Максим Аммосовка анаммыт ыһыах

Ыһыах бочуоттаах ыалдьыттарынан Ил Түмэн Бэрэссэдээтэлэ Александр Жирков, СӨ Бырабыыталыстыбатын Бэрэссэдээтэлэ Евгений Чекин, М.К. Аммосов сиэнэ Максим Аммосов, КӨ Президенин сүбэһитэ Мира Карыбаева салайааччылаах Кыргызстан делегацията уо.д.а. буоллулар.
Быйыл Нам улууһугар Максим Кирович Аммосов сыла биллэриллэн, киин сэлиэнньэҕэ кини аатынан болуоссат саҥардылынна уонна Нам сирин уһулуччулаах уолугар пааматынньык туруорулунна.
Бырааһынньык улуус нэһилиэктэрин параадтарыттан саҕаланна. Ити хаамыыга сүүһүнэн киһи кытынна. Аҕыс кыыс, тоҕус уол арыалдьыттаах Алгысчыт үгэс быһыытынан аал уоту айах тутан аһатта, Үрдүк Айыылартан орто дойду дьонугар уйгуну-быйаҥы көрдөстө, арчылаата. Кымыс иһиитин сиэрин-туомун кэмигэр бочуоттаах ыалдьыттары саха норуотун бастыҥ утаҕынан күндүлээтилэр. Улуус баһылыга Александр Атласов Ытык Дуоҕаны анал олоххо туруоран, бырааһынньыгы саҕаламмытынан биллэрдэ.
Түһүлгэҕэ Максим Аммосов төрөөбүтэ 120 сылыгар аналлаах театр дьайыыта көрдөрүлүннэ.

Бырааһынньык официальнай түһүмэҕэр СӨ Бырабыыталыстыбатын Бэрэссэдээтэлэ Евгений Чекин СӨ Ил Дархана Егор Борисов эҕэрдэтин аахта уонна улуус бастыҥ үлэлээх дьонугар судаарыстыбаннай наҕараадалары туттарда. Муниципальнай тэриллии аатыттан улуус баһылыга Александр Атласов норуот бырааһынньыгынан эҕэрдэлээтэ.
Ил Түмэн спикерэ Александр Жирков быйылгы ыһыах сүүнэ суолталаах историческай түгэннэргэ сөп түбэһиннэрэн ыытылларын бэлиэтээтэ. Ол курдук, Саха сирэ Россия судаарыстыбатын састаабыгар киирбитэ 385, САССР тэриллибитэ 95 итиэннэ өрөспүүбүлүкэ судаарыстыбаннаһын төрүт­тэс­пит Максим Кирович Аммосов төрөөбүтэ 120 сыла бэлиэтэнэллэр.
Александр Жирков бүгүн саха норуотун быраа­һын­ньыгар Кыргызстан Өрөс­пүүбүлүкэтин Президе­нэ Алмазбек Атамбаев өйө­бүлүнэн Кыргызстантан официальнай делегация кыттарыгар ыһыахха кэлбит дьон болҕомтотун туһаайда. Кини улуус олохтоохторугар, ыалдьыттарга үтүө баҕа санааларын тиэртэ, ол кэнниттэн Ил Түмэн наҕараадаларын туттарда.
Кыргызстан Өрөспүү­бү­лүкэтин Президенин сүбэһитэ Мира Карыбаева: “Бүгүҥҥү бырааһынньык биһиги култуураларбыт икки ардыларыгар майгыннаһар өрүттэр элбэхтэрин көрдөрдө. Биһиэхэ саас маннык бырааһынньык баар”, — диэтэ. Кини 30-с сылларга Кыргызстан тутулуга суох буолуутун төрдүгэр турбут Максим Аммосовка махтаныахтаахпытын бэлиэтээн баран: “Сырдык кэскил диэки бииргэ дьулуһуоҕуҥ. Кыргызстан Евразия сойууһугар киириитэ экономикаҕа уонна политикаҕа эрэ сибээстэринэн буолбакка, манна көстөр дьон икки ардыларыгар сибээстэринэн бөҕөргүөх тустаах. Уруй-айхал!» — диэн тылларынан түмүктээтэ.
Бэйэтин эҕэрдэ тылыгар Максим Кирович сиэнэ Максим Аммосов манныгы эттэ: «Биир дойдулаахтарбытыгар барыгытыгар ийэбиттэн, Максим Кирович кыыһа Лена Максимовна Аммосоваттан эҕэрдэтин тиэрдэбин. Кини биһиги дьиэ кэргэммит уонна Саха сирин бөҕө сибээстэрэ олохтонорун, Максим Кирович сырдык аатын үйэтитэр туһугар сүрэҕин-дууһатын баҕатынан үгүһү оҥорбута. “Библия” диэн мындыр кинигэ аатырбыт 10 кэс тылынан киһи аймах барыта сирдэтэн олорор. Олортон биирдэстэригэр “бэйэҥ ийэҕин уонна аҕаҕын ытыктаа. Эн үйэҥ уһуурун туһугар” дэнэр. Бу улуу муударас буолар. Киһи, бастатан туран, бэйэтин төрөппүттэрин өйдүүр аналлаах. Бүгүн Аскар Чингизович бэртээхэй тыллары аҕалан, “бэйэтин историятын өйдөөбөт норуот – мөлтөх норуот” диэбитэ. Саха сирин дьоно бэйэлэрин историяларын умнубаттарын көрөр үөрүүлээх. Ол мин Максим Кирович сиэнэ буоларбыттан эрэ тутулуга суох. Саха норуота кэс тыллары сыаналыырыттан, толороруттан үөрэбин. Саамай сүрүнэ, ити алгыстаах буолуоҕа, ол эбэтэр бу орто дойдуга туох барыта ситимнээх».
Ити кэнниттэн ыһыах бочуоттаах ыалдьыттара, олохтоохтор доҕордоһуу оһуохайыгар түмүстүлэр.