Куолаһы ааҕыы дьэҥкэ буолара хааччыллыаҕа

Федеральнай уонна регионнааҕы таһымнаах уопсастыбаннай палааталар Президент быыбарыгар бэйэлэрин кэтээн көрөөччүлэрин аныыр быраабы ылыахтара, оттон быыбардыыр хамыыһыйалар дьиэлэригэр устар уонна куолаһы ааҕыыны көрдөрөр камералар туруоруллуохтара.
Туһааннаах сокуону Федерация Сэбиэтин пленарнай мунньаҕар ылынар былааннаахтар. Оччоҕуна ити саҥа бэрээдэк номнуо 2018 сыллааҕы Россия Президенин быыбарыгар үлэҕэ киириэн сөп.
Федерация Сэбиэтин конституционнай сокуону таһаарыыга уонна судаарыстыбаннай тутууга кэмитиэтин бэрэссэдээтэлэ Андрей Клишас уонна Госдума судаарыстыбаннай тутууга уонна сокуону оҥорууга кэмитиэтин бэрэссэдээтэлэ Павел Крашенинников оҥорбут сокуоннара быыбар аһаҕас итиэннэ быыбар хамыыһыйаларын үлэтэ дьэҥкэ буолуутун хааччыйыыга туһуланар.
“Россия Федерациятын Президенин быыбардарын туһунан” Сокуоҥҥа көннөрүүлэр Россия Уопсастыбаннай палаататын уонна регионнар уопсастыбаннай палааталарын чилиэннэрэ быыбардыыр хамыыһыйаҕа кэтээн көрөөччүлэринэн буолалларын көҥүллүүллэр. Сокуону таһаарааччылар ааҕалларынан, ити гражданскай уопсастыба институттарын өттүттэн быыбар аһаҕас буолуутун хонтуруоллааһыҥҥа наадалаах.
«Бу уларытыылар сүрүн соруктара – уопсастыба хонтуруолун хааччыйыы уонна быыбар процедураларыгар быыбарга кыттар бар дьон итэҕэлин үрдэтии», — диэн бэлиэтээтэ Андрей Клишас.
Иккис саҥа сүүрээнинэн куолаһы ааҕыы процедуратын кэтээн көрүүгэ уонна көрдөрүүгэ анаан виеокамералары туруорар кыах буолла. Бу иннинэ итини куоластыыр саалаҕа эрэ көрүөххэ сөп этэ.
«Бу саҥаны киллэрии алҕаһы таһаарыыны туоратыаҕа, ону сэргэ куолаһы ааҕыыга албынныыр түгэннэри хааччахтыаҕа», — диэн Павел Крашенинников эрэнэр.
Сокуону Госдума ылыммыта, ону бары фракциялар өйөөбүттэрэ. Оттон пленарнай мунньах иннинэ, сэтинньи 28 к., Федерация Сэбиэтин сокуону таһаарыыга кэмитиэтэ палаата сокуону ылынарыгар сүбэлээбитэ.