Саҥа балааккаҕа үөрэх

Бастакынан урут үлэлии сылдьыбыт учууталы, Белолюбская Василиса Христофоровнаны, ыыттыбыт. Кини уонча хонукка тахсан, үлэни саҕалаан киирдэ. Мантан салгыы кини кэпсээнин истиэҕиҥ: – Ыстаадалар кыстыыр сирдэригэр Түбэ үрэҕэр саҥа көһөн кэлбиттэр. Урукку базалаах, дьиэлээх сирдэрин, таба аһа тэпсиллибитинэн, аҕыйаабытынан хаалларан, атын сиргэ кыстаары кэлбиттэр. Онон били үчүгэй баҕайы дьиэ туран хааллаҕа дии. Ол оннугар саҥа технологиянан тигиллибит, сабыс-саҥа, ичигэс балаакка биэрбиттэрин туруордубут. Саҥа учуутал кыыс тиийдэҕинэ, итиннэ олорон оҕолору үөрэтиэхтээх. Онон кини төһө ичигэһин билэн киириэҕэ. Сүрдээх киэҥ-куоҥ балаакка, 5х5 иэннээх. Сүүстээх буочуканан оҥоһуллубут тимир оһох кыра диэннэр, табаһыттар бэйэлэрин икки сүүстээх буочуканан оҥоһуллубут тимир оһохторун биэрэн туруортардылар.
Билигин мин үс оҕону – Никон Христофоровы (6 кылаас), Таня Матвееваны (8 кылаас), Валентин Степановы (3 кылаас) үөрэтэн киирдим. Икки дьиэ үлэһитэ оҕолорун Саҥа дьыл кэнниттэн илдьэ тахсыахтара, оччоҕо уонча оҕо буолуоҕа. Астара-үөллэрэ баар. Бензин кыайан булбакка, ол эрэ тиийэ илик. Оҕолор үөрэ-көтө үөрэнэллэр. Кинилэр үөрэнэр балааккаларын хомуйан туруорууга бырааттарым улаханнык көмөлөстүлэр. Матвеев Александр, түс-бас киһи диэх курдук, барыта киниэхэ эрэ баар. Тоһоҕотун, өтүйэтин, туттар тэрилин барытын илдьэ сылдьар эбит. Көс оскуола бастакы выпускнига – Семен Степанов, билигин бэйэтэ үөрэнэр оҕолордоох төрөппүт, Саҥа дьыл кэнниттэн оҕолорун таһаараары, эргэ базаттан хаптаһын тиэйэн, итиччэ улахан, аны бэлэм каркаһа суох балаакканы туруордулар. Табаһыт Андрей Иванов көмөтө эмиэ улахан. Онон кылгас кэмҥэ элбэх үлэни көрүстүлэр уонна көс оскуола үлэлиир усулуобуйатын оҥордулар. Онон бырааттарбар махтал, – диэн кэпсээнин түмүктээтэ.
Ити Василиса Христофоровна кэпсиир балааккатын Интернеккэ көрөн, Нерюнгрига баар «Баай мас» фирматтан сакаастаабытым, төлөбүрүн оройуон дьаһалтата, баһылыкпыт Иванов А.С. уйуммута. Олох саҥа технологиянан тигилиннэ диэн реклама бөҕө этэ, ичигэс, тыал хоппот, ардахха тэстибэт диэн, ону ити боруобалаары сылдьабыт.
Түмүккэ, сүрдээх түбүктээх, ыарахан үлэбитин саҕаласпыт дьоммор В.Х.Белолюбскаяҕа, кини уолугар Олегка, ыстаада табаһыттарыгар истиҥ махталбын тиэрдэбин. Ыстаада биригэдьиирэ, эмиэ көс оскуола выпускнига Христофор Степановка, табаһыт Григорий Степановка, саҥа үлэлии кэлбит эдэр учууталбытын  Ульяна Христофорованы тэрийсэн илдьэ тахсыбыттарыгар эмиэ махтал. Эдэр дьон үлэлэрэ-хамнастара таһаарыылаах буоллун, доруобай буоллуннар диэн алгыы хааллыбыт.

К.В.Кириллова,
көс оскуола салайааччыта.

Хаартыскаҕа: көс оскуола үөрэнээччилэрэ Саҥа дьылга аналлаах пластилинынан оҥоһуктарын кытта.

СИА.