиэ кэргэттэригэр өйдөһүүнү, Саха сирин нэһилиэнньэтигэр куттал суох буолуутун, дьон доруобай уонна дьоллоох буолалларын туһугар ситиһиилээх үлэни баҕарда уонна Ил Түмэн наҕа­раадаларын туттарда.

СӨ судаарысты­бан­наһын бөҕөргөтүүгэ кылаатын иһин, Ил Түмэн Бэрэссэдээтэлин Махтал суругун СӨ Коституционнай суутун судьуйатыгар, РФ ис дьыала уорганнарын үтүөлээх сотруднига Кононов Гаврил Гавриловичка; полиция подполковнига, СӨ-гэр ИДьМ Ньурба оройуонугар отделын начальнигар Павлов Григорий Ивановичка, юстиция капитана, Дьокуускай МУ СУ старшай силиэдэбэтэлэ Турантаев Виктор Николаевичка туттардылар. СӨ судаарыстыбаннаһын бөҕөргөтүүгэ улахан кылаатын иһин Судаарыстыбаннай Мунньах Бочуоттаах грамотатынан, кыһыл көмүс чаһынан полиция полковнига, СӨ-гэр ИДьМ миниистирин солбуйааччы, полиция начальнига Неустроев Константин Константинович наҕараадаланна.