10 ноября 2017 в 11:45

Өктөөп 100 сыла – өрөспүүбүлүкэҕэ

РФКП Саха сиригэр өрөспүүбүлүкэтээҕи кэмитиэтэ иһитиннэрбитинэн, Өктөөп үбүлүөйүн иннинэ аан дойду үлэһит аймаҕын сирдьитигэр уонна Гражданскай сэрии дьоруойдарыгар саҥа пааматынньыктары оҥорууга уонна чөлүгэр түһэриигэ элбэх үлэ барда. Ол курдук, Үөһээ Бүлүүгэ оройуоннааҕы кэмитиэт бастакы сэкирэтээрэ Георгий Степанов салайыытынан В.И. Лениҥҥэ пааматынньык уонна кини аатынан тупсаҕай сквер аһылыннылар. Коммунистар Кыадаҥдаттан чугас Гражданскай сэрии дьоруойа, бандьыыттартан сырдык тыына быстыбыт комсомолец Павел Кардашевскайга пааматынньыгы туруордулар.

Сэтинньи 7 к. Сунтаар сэлиэнньэтин киинигэр РФКП райкомун бастакы сэкирэтээрэ Трофим Павлов уонна коммунист-депутат Иннокентий Васильев салалталарынан Гражданскай сэрии кыттыылаахтарыгар – Сэбиэскэй былааһы олохтооһун иһин охсуһууга өлбүт Кыһыл аармыйа 30 саллаатын уҥуоҕар чөлүгэр түһэриллибит пааматынньыгы аһыы сиэрэ-туома буолла.

Покровскай куорат коммунистара «70 лет Великого Октября» стеланы уонна Гражданскай сэриигэ өлбүт бастакы комсомолецтарга пааматынньыгы саҥардан астылар. Ону сэргэ Хаҥалас сиригэр сыылкаҕа олорбут Серго Орджоникидзе пааматынньыгар сибэкки уурулунна.
Мэҥэ-Хаҥалас Майатыгар Улуу Өктөөп 100 сылыгар анаммыт миитиҥҥэ Чүүйэ, Аллараа Бэстээх, Төхтүр сэлиэнньэлэригэр саҥа алын сүһүөх тэрилтэлэр баар буолбуттарын иһитиннэрдилэр.

ХИФУ профессора, коммунист Георгий Родионов көҕүлээһининэн биллэр спортсменнар Аллараа Бэстээх – Дьокуускай маршрутунан 100 км марафонскай дистанцияҕа сүүрдүлэр. Бу хамаанда састаабыгар аан дойду, Россия уонна Саха сирин рекордсменнара Татьяна Жиркова, Татьяна Ариносова, Дмитрий Горохов, Степан Лыткин уо.д.а. киирбиттэрэ.
Сэтинньи 7 к. Дьокуускайга буолбут хаамыыга уонна миитиҥҥэ 3 тыһ. кэриҥэ куорат олохтооҕо уонна ыалдьыта сырытта. Миитиҥҥэ РФКП Саха сиринээҕи рескомун бастакы сэкирэтээрэ Виктор Губарев, реском бюротун чилиэнэ Артур Алексеев, Саха сирин народнай суруйааччыта Андрей Кривошапкин, Ил Түмэн депутата Петр Аммосов, РФКП Дьокуускай куораттааҕы горкомун бастакы сэкирэтээрэ Саргылана Гоголева, о.д.а. уоттаах-төлөннөөх тыллары эттилэр.

Киэһэтин Өксөкүлээх Өлөксөй аатынан Норуоттар доҕордоһууларын дьиэтигэр буолбут үөрүүлээх мунньахха РФКП КК чилиэнэ, РФКП Саха сиринээҕи рескомун бастакы сэкирэтээрэ Виктор Губарев дакылаат оҥордо. Саха сиригэр 90-с сылларга коммунистар лидердэрэ Артур Алексеев уонна комсомолец, Аан дойдутааҕы ыччат XIX фестивалын кыттыылааҕа Алвер Петров, эдэр пионердар мустубут дьону эҕэрдэлээтилэр. Аҕа дойду Улуу сэриитин кыттыылаахтарыгар, актыбыыстарга РФКП КК «100 лет Великой Октябрьской социалистической революции» өйдөбүнньүк мэтээллэрэ туттарылыннылар. Ити кэннэ искусство маастардарын улахан кэнсиэрэ буолла.

Духовой оркестр, баян доҕуһуолунан үҥкүү, ырыа, оһуохай өргө диэри салҕаннылар. Фойеҕа Улуу Өктөөпкө аналлаах мааркалар, сэбиэскэй значоктар уонна открыткалар, бастакы Саха сирин бассабыык-революционердарыгар Максим Аммосовка, Платон Ойуунускайга, Исидор Бараховка уо.д.а. анаммыт архыып докумуоннарын уонна хаартыскалар быыстапкалара тэрилиннилэр.
Өктөөп 100 сылын өрөспүүбүлүкэ үгүс нэһилиэктэригэр бэлиэтээтилэр.