Лөгөй оскуолата – оҕо хамсааһынын федеральнай былаһаакката

Ол курдук, Билии күнүгэр аналлаах үөрүүлээх линейканы таһынан, бу күн «Арассыыйатааҕы оскуола оҕолорун хамсааһына» диэн саҥа бырайыак официальнайдык саҕаланна. Бу туһунан СӨ Ил Дарханын өйөбүлүнэн үлэлиир «Дьулуур» оҕо биир сомоҕо хамсааһынын информационнай киинэ иһитиннэрэр.
Санатар эбит буоллахха, «Арассыы­йатааҕы оскуола оҕолорун хамсааһына» Бүтүн Арассыыйатааҕы общественнай судаарыстыбаннай оҕо-ыччат түмсүүтүн сүрүннүүр сэбиэтин быһаарыытынан, быйыл саас хас биирдии региоҥҥа пилотнай оскуолалар баар буолбуттара.

«СӨ үөрэҕин министиэристибэтэ уонна СӨ Ил Дарханын өйөбүлүнэн үлэлиир «Дьулуур» оҕо биир сомоҕо хамсааһына Бүтүн Арассыыйатааҕы оскуола оҕолорун хамсааһынын федеральнай экспериментальнай былаһааккаларын статустарын иҥэриигэ куонкурус тэрийэн ыыппыппыт. Талыы кэмигэр тустаах оскуолаҕа оҕо общественнай хамсааһына хайдах үлэлиирэ, СӨ Оҕо хамсааһынын бырагыраамаларыгар кыттыы рейтинэ, каадырдар төһө бэлэмнээхтэрэ уонна оскуола салалтата оҕо социальнай инициативаларын сайыннарыыга төһө интэриэстээҕэ учуоттаммыта», — диэн кэпсиир «Дьулуур» оҕо биир сомоҕо хамсааһынын салайааччыта, Арассыыйатааҕы оскуола оҕолорун хамсааһынын Саха сиринээҕи салаатын бэрэссэдээтэлэ Геннадий Охлопков.

Лөгөй оскуолатыттан ураты өссө Сунтаар, Усуйаана, Нам, БулуІ, Нерюнгри улуустарын уонна Дьокуускай куорат оскуолалара пилотнай быһыытынан киллэриллибиттэрэ.
Геннадий Охлопков үөрүүлээх тэрээһин аһыллыытыгар СӨ үөрэҕин миниистирин Феодосия Габышева эҕэрдэ суругун ааҕан иһитиннэрдэ.
«Оҕо общественнай түмсүүлэрэ эдэр гражданнарга олоххо бэйэлэрин суолларын булалларыгар, общественнай үлэҕэ-хамнаска актыыбынайдык кыттарга көмөлөһөллөр, итиэннэ маннык түмсүү үөрэнээччилэри айар-тутар олоххо ыҥырар, доҕордоһор-бодоруһар эйгэни тэрийэр», – диэтэ Геннадий Охлопков.
Салгыы «Дьулуур» оҕо биир сомоҕо хамсааһынын салайааччыта Геннадий Охлопков пилотнай оскуола сертификатын туттарда уонна оскуола үөрэнээччилэрин, кэлэктиибин саҥа үөрэх дьыла саҕаламмытынан эҕэрдэлээтэ. Кини оҕо общественнай хамсааһынын сайдыытыгар оскуола педагогическай кэлэктиибин сыралаах үлэтин бэлиэтээтэ.
Лөгөй орто оскуолата улууска биир бастыҥ көрдөрүүлээх, өрөспүүбүлүкэҕэ оҕо хамсааһынын бырагыраамаларын олоххо киллэриигэ холобур буолар оскуола. Бу оскуола үөрэнээччилэрэ 100 % общественнай үлэҕэ-хамнаска көхтөөхтүк кытталлар.
Лөгөй орто оскуолатын иһинэн үлэлиир «Кэскил» оҕо общественай түмсүү салайааччыта Татьяна Петухова кэпсииринэн, 2017 сылга оскуола 70 сыллаах үбүлүөйүн бэлиэтииргэ бэлэмнэнэр.
«Биһиги уруккуну умнубакка, пионерия үтүө үгэһигэр тирэҕирэн үлэлиибит, оҕо хамсааһынын саҥа таһымҥа таһаарарга дьулуһабыт. Ол курдук, 1991 сыллаахха Зоя Космодемьянская аатынан Пионер тэрилтэтэ «Кэскил» оҕо тэрилтэтигэр кубулуйбута», — диэн оскуола завуһа Татьяна Михайловна ахтан-санаан аһарда.
Эҕэрдэ тыл кэнниттэн иккис кылаас үөрэнэччилэрэ «Кэскил» оҕо хамсааһыныгар киириилэрин церемонията ыытылынна. Кырачааннарга хаалтыстары баайыы бочуоттаах миссията педагогическай үлэ бэтэрээннэригэр туттарыллыбыта үөрүүлээх. Оттон билигин үлэлии сылдьар педагогическай састаапка баһаатай хаалтыстарын баайдылар.
Тэрээһин түмүктэниитигэр «Дьулуур» оҕо хамсааһынын пед-этэрээттэрэ үөрэнээччилэргэ анаан араас ооньуулары ыыттыллар.