Иван Макаров: «Үлэһиттэри тардыыга кэлимсэ сыһыан ирдэнэр»

Норуот депутаттарын таһынан ити теманы дьүүллэһиигэ профессиональнай үөрэхтээһин, каадырдары бэлэмнээһин уонна аттаран туруоруу министиэристибэтин бэрэстэбиитэллэрэ, Илин эҥэр улуустарын уонна нэһилиэктэрин баһылыктара, үөрэх тэрилтэлэрин салайааччылара, суруналыыстар уо.д.а. кыттыбыттара.
Бу туһаайыыга «Сахатранснефтегаз» АУо салалтата үлэни күүскэ ыытар. Ааспыт сылга Мииринэйгэ буолбут парламент истиилэригэр олохтоох нэһилиэнньэни промышленнай тэрилтэлэргэ үлэҕэ олохтооһуну дьүүллэһии түмүгэр кэккэ сүбэлэр ылыллыбыттара. Истиилэргэ «Сахатранснефтегаз» маныаха сыһыаннаах үлэтин туһунан генеральнай директоры солбуйааччы Генадий Вадюхин дакылаат оҥорбута.
Парламент Аллараа Бэстээххэ буолбут мунньаҕар «Сахатранснефтегаз» АУо генеральнай директора Иван Макаров бэйэтин этиитигэр идэҕэ туһаайыыга оскуолаттан саҕалаан кэлимсэ, утумнаах үлэ ыытыллыахтааҕын бэлиэтээтэ. «Идэҕэ туһаайыы үлэтэ ситэтэ суох. Инженернэй, техническэй идэлэри сырдатыыга «Мин – инженербин» диэн өрөспүүбүлүкэҕэ соҕотох хамсааһын баар, бу хамсааһыны көҕүлээччилэринэн биһиги хампаанньабыт үлэһиттэрэ буолаллар. Бэйэбит өттүбүтүттэн биһиги идэҕэ туһаайар үлэҕэ улахан болҕомтону уурабыт, оскуола оҕолоругар анаан объектарбытыгар экскурсиялары тэрийэбит. Оҕолор оҥорон таһаарыы үлэтин илэ харахтарынан көрдөхтөрүнэ, кинилэр чопчу өйдөбүллээх буолуохтара, онон идэни талыы да баар буолуоҕа», – диэтэ кини.
Салгыы Иван Константинович хампаанньа ыытар сезонунан үлэлэргэ нэһилиэктэр баһылыктара дьону тардалларыгар ыҥырда: «Сибиир күүһэ» бырайыагы олоххо киллэрии чэрчитинэн «Сахатранснефтегаз» ааспыт сылга 600 км уһуннаах солооһуну кэрдэргэ куонкуруска кыайбыта. Биһиги онно хас да олохтоох хампаанньаны, биирдиилээн дьону тардыбыппыт, 150 км кэрдибиппит, ол эрээри, хомойуох иһин, үчүгэй техниката суох ойууру кэрдэр кыаллыбат. Онон бу туһаайыыга улахан үлэни ыытабыт, 2016 сыл бүтүөр диэри ити үлэни толоруохтаахпыт».
Өрөспүүбү­лүкэтээҕи ньиэп, газ хампаанньатын салайааччыта салгыы эппитинэн, кинилэргэ олохтоох дьон үлэлиир, соруктарын кыайаллар, кэлэктиип инникигэ эрэллээх. «Хампаанньаҕа биир сыл иһигэр 20-чэ киһи үлэҕэ киирэр, үлэттэн уурайан барыы-кэлии суох. Биһиги дьоммут промышленность салаатыгар үлэлииргэ бэлэмэ суохтар диэн санааны кытта сөпсөспөппүн. Ити оннук буолбатах. Биһиэхэ бэлэмнээх эдэр дьон кэлэллэр, кинилэр уопуттаах каадырдары кытта промышленнай объектарга үлэлииргэ бэлэмнэр. Бүгүҥҥү күҥҥэ эдэрдэр иннилэригэр аан дойду аһаҕас», — диэн түмүктээтэ кини.

«Сахатранснефтегаз» АУо пресс-сулууспатын матырыйаалынан Елена БАИШЕВА бэлэмнээтэ.