Миниистир фермердэргэ сертификаттары туттарда

Бу федеральнай тус сыаллаах программа чэрчитинэн граннары 17 улуустан 25 фермер ылла. Хаһаайыстыба бизнес-былаанын олоххо киллэриигэ ирдэнэр сууматтан көрөн граннар үптэрэ тыырылынна. Холобур, Бүлүү улууһуттан кыайыылаах Егор Иннокентьев 100 төбөҕө сибиинньэ ферматын тутууга 1413 тыһ. солк. ылыаҕа. Мэҥэ-Хаҥалас улууһуттан фермер Еремей Сергеевкэ 100 төбөҕө сылгы иитэр базаны тутуутугар 3600 тыһ. солк. кээмэйдээх грант ананна. Ону таһынан Еремей Сергеев 122 төбө бөдөҥ ынах сүөһүнү иитэн туруорар.
Хамыыһыйа 25-тэн 2 граны сылгыны үөрдээн иитиигэ ыытарга быһаарда, биири – сибиинньэ иитиитигэр. Онтон атын грант 50-нуу, 100-түү төбө ынах сүөһү иитиллэр хотоннорун тутууга уонна саҥардыыга ыытыллыаҕа.

Быйылгы сыл уратытынан Нам улууһуттан үс фермер хаһаайыстыбата Партизан уонна Арбын сэлиэнньэлэригэр агрокластер чэрчитинэн сүөһү иитиитин сайыннарыахтаахтара буолар. Ол курдук, Петр Бугаев – 120 төбөҕө, Петр Баишев – 100 төбөҕө, Дмитрий Мокрощупов – 70 төбөҕө хотон тутталларыгар грант бэриллиэҕэ. Маннык агрокластер Чурапчы улууһун Мугудайыгар номнуо үлэлиир, онно эдэр фермердэргэ 11 дьиэ, ону таһынан 5 хотон тутуллубуттара.

Саамай хотугу оройуон – Абый улууһун фермерэ Иван Слепцов 3900 тыһ. солк. суумалаах 100 төбөҕө хотону тутууга бизнес-былаанын көмүскээбит. Кини хаһаайыстыбатыгар 152 сылгылаах, 112 төбө ынах сүөһүлээх.

Быйылгы сылга федеральнай тус сыаллаах программаны олоххо киллэриигэ федеральнай бюджеттан 58 933 тыһ. солк. уонна өрөспүүбүлүкэ бюджетыттан 35 846 тыһ. солк. анаммыт. Ону таһынан граны ылааччы дьон бэйэлэрин үптэрин эмиэ киллэрэллэр. Биир грант суумата 1 400 тыһ. солкуобайтан 6 мөл. солк. диэри араастаах.

Миниистир Александр Артемьев фермердэри кыайыыларынан эҕэрдэлээтэ, таһаарыылаах үлэни баҕарда. Кинилэргэ улахан эппиэтинэс сүктэриллэрин бэлиэтээн маннык эттэ: «Федеральнай тус сыаллаах граннар – бу Саха сирин тыатын хаһаайыстыбатыгар фермердэр уонна табаарынай оҥорон таһаарыы сайдыыларыгар сүүнэ көмө уонна өйөбүл. Ити граннары туттаран туран, эһигиттэн үлэ үрдүк түмүктэрин күүтэбит – тыа сиригэр сүөһү, сылгы, сибиинньэ төбөтө элбиирин туһугар. Эһиги олус ыйааһыннаах, көдьүүстээх бизнес-былааннары оҥороҥҥут граннары сүүйдүгүт. Былааннаргытын олоххо киллэрэри уонна судаарыстыба өйөбүлүнэн көдьүүстээх түмүгү ситиһиэххит, сиргэ бигэтик турар, аныгы ирдэбиллэринэн үлэлиири сатыыр, онуоха баҕалаах хаһаайыттар буолуоххут диэн эрэнэбит.

ну кытта бу граннар үптэрин туһаныыны судаарыстыба, министиэристибэ хонтуруоллуур. Эһиги үлэҕит хаамыытын барытын кэтээн көрүөхпүт, ыарырҕатар түгэннэргэ министиэристибэ специалистара сүбэ-ама буолан көмөлөһүөхтэрэ, өйүөхтэрэ, эһиги иннинэ граннары ылбыт фермердэргэ үс кэнники сылга эмиэ оннук өйөбүл оҥоһуллар. Онон соҕотох буолбатаххыт, министиэристибэ фермердэри өрүү өйүөҕэ. Ситиһиилэри!»

Тыа хаһаайыстыбатыгар уонна ас-үөл политикатыгар министиэристибэ пресс-сулууспатын матырыйаалынан.