Саха сиригэр — 400 анал миэстэ

Үөрэххэ ылар хампаанньа икки түһүмэҕинэн барар. Бастакыта – регионнааҕы олимпиада көрүҥүнэн номнуо кулун тутарга буолан ааспыта. Ол түмүктэринэн үөрэххэ киирэллэригэр оскуоланы бүтэрээччи 600 оҕоҕо сүбэлэммитэ. Оттон быйыл уопсай үөрэх тэрилтэлэрин барыта 8,5 тыһыынча киһи бүтэрдэ. Үөрэххэ докумуоннары тутар хамыыһыйа үлэтэ өрөспүүбүлүкэ сүрүн үрдүк үөрэҕин тэрилтэтигэр – ХИФУ-ка саҕаланна.
Оскуоланы бүтэрээччилэр бу күн­нэргэ кэнэҕэски идэлэрин талалларыгар бүтэһиктээх быһаарыыны ылынар кэмнэрэ үүннэ. Кэлим биир эксээмэни туттарбыт оҕолор докумуоннарын илдьэ хамыыһыйаларга тиэтэйдилэр.
ХИФУ-ка хамыыһыйа бэс ыйын 19 күнүттэн үлэлээтэ. Бүгүҥҥү күҥҥэ (от ыйын 3 к.) 500-тэн тахса сайабылыанньа бэрилиннэ. Докумуоннары үгүстэр инженернэй-техническэй институкка, математика уонна информатика институтугар биэрэллэр. Химияҕа, омук тылыгар уонна историяҕа эксээмэннэр түмүктэрин иһитиннэрии кэнниттэн абитуриеннар ахсааннара хойдуоҕа.
Россия үрдүк үөрэҕин тэрилтэлэ­ригэр өрөспүүбүлүкэтээҕи туттарсар хампаанньа бэс ыйын 26 күнүгэр саҕаламмыта уонна от ыйын 5 күнүгэр диэри үлэлиир. Киин вузтарга үөрэххэ ылыы хампаанньата икки түһүмэхтээх. Бастакыта – регионнааҕы олимпиада көрүҥүнэн кулун тутарга буолбута. Ол түмүгэр 600 эдэр дьон үөрэххэ киирэллэригэр сүбэлэммитэ. Ордук биһирэнэр туһаайыыларынан техническэй уонна технологическай эйгэлэр буолаллар.
БКЭ түмүктэрин иһитиннэрии уонна дипломнары ылыы кэнниттэн элбэх абитуриеннары ДьТХГА күүтэллэр. Манна оскуоланы уонна орто анал үөрэх тэрилтэлэрин бүтэрээччилэртэн докумуоннары ылыы бэс ыйын 20 к. саҕаламмыта. Бүгүҥҥү күҥҥэ 50-тан ордук сайабылыанньа киирдэ.
Бэлиэтээн эттэххэ, оскуоланы бүтэ­рээччилэртэн докумуоннары от ыйын 26 к. диэри ылыахтара, оттон орто профессиональнай үөрэҕи ылбыттартан – атырдьах ыйын 15 к. диэри.