Үрдүк үөрэҕи бүтэрээччилэр көрсөр ыарахаттара

Евгений Соров, бастатан туран, киин вузтары бүтэрээччилэри үлэҕэ олохтооһуҥҥа үс өрүттээх дуогабардары толорууну өрөспүүбүлүкэ былаастара ураты хонтуруолга ылалларыгар этии оҥордо. Биллэр-көстөр М.И.Губкин аатынан Россиятааҕы ньиэп уонна гаас судаарыстыбаннай университетын выпускнига буолан, Евгений үөрэҕин бүтэрэригэр киниэхэ үлэ миэстэтэ хааччылларыгар саарбахтаабат этэ. Ол эрээри дьыалатыгар кэлэн, кини үлэҕэ киириэхтээх тэрилтэтигэр вакансия суох этэ. Онон үлэни бэйэтэ буларга күһэллибитэ.
«Үлэ көрдүүрбэр көрсүбүт өссө биир кыһалҕам – бу Дьокуускайга ньиэп, гаас хампаанньаларын каадырга отделлара суоҕа. Оччолорго Саха сиригэр номнуо «Сургутнефтегаз» ААУо, «Транснефть-Восток» ХЭТ, «Газпром» ААУо үлэлиир этилэр. Саха сиригэр үлэлиир промышленнай тэрилтэлэр каадырга отделлара өрөспүүбүлүкэҕэ баар буолуохтаахтар диэн ааҕабын, – диэн этии киллэрдэ кини. – Мин Дьокуускайга «Сургутнефтегаз» ААУо бэрэстэбиитэлистибэтиттэн рекомендация ылан Сургутка бэйэм харчым суотугар барбытым. Хампаанньаҕа үлэҕэ киирбиппин кэннэ айаным төлөбүрүн толуйбуттара».
«Үһүс проблема олорор дьиэҕэ үөскээбитэ. Бу кэмҥэ мин Дьокуускайга пропискалаах этим, ол эрэн Сургутка булгуччу көһүөхтээҕим туһунан хампаанньаҕа эппиттэрэ. Ити түмүгэр сири чинчийэн үүттүүр салааҕа бурильщик көмөлөһөөччүтүнэн үлэбин саҕалаан, үс сыл үлэлээбитим. Ол кэнниттэн, төрөөбүт өрөспүүбүлүкэбэр туһалыыр эбээһинэстээхпин диэн, Саха сиригэр Таалакааҥҥа үлэлииргэ быһаарыммытым. Маныаха Сургуттан Таалакааҥҥа көтөр этим. Ол эбэтэр Таалакааҥҥа үлэлиир эрээри, Дьокуускайга дьиэбэр кэлэр кыаҕым суоҕа. Онон уоппускам кэмигэр сылга биирдэ эрэ чугас дьоммун кытта көрсөр кыахтааҕым. Итинник вахта ньыматынан икки сыл үлэлээн баран, Мииринэйгэ көспүтүм», — диэн кэпсээтэ Евгений.
Кини Мииринэйгэ үлэлиир кэмигэр онно баар политехническай институкка преподавателинэн, ону сэргэ Мииринэйдээҕи региональнай технологическай колледжка хос үлэ булбут. «Преподавателинэн үлэбин саҕалыырбар устудьуоннарга анаан производственнай практика тэриллибэтин бэлиэтии көрбүтүм. Кинилэр салгыы ханна үлэлиэхтээхтэрин, тугунан дьарыктаныахтаахтарын туһунан өйдөбүллэрэ суоҕа. Онон бэйэм начальникпын кытта Сургутка тиийэн, «Сургутнефтегаз» ААУо алын сүһүөх тэрилтэлэригэр студеннары практикаҕа ылалларыгар дуогабардаспытым. Сөбүлэҥнэрин биэрэн, 2012 сылтан саҕалаан Мииринэйдээҕи политехническай институт студеннара Таалакааҥҥа практиканы барар буолбуттара. Онно практикаҕа тиийбит студеннар промышленность диэн тугун илэ харахтарынан көрөллөр диэн санаалаахпын. Мин бэйэм промышленноска чуолаан итинник тардыллыбытым. Производствоҕа практиканы барбыттарын кэннэ студеннар үөрэхтэригэр ситиһиилэрэ уонна билиилэрин хаачыстыбата үрдээбитэ», — диэтэ Евгений Соров. Кини бастакы уочаратынан оҥорон таһаарыыга үрдүк уонна орто анал үөрэх тэрилтэлэрин преподавателлэрэ сылдьыахтаахтарын эттэ. «Теория диэн биирэ, оттон практика – бу олох атын», – диэн бэлиэтээтэ кини.

Бүгүн эдэр специалист «ЯТЭК» ААУо-ҕа үлэлиир. Бэйэтин холобурунан, олоххо актыыбынай сыһыанынан кини биир киһи тугу ситиһэр кыахтааҕын көрдөрбүтэ – бүтүн институкка практика туһунан дуогабардаспыта. Мииринэйгэ парламент көһө сылдьар истиилэрин уонна Аллараа Бэстээххэ мунньах үгүс кыттыылаахтара политехническай үрдүк уонна орто анал үөрэх тэрилтэлэрин студеннара булгуччу производствоҕа практиканы барыахтаахтарын бэлиэтээбиттэрэ. Ол курдук, Ил Түмэн сис кэмитиэтин бэрэссэдээтэлэ Юрий Николаев, бэйэтин кэмигэр «Якутскэнерго» АХ Е.Н.Батенчук аатынан Бүлүүтээҕи ГЭС Каскадын директорынан, «АЛРОСА» АХ (ПАО) Мииринэйдээҕи ГОК-тын директорын солбуйааччынан үлэлээбит буолан, биир тэрилтэҕэ производственнай практиканы барыы үлэҕэ киириигэ суолталааҕын бэлиэтээтэ. Практика сылларыгар хампаанньа үлэһиттэрэ студены кэтээн көрөллөрүн парламентарий эттэ. «Биир тэрилтэҕэ практикаланан, студент оҥорон таһаарыыга араас таһымнаах үлэни билэр-көрөр. Тэрилтэ эмиэ кинини кэтээн көрөр, хас биирдии учаастак начальнига, маастар кэнэҕэски үлэһиттэрин талан ылар. Үөрэҕин бүтэрэригэр маннык студент үлэҕэ киириитэ 100% мэктиэлэнэр», — диэтэ кини.

Ил Түмэн пресс-сулууспатын, о.д.а. матырыйаалларынан Елена БАИШЕВА бэлэмнээтэ.