05 февраля 2016 в 10:58

Марха тардыытын экологиятын туруга долгутар

Экономика миниистирэ Валерий Максимов салайааччылаах СӨ судаарыстыбаннай былааһын толоруулаах уорганнарын отчуотун ыытыыга оробуочай бөлөх Маалыкай эргин нэһилиэктэр олохтоохторугар 2015 сыллааҕы үлэ түмүктэрин туһунан билиһиннэрдэ. Маалыкай сэлиэнньэтигэр буолбут көрсүһүүгэ Бордоҥ, Мэгэдьэк, Малдьаҕар, Чуукаар уонна Марха нэһилиэктэрин олохтоохторо кытыннылар.

Ити тэрээһиҥҥэ делегация састаабыгар өрөспүүбүлүкэ народнай депутата, Ил Түмэн сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Владимир Прокопьев кыттыыны ылла.

2015 сылга өрөспүүбүлүкэ судаарыстыбаннай былааһын толоруулаах уорганнарын үлэтин туһунан дакылааты экономика миниистирэ Валерий Максимов оҥордо. Отчуот кэмигэр Маалыкай эргин нэһилиэктэри кытта ааспыт сылга көрсүһүү боротокуолун толоруу көрүлүннэ. Боротокуол 80% туолбут.
Аһаҕас кэпсэтии хаамыытыгар тыа хаһаайыстыбатын сайдыытыгар, Маалыкай эргин уонна Ньурба оройуонун бүтүннүүтүн электрическэй уотунан хааччыйыыны тупсарыыга, доруобуйа харыстабылыгар элбэх ыйытыы киирдэ. Владимир Прокопьев бэлиэтээбитинэн, Маалыкай олохтоохторугар биир кыһалҕалаах боппуруоһунан Марха өрүс тардыытын экологическай туруга буолар. Кини 2016 с. олунньу 9 к. Ньурбаҕа «Марха өрүс тардыытын экологическай туругун туһунан» темаҕа Ил Түмэн көһө сылдьар истиилэрэ буолалларын иһитиннэрдэ. Бу тэрээһин кини салайар сис кэмитиэтин көҕүлээһининэн ыытыллар.
Дьон итини сэргэ нэһилиэктэр олохтоохторун тиэйиигэ уонна кэмигэр аһылык бородуукталарын аҕалыыга анаан уу тырааныспарын хааччыйыы (трамвай уонна кыра литражтаах баржа), Интернет сибээһин, сир учаастактарын, ол иһигэр уһук илиннээҕи гектар, бэтэринээрдэр хамнастарын, эдэр ыалларга олорор дьиэ тутуутун, тус сыаллаах программаларга кыттыы, грант политикатын боппуруостарын көтөхтүлэр.
Биир сытыы кыһалҕанан нэһилиэктэргэ Сбербаан филиалын уонна Россия Почтатын үлэлэрэ буолар. Сбербаан терминала суоҕуттан (бары кэриэтэ хамнастарын картаҕа ылаллар) төлөбүрдэри оҥорууга, босуобуйалары, хамнаһы ылыыга улахан ыарахаттар үөскүүллэр. Онон картаттан хамнастарын харчытын устар туһугар олохтоохтор Ньурбаҕа барарга күһэллэллэр, оттон кэмиттэн көрөн таксинан айаҥҥа 1000-4000 солк. төлүүллэр эбит. Почта филиалын үлэһитэ нэдиэлэ устата хас да нэһилиэги кэрийэн, биир нэһилиэккэ 2 күн эрэ үлэлиир.
Алта чаас буолбут отчуот кэмигэр Маалыкай эргин нэһилиэктэртэн олохтоохтор элбэх этиини киллэрдилэр. Олору болҕомтоҕо ылан, боротокуолга бэлиэтэннэ.
Оробуочай бөлөх чилиэннэрэ итини сэргэ дьону тус боппуруостарынан көрүстүлэр. Барыта 73 киһини кытта кэпсэттилэр.

Ньурба улууһун дьаһалтатын пресс-сулууспатын матырыйаалынан.