Култуура үлэһиттэрин хамнаһа төһө үрдээтэ?

Библиотека

Сардаана Алексеева, А.С.Пушкин аатынан Национальнай библиотека булгуччулаах докумуон отделын салайааччыта: “Биһиги «Докумуон экземпляра булгуччулаах буолуутун туһунан» өрөспүүбүлүкэ сокуонун чэрчитинэн үлэлиибит. Ол аата хас биирдии тахсар кинигэ 3-4 экземпляра булгуччу үйэтийиэхтээҕин туһугар үлэлиибит.
Библиотека үлэһиттэрин хамнаһа үрдээбэтэҕэ ыраатта. Бу сонун биһигини улаханнык санаабытын көтөхтө, бары үөрэн-көтөн олоробут. Үрдэтэр коэфицциент 35 % этэ, билигин онтубут тохсунньуттан 190% буолбут. Хамнас акылаата 4.8% үрдээтэ. Эдэр үлэһиттэрбит
20 тыһыынчаттан эрэ тахсаны ылар эбит буоллахтарына, билиҥҥи үрдээһин кэнниттэн 40 тыһыынчаны ылар буолуохтара. Директор уонна техүлэһиттэр хамнастара оннунан хаалар”.

Музей

Диана Павлова, Амма улууһун “Сири оҥоруу уонна бурдук ыһыытын историятын” музейын салайааччыта, науч­най үлэһит: “Сайын бэс ыйыгар хамнаһым тоҕо эрэ кыччыы сылдьыбыта. Бу соторутааҕыта хамнаспыт хаттаан ааҕыллан кэлбитэ. Ботуччу тутан, дьиэбит-уоппут кыһалҕатын быһааран абыранныбыт. Саҥа дьыл кэннэ хамнаһым 60 тыһыынча буолар диэн сурах хоту истэбин. Долгуйа күүтэбин. Дьэ, илиибэр туттахпына, чахчы үрдээбит диэн этэр кыахтаахпын”.
Кулууп

Анна Яковлева, Амма улууһун Бөтүҥ нэһилиэгин “Дьулуур” кулууп дириэктэрэ: “Биһиги кулууппут бүтүн Арассыыйаҕа бастыҥ кулууп аатын ылла. Бу конкурска кулууп үлэтин бары өрүтүн сыныйан көрөллөр. Ол курдук, ыытар тэрээһиннэриттэн саҕалаан, документациятын, каадырдары кытта үлэни, бэл, кулууп дьиэтин өрөмүөнэ хайдах барбытын, тупсаҕайын, ис-тас көстүүтүн уо.д.а. киритиэрийдэринэн сыаналаатылар. Онон үөрүүбүт үгүс. Хас да сыллаах үлэбит түмүгэ сыаналанна, салгыы да тэтиммитин ыһыктыбакка, нэһилиэнньэбит, дьоммут-сэргэбит туһугар үлэлииргэ кыһаллабыт. Маны сэргэ култуура үлэһиттэрин хамнастарын үрдэтэбит диэн олус үөрүүлээх сураҕы истэн санаабыт өссө көтөҕүлүннэ. Итинэн сибээстээн, үлэһиттэрбитигэр хамнастара перерасчеттанан түстэ. Кэлэр сылга үлэ төлөбүрэ атын буолуо дииллэр. Хамнас үрдээһинэ кулууп сүрүн үлэһиттэрин эрэ хабар, холобур, худрук, методист хамнаһа үрдүөхтээх. Онтон атыттар уонна директор хамнастара уларыйбат”.

Театр

Александра Иванова, Үүнэр көлүөнэ театрын үлэһитэ: “Биһиги хамнаспыт 2017 сыл тохсунньу 1 күнүттэн 50,6 бырыһыан үрдээбитэ. Итиэннэ алтынньыга эмиэ 4,8 бырыһыан үрдэттилэр. Бу ахсынньыга эмиэ 20 % үрдээбитин ыллыбыт. Саҥа дьыл кэннэ өссө эбиллиэ дииллэр. Онон култуура үлэһиттэрэ үөрүүбүт үгүс. Бырабыыталыстыба хамнаспытын болҕомтоҕо ылан, үлэбит-хамнаспыт өссө тахсыылаах буолуо диэн санаабыт бөҕөх”.
Ол гынан баран мэтээл да икки өрүттээх диэбиккэ дылы, бу култуура тэрилтэтин бүтүннүүтүн хаппат. Ол курдук, техперсонал, быстах-остох үлэһит хамнаһа уонна тойоттор-хотуттар хамнастара оннунан хаалбыта үгүс дьону хомоппут.

Ирина Ханды.