Пааркаҕа сынньалаҥы хармаан уйунар дуо?

Ордук бырааһынньык, өрөбүл күннэргэ дьон дьиэҕэ олорон тэһийбэккэ куорат устун күүлэйдиэн баҕарар. Куораппытыгар киһи дьиэ кэргэнинэн сынньанар сирэ, хомойуох иһин, тарбахха баттанар. Дьон кыһалҕатын чугастык ылынан, култуура уонна сынньалаҥ пааркатыгар сыана туругун билэр сыаллаах бара сырыттым.

Кырдьык, элбэх оҕолоох, кыаммат ыал астына-дуоһуйа сынньаммат сирэ эбит. Арай “халыҥ хармааннаахтарга” сөптөөх сынньалаҥ буолсу. Ас-үөл, утах, шашлык, хот-дог, саахардаах баата арааһа анал киоскаларга оҕолору умсугутардыы кэчигирэспиттэр. Утах сыаната миигин олус дьиксиннэрдэ: 0,5 л гаастаах, гааһа суох утахтар, квас, “Lipton” чэй 100 солк., итии чэй – 25 солк., кофе – 35 солк., 0,33 л натуральнай утах – 50 солк., “Фруто Няня” оҕо уута – 60 солк., 1 л натуральнай утах – 150 солк. Бу туох үлүгэр сыанатай, кырдьык?! Оҕоҕун кытта күүлэйдии кэлэргэр бэйэҥ утаххын укта сылдьар ордук эбит. Пааркаҕа киирдиҥ да аан айаҕыттан саҕалаан ыскамыайкаларга хот-дог сии олорор дьон харахха быраҕыллаллар. Хот-дог “биир сосискалаах”, “икки сосискалаах” диэн араастаах: “биир сосискалаах” – 150 солк., “икки сосискалаах” – 200 солк. Холобур, үс оҕолоох дьиэ кэргэн пааркаҕа сынньана кэлэн баран хот-дог сииллэригэр бүтүн 1000 солк. барар. Ону таһынан оҕолор сөбүлээн сиир араас амтаннаах саахардаах бааталара 100 солк., минньигэс попкорн эмиэ 100 солк тэҥнэспит.

Паарка тас көстүүтэ, ис оҥоһуута урукку сыллардааҕар биллэ тупсубутун дьон-сэргэ бэлиэтии көрбүтэ буолуо. Оонньуур аттракционнар ахсааннара сыл аайы элбээн иһэр, туруктара саҥардыллар. Быйыл пааркаҕа аттракцион отучча көрүҥэ үлэлиир эбит. “Калипсо”, “Юнга”, “Воздушные пушки”, “Кенгуру”, “Прыгающая звезда”, “Детская площадка”, “Гусеница”, “Звездолет”, “Ветерок” автопоезд, “Ассорти”, “Хип-хоп”, “Колокольчик”, “Детская железная дорога”, “Солнышко”, “Миник”, “Бамперные лодки”, “Фараон”, “Пиратский корабль” уо.д.а. дьэрэкээн көстүүлээх аттракционнар, ыстанар батуттар, каруселлэр бааллар. Мантан сорохторо үлэлэрин саҕалыы иликтэр. Быйыл саҥа туруоруллубут “Фараон” аттракциоҥҥа үс мүнүүтэ хатааһылыыргар 150 солк. төлүүр эбиккин.

Арыый түгэх кырачааннар ытаһар саҥаларын истэммин, ол диэки туһаайан хаамтым. Тиийэн көрбүтүм, кып-кыра оонньуур массыыналар тула саҥа хаампыт биирдээх-иккилээх оҕолор мустубуттар. Бу массыыналарга биэс мүнүүтэ хатааһылааһын иһин манньата 100 солк эбит. Дьэ, онно ытаһыы-соҥоһуу буолбут. Биирдэ хатааһылаан баран, сөп буолаахтаабакка, иккистээн олорсо сатыыр кырачааны дьоно бопсоллоруттан ытаан муҥнанар эбит. Массыыналар аттыларыгар анал оператор олорон бириэмэни кэтиир, биэс мүнүүтэ ааста да оҕону массыынаттан туруоран кэбиһэллэр.

Үөһэ ааттаммыт аттракционнар билиэттэрин сыаната, кырдьык даҕаны, олус үрдүк эбит: “Колесо обозрения” – 150 солк., “Калипсо” – 120 солк., “Юнга” (3 мүн.) – 70 солк., “Воздушные пушки” (2 мүн.) – 70 солк., “Кенгуру” (3 мүн.) – 100 солк., “Прыгающая звезда” – 100 солк., оҕо площадкатыгар киирэн оонньооһун (30 мүн.) – 70 солк., “Гусеница” (120 см үөһээ уҥуохтаах оҕолорго) – 100 солк., 120 см тиийбэт уҥуохтаах оҕолорго – 70 солк., “Звездолет” (3 мүн.) – 70 солк., “Ветерок” автопоеһынан айанныырга – 70-100 солк., “Ассорти” (3 мүн.) – 70 солк., “Хип-хоп” (2 мүн.) – 100 солк., “Колокольчик” (3 мүн.) – 70 солк., “Детская железная дорога” (2 эргиир иһин) – 70 солк., “Солнышко” (3 мүн.) – 70 солк., “Миник”- 70 солк., “Бамперные лодки” (5 мүн.) – 100 солк., “Фараон” (3 мүн.) – 150 солк., “Пиратский корабль” (3 мүн.) – 100 солк. Оҕолор барахсаттар биир чаас иһигэр бу аттракционнарга барытыгар хатааһылыахтарын баҕарыахтара… Ону уу харчынан ааҕан көрдөххө, сорох төрөппүт уйунар кыаҕа суоҕа буолуо…

Форумҥа биир киһи күрэстэһии суох буолан наадыйыы элбэҕин, куорат чугаһыгар альтернативнай паарка наадатын туһунан санаатын эппит. Кырдьык, куоракка хас да паарка баара буоллар, олохтоохтор абыраныа этилэр. Биир пааркабытыгар сайыҥҥы өттүгэр дьон-сэргэ элбээн, бэл аттракционнарга уочараттаах буолар.

Аны туран түөрт атахтаах доҕоргун пааркаҕа күүлэйдэтэр иһин ыстарааба 1000 солк. тэҥнэһэр эбит. Аныгы үйэҕэ сорох ыалга түөрт атахтаахтар дьиэ кэргэн чилиэнин курдуктар…

Онон, култуура уонна сынньалаҥ пааркатыгар “чараас хармааннаах” киһи сатаан дуоһуйа, үөрэ-көтө сынньаммат эбит. Кырачааннар манна сибиэһэй салгынынан тыына, хаама кэлбэттэрэ биллэр. Кинилэр хас биирдии аттракциоҥҥа хатааһылаан, боруобалаан көрүөхтэрин баҕараллара чуолкай. Таах оҕолору ымсыырдан, ытатан барыахтааҕар үктэммэтэх ордук быһыылаах. Дьон кыһалҕатын чугастык ылынан, пааркаҕа сыана туругун хонтуруоллууллара буоллар…

Мария ПАВЛОВА.