596
30 марта 2018 в 12:57
Муус устар 1 күнүттэн ким пенсията үрдүүрүй?
Социальнай пенсиялары индексациялааһын ааспыт сылга Россия Федерациятыгар пенсионер олох олоруутун алын кээмэйэ үүнүүтүн тэтимиттэн тутулуктаах. Саха Өрөспүүбүлүкэтигэр муус устарга 28,5 тыһ. аһарар ахсааннаах пенсионер ыйдааҕы пенсията эбиллиэҕэ. Манна өрөспүүбүлүкэ бары үлэлээбэт пенсиялаах дьонун туһунан этиллибэт.
Кинилэр ортолоругар кимнээх баалларый? Бу – Аҕа дойду Улуу сэриитин кыттыылаахтара, инбэлиит оҕолор, иитээччилэрин сүтэрбиттэринэн социальнай пенсияны ылааччылар, төгүрүк тулаайахтар, бойобуой дьайыыларга кыттыбыт инбэлииттэр уо.д.а. Итини таһынан страховой пенсияҕа быраабы ылбатах, кырдьаҕаһынан социальнай пенсияны ылааччылар.
РПФ СӨ-гэр салаатын пенсияны анааһыны уонна хаттаан ааҕыыны тэрийиигэ отдела иһитиннэрбитинэн, эбиллиини ылааччылар хас биирдии категорияларыгар улаатыы кээмэйэ араас буолуоҕа. Ортотунан 300 солк. аһарар. Индексация ити үөһэ этиллэр пенсиялаах дьон үлэлиириттэн, үлэлээбэтиттэн тутулуга суох ыытыллар.
Муус устар 1 күнүттэн судаарыстыба иннигэр уһулуччулаах уонна ураты үтүөлээх гражданнарга эбии материальнай хааччыйыы кээмэйэ 2,9% улаатыаҕа. Кинилэр ортолоругар Россия Федерациятын наҕараадаларын ылбыттар, Сэбиэскэй Сойуус Дьоруойдара, Россия Дьоруойдара уонна Албан Аат уордьанын толору кавалердара бааллар.
Санатар буоллахха, бу иннинээҕи страховой пенсиялары индексациялааһын 2018 сыл тохсунньутугар оҥоһуллубута. Быйыл атырдьах ыйыгар Пенсионнай фонда 2017 сылга үлэлээбит пенсиялаах дьоҥҥо страховой пенсияларын үгэс курдук хаттаан ааҕыыны ыытыаҕа. Онуоха сайабылыанньаны биэрэр наадата суох.
