21 мая 2015 в 12:36

Мэҥэ-Хаҥаласка быйыл 151 оҕо күн сирин көрдө

Ыам ыйын 20 күнүгэр Дьиэ кэргэн күнүн бэлиэтээһин чэрчитинэн, оройуоннар икки ардыларынааҕы төрүүр дьиэттэн үс ийэ кырачааннарынаан үөрүүлээх быһыыга-майгыга дьиэлэригэр-уоттарыгар атаарылыннылар.

Павловскай олохтоохторо Виктория, Сергей Васильевтар дьиэ кэргэттэригэр бастакы оҕолорун — кыыһы күн сирин көрдөрдүлэр, Хочо бөһүөлэгин эдэр ыала Алена, Николай Луковцевтар үһүс уол оҕолоннулар уонна Аллараа Бэстээхтэн Розалия, Султанбек Гуламовтар үһүс оҕолорун кыыстаннылар.

Дьоро күҥҥэ улуустааҕы дьиэ кэргэн уонна ыччат дьыалаларыгар управление начальнига Константин Захаров ыалдьыттаата уонна эдэр ыалларга аналлаах государственнай программаларга киирсэллэригэр сүбэ-ама биэрдэ.

Бэйэлэрин эҕэрдэ тылларын «Нөөрүктээйи нэһилиэгэ» МТ кылаабынай специалиһа Владислав Старостин, 2-с Наахара нэһилиэгин баһылыга Василий Шестаков уонна Аллараа Бэстээх бөһүөлэгин дьаһалтатын ыччат дьыалаларыгар специалиһа Леонид Болдаков анаатылар, сибэкки дьөрбөлөрүн уонна бэлэхтэрин туттардылар.

Төрүүр дьиэ бары үлэһиттэригэр, чуолаан кылаабынай быраас Зоя Москинаҕа ийэлэр ааттарыттан Алена Луковцева, аҕалар ааттарыттан Сергей Васильев махталларын тиэртилэр.

2015 сыл ыам ыйын 20 күнүнээҕи туругунан улууска 151 оҕо: 87 кыыс уонна 64 уол күн сирин көрдө. Зоя Егоровна бэлиэтииринэн, урукку сылларга уол оҕо ахсаана баһыйар эбит буоллаҕына, быйыл кыыс оҕо ахсаана 23-нэн элбээбит. Ааспыт сыллаахха 494 кырачаан: 244 кыыс уонна 250 уол төрөөбүт.

Виктория Белолюбская, СИА.