18 августа 2017 в 15:12

Норуот дьокутааттара учууталлар мунньахтарыгар кытыннылар

Ил Түмэн депутаттара Антонина Григорьева, Евгения Михайлова уонна Ирина Подмазкова үөрэх, наука тэрилтэтин үлэһиттэрин атырдьах ыйыгар ыытыллар мунньахтарыгар кыттыыны ыллылар. Быйылгы мунньах “Үөрэх систиэмэтэ сайдыыта: сүрүн хайысхалар уонна иитии үлэтин саҥардыы” диэн буолла.

Мунньах кыттыылаахтарын өрөспүүбүлүкэ баһылыга Егор Борисов эҕэрдэлээтэ. Кини үөрэх үлэһиттэрин сүрүн соруктарынан аныгы үйэ ирдэбилигэр эппиэттиир бастыҥҥа дьулуһар ыччаты иитэн таһаарыы буолар диэн бэлиэтээтэ. “Педагог үөрэнээччитэ үрдүк ситиһиилэрдээх буоларын курдук киэҥ билиилээх буоларын ситиһиэхтээх. Ону таһынан үөрэтэр оҕото дьоҥҥо амарах сыһыаннаах, үтүө санаалаах буоларыгар кыһаллыахтаах”, — диэтэ.

Егор Борисов “2012-2019 сс. Саха өрөспүүбүлүкэтин үөрэҕин систиэмэтин сайдыыта” диэн судаарыстыбаннай бырагыраамаҕа 2017 сылга бүддьүөккэ 29 млрд. 919 мөл. солк. көрүллүбүтүн, саҥа оскуолалар, оҕо саадтара тутуллалларынан көрүллүбүт үп көдьүүстээхтик туһаныллыахтааҕын туһунан эттэ.
Ил Дархан үөрэх систиэмэтин сайыннарыыга сүрүн соруктары тоһоҕолоон бэлиэтээтэ. Оҕолору үөрэтии уонна иитии Стратегия-2030 докумуонугар бэлиэтэнэрин, бастакы кирбиигэ Саха сирин оҕолорун уонна ыччатын иитиитин концепциятын оҥоруу тахсарын эттэ.
Уһулуччу талааннаах оҕолору өйүүр сыалтан быйыл от ыйыгар “СӨ талааннаах оҕолору өйүүр миэрэлэрин туһунан” диэн өрөспүүбүлүкэ баһылыгын ыйааҕа тахсыбыт. Билигин 2017 сыл бүтүөр диэри “2018-2023 сс. Саха сирин уһулуччу талааннаах оҕолоро” диэн комплекснай бырагыраама оҥоһуллара соруктанар. Бу үлэ көдьүүстээх буоларын туһугар “Ил Дархан” диэн үөрэх тэрилтэлэрин тиһигэ тэриллиэҕэ. Бу тиһик наукаҕа, техникаҕа, култуураҕа, искусствоҕа, спортка ситиһиилээх оҕолору кытта үлэлэһиэҕэ. Сүрүн түмэр тэрилтэнэн СӨ наукатын аччыгый академията буолуоҕа. Саха сиригэр Норуоттар икки ардыларынааҕы арктическай оскуола үлэлиэҕэ. Технопаркалаах “Арктика оҕолоро” норуоттар икки ардыларынааҕы киин уонна талааннаах оҕолору өйүүр фонда тэриллибит.