Маҥнай олунньу 23 күнэ Аан дойду дьахталларын бырааһынньыгынан биллэрэ

Дьокуускайдааҕы 1№-дээх оҕо балыыһатын оҕолору реабилитациялыыр уонна чөлүгэр түһэрэр отделениетын быраас уонна сиэстэрэ кэрэ аҥардарыттан бырааһынньыгы көрсө кылгас ыйытыктары биэрэргэ соруннум, ол курдук отделение сэбиэдиссэйэ, невролог-быраас Алена Прокопьеваттан ылбыт эппиэттэрбин хомуйан эһиги болҕомтогутугар таһаарабын.

• Бастатан туран, байыаннай билиэттээх буоларгытын быһыытынан кэлэн иһэр Аҕа дойдуну көмүскээччилэр күннэринэн эҕэрдэлиибин уонна хаһан эмит соһуччу бу күн эн кимтэн эмит эҕэрдэ, биитэр бэлэх туппутуҥ дуо? – диэн ыйытыыбын саҕалыам.
• Эҕэрдэҕит иһин махтанабыт. Баҕар атын дьон соһуйаллара буолуо даҕаны доруобуйа харыстабылын үлэһиттэриттэн эҕэрдэ тылларын бу күн көтүппэккэ барыларыттан истэбит уонна тутабыт, бэйэм биир идэлэхтэрбин эҕэрдэлиирбин умнубаппын, ол гынан баран, билэр уонна алтыһар дьоммуттан суоҕа чахчы.
• Аҕа дойдуну көмүскээччилэр күннэрин дьиэ кэргэҥҥитигэр хайдах көрсөҕүтүй?
• Оҕо сааспыттан Аҕа дойдуну көмүскээччилэр уонна Аан дойду дьахталларын күннэрин дьоммун кытта бииргэ үөрэ-көтө көрсөбүт, ону таһынан араас бэлэх бэрсиһэрбитин сөбүлүүбүт. Билигин даҕаны бу бырааһынньыктар дьиэ кэргэммэр саамай кэтэһиилээх түгэн.
• Чөл олоҕу тутуһуу билигин ордук күүскэ пропагандаланар, ону таһынан дороубуйаҕын хайдах көрүнэҕин, кэрэ буолар туһугар хайдах дьаһанаҕын?
• Чөл олоҕу тутуһуу уонна пропагандата билигин улахан болҕомтоҕо ылыллыбытыттан үөрэбин эрэ. Тус бэйэм уонна дьиэ кэргэним чөл олоҕу тутуһар, суолтата олус киэҥ, көнөтүнэн доруобай, кыраһыабай эрэ буолуу буолбакка манна киһи майгыта-сигилитэ, дьоҥҥо сыһыана, үтүө санаалаах буолуута барыта киирэр. Бастатан туран, сөптөөх күннээҕи режимы тутуһуу, доруобаҕа туһалаах эрэ бородууктаны туһаныы уонна, иккиһинэн, биллэн турар куруук үөрэ-көтө санаалаах күнү атаарыы буолар. Хомойуох иһин, бириэмэ ыгым буолан, билигин спордунан дьарыктаныахпын кыаллыбат. Ол да буоллар сыал-сорук туруорунан, сүүрүүнэн дьарыктанар баҕалаахпын.
• Дьиэҕитигэр үксүн остуол сүрүн бүлүүдэтинэн атын ханнык көрүҥнэри оҥостон дьоҥҥутугар күндүлүүгүтүй?
• Күн ахсын эт аһылык баар буолар, ону тэҥэ төһө кыалларынан оҕуруот аһынан салаат араас көрүҥнэрин оҥосторбутун сөбүлүүбүт. Үлэ күнүттэн атын өрөбүллэрбэр оҕолорбор бурдук аһын буһаран үөрдэ сатыыбын.
• Кистээбэккэ эттэххэ, кэргэҥҥитигэр, биитэр табаарыскытыгар тугу бэлэхтээри сылдьаҕытый?
• Бэлэх сүнньүнэн, мин санаабар, ис сүрэхтэн буолуохтаах, онно сиэттэрэн хаһаайыстыбаҕа туһалаах бэлэхтэри туттарарбын ордоробун.

Эҕэрдэ бастыҥа

Майя Григорьева, Дьокуускайдааҕы 1№-дээх оҕо балыыһатын оҕолору реабилитациялыыр уонна чөлүгэр түһэрэр отделениетын старшай сиэстэрэтэ:

• Оҕобун, Алгыспын уонна бииргэ үлэлиир коллегаларбын, кэлэн иһэр Аҕа дойду көмүскээччилэр күннэринэн эҕэрдэлиибин! Баҕарабын чэгиэн доруобуйаны, үлэҕитигэр, үөрэххитигэр өрүү ситиһии сиэтистин, туппуккут тупса турдун, дьиэ-кэргэҥҥитигэр дэлэй, уйгу-быйаҥ, өйдөһүү-өйөһүү, истиҥ таптал баар буоллун! Үйэлээх дьоллоох олоҕу баҕарабын, биһиги эһигиннэн киэн туттабыт!

Эмма Алексеева, Дьокуускайдааҕы 1№-дээх оҕо балыыһатын оҕолору реабилитациялыыр уонна чөлүгэр түһэрэр отделениетын клиническай психолога:

• Күндү бииргэ үлэлиир Дьокуускайдааҕы 1№-дээх оҕо балыыһатын оҕолору реабилитациялыыр уонна чөлүгэр түһэрэр отделениетын күүстээх аҥардарын кэлэн иһэр Аан дойдуну көмүскээччиллэр күннэриэн итиитик-истиҥник эҕэрдэлиибин! Баҕарабыт саха алмааһыныы кытаанах доруобуйаиы, олоҥхо курдук уһун дьоллоох олоҕу, дьиэ кэргэҥҥитигэр ил-эйэ эҥэрдэстин, үлэҕитигэр үрдүктэн-үрдүк ситиһиилэри, амарах, сырдык санааҕыт сырдыгы эрэ сыдьаайдын, баҕа санааҕыт кынаттыы көтүттүн, көмөлөспүт үтүөҕүт үс төгүл үтүөннэн кэллиннэр диэн алгыс тылы этэбит! Саха буолан сандаарын, киһи буолан килбэйиҥ!

Кэпсэттэ Василий Прокопьев.