Нөөрүктээйи оҕуруотчуттара: «Атын хайысхаларынан эмиэ үлэлэһэр баҕалаахпыт»

«Саҥа олохтор» быйыл хаппыыстаны үс гектарга, моркуобу, сүбүөкүлэни биирдии гектарга, хортуоппуйу уон гектарга, онно эбии оҕурсуну, помидору, биэрэһи уо.д.а оҕуруот аһын хото үүннэрэр былааннаахтар. Арай, өскөтүн урукку өттүгэр хаһаайыстыба үлэһиттэрэ үлэлэрин кулун тутартан саҕалыыр эбит буоллахтарына, быйыл хаһааҥҥытааҕар да хойутаан — муус устар 1 күнүттэн саҕалаабыттар.

— Кэлин сылларга дьон декоративнай сибэккилэр араастарын сакаастыыр буоллулар, — диир хаһаайыстыба салайааччыта Климент Петров. — Ону таһынан дьиэтээҕи дьэдьэни, сугуну үүннэрэбит. Күн бүгүн бэһиэбит. Дьарыктаах буолуу киинин кытары 10-тан тахса сыл бииргэ үлэлэһэбит, онон үлэтэ суох дьон уонна сынньалаҥнарын кэмигэр үөрэнээччилэр кэлэн хамнаска үлэлииллэр. Сайыҥҥы өттүгэр үлэһит ахсаана 20-ҕэ тиийээччи.

Ыам ыйын 19 күнүгэр сылдьарбытыгар Марфа Павлова, Елизавета Яковлева уонна Альбина Готовцева өҥүрүк сайыҥҥы куйааһы санатар итии теплицаҕа рассадалары бэрийэн буһа-хата сылдьаллара. Тэрилтэлэригэр анал техникалаах буоланнар, рассадаларын, күһүҥҥү үүнүүнү нэһилиэктэри кэрийэ сылдьан атыылыыллар итиэннэ күһүнүн Павловскайдааҕы «Лена» АЭК-га туттараллар. Нэһилиэк аайы үүнүүнү «батарар» дьоннордоохтор эбит. Былырыын Чурапчы улууһугар, иллэрээ сыл, суоллара үчүгэй эрдэҕинэ, аммаларга илдьэн атыылаабыттар. Сиэмэлэрин Дьокуускайтан, Новосибирскайтан, Москваттан уруккуттан анал атыылаһар сирдэриттэн ылаллар. Тэрилтэҕэ тыа хаһаайыстыбатын салаатыгар үөрэнэр устудьуоннар практикаларын бараллар, сааһын, күһүнүн үөрэх кэмигэр үөрэнээччилэр көмөлөһөн субуотунньуктууллар эбит.

— Техникаларбыт эргэрдилэр, онон инникитин улахан кыамталаах аныгы техникалары ыларга, күрүөнү-хаһааны тупсарынарга, онтон да атын хайысхаларга үлэлэһэргэ баҕа санаалаахпыт, — диэтэ Климент Климентович. — Ол курдук, сүөһү эбии аһылыгын үүннэриигэ ылсан үлэлиир былааннаахпыт, — диир кини.

Бу күннэргэ кинилэр улуус олохтоохторугар сибэкки рассадатын 20 солкуобайтан, оҕуруот аһын 25 солкуобайтан саҕалаан атыылыыллар.

СИА.