«Новай» сопхуос: промышленность уонна тыа хаһаайыстыбатын бииргэ үлэлээһинэ

Арыылаах бөһүөлэгэр 2,5 тыһ. кэриҥэ киһи олорор. Олохтоох дьон үгүстэрэ сопхуос оҥорон таһаарар эбийиэктэригэр үлэлииллэр. Ил Түмэн депутата, сопхуос дириэктэрэ Василий Потапов этэринэн, көмө хаһаайыстыба “Ленскэй” сопхуос Новинскай отделениетын базатыгар “Якуталмаз” алын сүһүөх тэрилтэтин быһыытынан 1960 сыллаахха олунньу ыйга тэриллибитэ. Көмө хаһаайыстыба састаабыгар үс нэһилиэн­ньэ­лээх пуун киирэр: Арыы­лаах бөһүөлэгэ – хаһаайыстыба үүтү, эти, сымыыты, оҕуруот аһын, сүөһү аһылыгын оҥорон таһаарар сүрүн салаата; 2 №-дээх Сүлдьүкээр уонна 3 №-дээх Таас Үрэх салаалара – ыччат сүөһүнү, сылгыны иитиинэн, сүөһү дороххой аһылыгын бэлэмнээһининэн дьарыктаналлар. Көмө хаһаа­йыстыба сүрүн сыала – барыс ылыыта буолбакка, Мииринэй нэһилиэнньэтин, алмааһы хостуур комплекс үлэһиттэрин тыа хаһаайыстыбатын бородууксуйатынан толору уонна хаачыстыбалаахтык хааччыйыы.
Билиҥҥи кэмҥэ, сатабыллаах салалталаах буолан, сопхуоска хаачыстыбалаах үүт, эт бородууксуйатын араас көрүҥүн оҥорон таһаарыыга бары усулуобуйа олохтонно. Бородууксуйаны Сунтаарга, Ленскэйгэ эмиэ батараллар. Сопхуос 1200-тэн тахса ынах сүөһүлээх, 560 ыанар ынахтаах, сылгыны уонна көтөрү иитиинэн дьарыктанар.
Хампаанньа өйүүр буолан, бу сопхуос бүгүҥҥү күҥҥэ тиргиччи үлэлиирин, атыттарга холобур буолар кыахтааҕын Ил Түмэн депутаттара көрдүлэр. Хотоннорго, көтөр фабрикатыгар, ас комбинатыгар үлэлэригэр ис сүрэхтэриттэн бэриниилээх дьон үлэлиирин бэлиэтээтилэр. Манна хамнас орто кээмэйэ 50 тыһ. солк. тэҥнэһэр. Анатолий Добрянцев этэринэн, делегация чилиэннэрэ сопхуос хаһаайыстыбата алмаас хампаанньатын муударай салалтатынан үүнэ-сайда турарын көрөн астыннылар. «Бу сопхуос биһиги аграрниктарбытыгар холобур буолуох тустаах. Өрөспүүбүлүкэ тыа хаһаайыстыбатынан дьарыктанар тэрилтэлэрэ маннык өйөбүлэ суох үлэлииллэрэ олус уустук», — диэтэ кини.

Елена Иванова.