Оскуолаҕа биэс күннээх үөрэҕи ылымматылар

«Үөрэхтээһин туһунан» сокуоҥҥа көннөрүүлэр ааптардара бэлиэтээбиттэринэн, кэнники кэмҥэ араас, ол иһигэр дьарҕа ыарыылаах оҕолор ахсааннара элбээн эрэрэ көстөр. Үгүс үөрэнээччилэр ноҕуруускаланан, уйулҕаларын үлэтэ кэһиллэр, үлэлиир кыахтара, болҕомтолоро мөлтүүр, бытааннык толкуйдууллар. Специалистар кэтээн көрбүттэринэн, аһара ноҕуруускаланалларыттан сылтаан оскуолаҕа алын кылаас оҕолоругар ньиэрбэлэрин үлэтэ кэһиллэр. Ол мэйиилэрэ сылайыытыттан уонна ону сэргэ уйулҕалара мэлдьи тыҥыырыттан, эппиэтинэстэрэ улаатыытыттан, эт-хаан өттүнэн эстиилэриттэн-быстыыларыттан тахсар эбит. Сынньаналларыгар сөптөөх бириэмэ суоҕа үөрэнээччилэр физическэй уонна психологическай туруктарыгар дьайар, ону кытта үөрэх процеһыгар интэриэстэрэ сыппааһыныгар тиэрдиэн сөп эбит.

«Үөрэхтээһин туһунан» сокуон үөрэх нэдиэлэтин кэмин оскуолалар бэйэлэрэ быһааралларыгар быраабы биэрэр. Госдума үөрэххэ кэмитиэтин бэрэссэдээтэлин солбуйааччы Виктор Шудегов этэринэн, Калуга, Белгород, Саратов уобаластарыгар уонна сорох регионнарга оскуолалар бары биэс күннээх үөрэххэ көспүттэр. Биэс күҥҥэ үөрэтэр оскуолаларга үөрэх хаачыстыбата үрдүгүн туһунан депутат бэлиэтээтэ.

Санкт-Петербург сокуону оҥорор мунньаҕын депутаттара сатаатар алын кылаас үөрэнээччилэригэр алта күннээх үөрэҕи боборго этии киллэрбиттэрэ. «Үөрэхтээһин личность сайдыытыгар көмөлөһүөхтээх, үөрэх программатын муҥутуур көдьүүстээхтик баһылааһыны хааччыйыахтаах, үөрэнээччилэр доруобуйаларыгар буортуну аҕалыа суохтаах», – диэн сокуон барылын быһаарыы суругар этиллэр.

«Биһиги «Үөрэхтээһин туһунан» саҥа сокуону ылынар кэммитигэр үөрэх тэрилтэлэрин бырааптарын кэҥэтии туһунан эппиппит, – диэн бэлиэтээтэ Госдума үөрэххэ кэмитиэтин бэрэссэдээтэлин солбуйааччы, «единоросс» Надежда Шайденко. — Ол аата хас биирдии оскуола төрөппүттэр уонна үөрэнээччилэр сэбиэттэрин кытта үлэ нэдиэлэтин уһунун быһаарар бырааптаах».

Аныгы СанПиннар, кини этэринэн, бастакы кылаас үөрэнээччилэриттэн ураты, алта күннээх үөрэх нэдиэлэтин көҥүллүүллэр. Үөрэх кэмитиэтэ уонна «Биир ньыгыл Россия» биэс күннээх үөрэҕи киллэрии туһунан сокуон барылларын утардылар. Икки сокуон барыла баһыйар үгүс куолаһынан бастакы ааҕыыга ылыллыбата.

«Парламентская газета» ыам ыйын 12 к. таһаарыыта.