694
30 октября 2015 в 15:27
Ньурбаҕа — Бомбардиер Даш Q300
Бомбардиер Даш Q300 көтөр аал Ньурбаҕа сырыыта саҕаланар. «Якутия» авиакомпания сөмөлүөтүн пааркатын саҥа «бомбардиердарынан» хаҥаппыта. Былаан быһыытынан бу көтөр ааллар АН-24 сөмөлүөттэри солбуйуохтаахтар.
Бу сааскыттан саҕалаан саҥа сөмөлүөт тургутан көрүүнү ааста, улуус аэропортарыгар хас да техническэй рейси оҥордо. Ол эбэтэр, сөмөлүөт экипаһа улуус аэропортарын балаһаларын, радиотехническэй сибээстэрин бэрэбиэркэлээтэ уонна да атын техническэй ирдэбиллэргэ аэропортар төһө эппиэттииллэрин кэтээн көрдүлэр. Биир маҥнайгынан «Бомбардиер» Ньурба аэропордугар техническэй рейси оҥорбута, ол түмүгүнэн анал хамыыһыйа быһаарыытынан бу көтөр аал Дьокуускай-Ньурба икки ардыгар дьону таһарга сөптөөҕүн быһаардылар. Бу күннэргэ пассажирдары тиэйбит «Бомбардиер Даш Q300» Ньурба аэропордугар түстэ.
Роман Савинов, СИА.
