1206
03 июля 2015 в 09:33
От ыйын 2 күнэ — Өлүөнэ өрүс күнэ
Санатан эттэххэ, 2013 сылга өрөспүүбүлүкэ баһылыга Егор Борисов Өлүөнэ өрүс айылҕатын ураты көстүүлэрин харыстааһыҥҥа нэһилиэнньэ болҕомтотун тардар, Өлүөнэ өрүс уобараһын төрүтүгэр национальнай бренд үөскэтэр, экологическай туризмы сайыннарар сыалтан от ыйын 2 күнүгэр Саха сиригэр Өлүөнэ өрүс күнүн олохтуур туһунан ыйаахха илии баттаабыта.
Быйыл улуу өрүс күнүгэр аналлаах тэрээһиннэр: биэрэк чэрчитин ыраастааһыҥҥа, тупсарыыга үлэлэр, семинардар, «төгүрүк остуоллар», куонкурустар былааннаммыттара.
Айылҕа министиэристибэтин сүбэлээһининэн өрүс бассейныгар олохтоох муниципальнай тэриллиилэр, хаһаайыстыбаннай тэрилтэлэр бу датаҕа анаммыт декаданы ыыталлар. Сири-уоту ыраастааһыны таһынан араас сырдатар тэрээһиннэр барыахтара.
Министиэристибэ бу күҥҥэ нэһилиэнньэни Өлүөнэ өрүс уонна кини салааларын уутун хаачыстыбатын кэтээн чинчийии акциятыгар нэһилиэнньэни тардар, уу сокуоннарын кэһиини булан ылыыга «Автомойщик» рейдэлэри уо.д.а. хонтуруоллуур тэрээһиннэри айылҕаны туһанар тэрилтэлэри кытта ыытар. Айылҕа ураты харыстанар сирдэригэр туристар сынньанар зоналарын тупсарыыга тэрээһиннэр былааннаммыттара.
От ыйын 2 күнүгэр министиэристибэ федеральнай айылҕаны харыстыыр уорганнары кытта «Уу ресурсаларын туһаныы уонна харыстааһын эйгэтигэр РФ сокуоннарын ирдэбиллэрэ» диэн темаҕа семинар ыытар.
Библиотекаларга уонна музейдарга «Өлүөнэ өрүс – Саха сирин киэн туттуута!» быыстапкалар тэрилиннилэр.
«Өлүөнэ очуостара» айылҕа паарката «Хаҥалас улууһа» муниципальнай тэриллиини кытта бэс ыйын 30 к. «Улуу өрүс – ыраас биэрэктэр» диэн улуус сиригэр биэрэк балаһатыгар санитарнай ыраастааһыҥҥа иккис экологическай марафону ыытта. От ыйын 2 к. Өлүөнэ очуостарын сиригэр-уотугар «Маҥан хараабыллар – эрэл бэлиэтэ» промо-акция ыытылынна. Бу тэрээһин Өлүөнэ өрүһү ЮНЕСКО Аан дойдутааҕы нэһилиэстибэтин испииһэгэр киллэрии күнүгэр ананар.
От ыйын 3 к. Айылҕа харыстабылын министиэристибэтигэр Өлүөнэ экологическай туругун боппуруостарыгар коллегия буолуоҕа.
