«Ил Түмэн» хаһыат, нэһилиэнньэлээх пууннары тупсарыы сылын көрсө, «Нэһилиэнньэлээх пууну тупсарыы сылыгар нэһилиэгим уларыйбыт историята» диэн хаартысканан куонкурус биллэрбитэ. Куонкуруска үгүс нэһилиэктэртэн хаартыскалар киирдилэр. Ол курдук, Амма улууһун Чакыр нэһилиэгин олохтооҕо Анна Павлова олохтоохтор сөбүлээн сынньанар Кыайыы болуоссаттара киэркэйбитин, дьоҥҥо  олус наадалаах уу ситимэ тардыллыбытын кэпсиир хаартыскаларын, Уус-Алдан Чаран нэһилиэгин олохтооҕо Елена Тролукова олохтоохтор дьиэлэрин олорорго эрэ тупсаҕай курдук оҥостор буолбатахтарын, дьиэлэрин таһын, тиэргэннэрин киһи хараҕын сылаанньытар курдук киэргэтэн оҥостор буолбуттарын кэпсиир хаартыскаларын хаһыат ырытааччыта Дмитрий Осипов салайааччылаах дьүүллүүр хамыыһыйа сэргээтэ уонна  анал бириистэринэн бэлиэтээтэ. Оттон Һөһэ Бүлүү улууһуттан киирбит хаартыскалары дьүүллүүр хамыыһыйа бастыҥынан аахта. Хаартыскалар ааптардара Галина Захарова төрөөбүт Кэнтигин нэһилиэгэ кэлиӨӨи сылларга хайдах курдук тупсубутун, ол онтон олохтоохтор үөрүүлэрэ улаханын кэпсиир хаартыскалары ыыппыт. Ол курдук,  Кэнтик быыкаа дьоно саӨа тутуллубут уһуйаана, эдэрдиин-эмэниин сынньанар уонна дьарыктанар спортивнай болуоссат, уулуссалар оҥоһуллан, олохтоохтор уонна тиэхиникэ аны бырыыга-бадарааҥҥа буккуллубат буолбуттарын, тылынан эппиттээҕэр ордук дьэҥкэтик көрдөрөн кэпсиир хаартыскалара кэрэхсэннилэр.

Хаһыат суруналыыстара кыайыылаахха грамотаны кытары сыаналаах бирииһи тиэртилэр. Галина Николаевна үөрүүтүн маннык тылларынан үллэһиннэ: «Тапталлаах Кэнтигим кэлиҥҥи сылларга бэркэ тубуста, эдэримсийдэ. Хаһыакка куонкурус биллэрбиттэрин ааҕан баран, төрөөбүт нэһилиэгим туһунан кэпсиэхпин баҕарбытым. Хаарбах мас оҕо саадын оннугар билигин икки мэндиэмэннээх таас оҕо саадын дьиэтэ дьэндэйдэ. Оттон спортивнай тренажердаах болуоссакка дьүөгэлэрим сарсыарда алта чаастан дьарыктанан, астынан-дуоһуйан ахан кэлэллэр. Уулуссаларбыт оҥоһуллубуттара эмиэ ураты үөрүүнү аҕалар. Оттон дьон дьиэлэрин, куорат ыалын курдук толору хааччыллыылаах оҥостор буолбуттара олус үчүгэй. Ыччат тыа сиригэр олохсуйар буолан эрэр . Хаһыат наадалаах куонкуруһу тэрийбит. Мин «Ил Түмэн» хаһыаты олус сэргээн ааҕабын. Билигин сиэннэрбин көрө куоракка кэлэ сылдьабын. Ол иһин хаһыат үлэһиттэрин илиилэриттэн бу тыа сиригэр олус наадалаах тэрили тутан үөрдүм», — диэтэ.