Сэгэриэм, кэрэҕин даҕаны!

Дьахтар   уонна      кэрэ   —  биир  өйдөбүлгэ

Сааскы сандал быраа­һынньыгы, киһи аймах кэрэ аҥаардарын күнүн көрсө Үөһээ Бүлүү Кэнтик нэһилиэгэр “Хотун Бүлүү” диэн бастакы өрөспүүбүлүкэтээҕи куонкурус  буолан ааста. Куонкурус Үөһээ Бүлүү култууратын уонна духуобунаһын киинин, Кэнтик нэһилиэгин дьаһалтатын өйөбүлүнэн ыытылынна. Тэрийээччинэн нэһилиэк библио­текатын сэбиэдиссэйэ Мария Ушницкая буолла.

“Дьахтар” уонна “кэрэ”  диэн тыллар тус-туспа буолбакка, булгуччу бииргэ туттуллуохтаахтар. Ханнык баҕарар дьахтар кэрэ буоларга кыһаллар, дьулуһар”,  — диэн Мария миигин кытта кэпсэтиитигэр санаатын эттэ.

Ол иһин кини иһигэр иитиэхтии сылдьыбыт санаатын олоххо киллэрэн, нэһилиэгэр дьахтарга кэрэни бэлэхтиир маастардарга өрөспүүбүлүкэ таһымнаах куонкурус тэрийбит.

Толбоннурар     суһуох, кэрэҕэ   угуйар таайтарыылаах  харахтар

Мария дьахтар кэрэ буо­луохтааҕын туһунан этэрэ, биллэн турар, урут-уруккуттан биллэн кэлбит суруллубатах быраабыла. Ол гынан баран, уһун кыһын кэнниттэн күн сардаҥатын саҥалыы харахпытынан көрөрбүт курдук, ол санаалар саҥалыы тыыннаналлар. Кини: “Дьахтар көстөр дьүһүнэ эҥкилэ суох буолуохтаах. Ол эбэтэр бүрүчүөскэтэ, сирэйин оҥостуута,  тыҥырахтара. Мин бу куонкуруһу туох сыалтан тэрийбитим туһунан этэр буоллахха, ордук тыа сиригэр олорор кэрэ аҥаардар бүрүчүөскэни, сирэйи, тыҥыраҕы оҥостууга киирэр саҥалыы ухханы билбэттэр. Оттон бу хайысхаҕа муода эмиэ хаппырыыс эбээт”,  — диэн кэпсиир.

Ол курдук , “Хотун Бүлүү” куонкурус үс хайысханан ыытыллыбыт. Парикмахердар, визажистар уонна тыҥырах оҥорооччулар арахсан бэйэ-бэйэлэрин кытта куоталаспыттар. Дьокуускайтан, Тааттаттан, Чурапчыттан, Сунтаартан, Ньурбаттан, Үөһээ Бүлүүттэн парикмахердар, визажистар, тыҥырах оҥорооччулар кэлбиттэр. Кинилэр үлэлэрин Арассыыйа таһымнаах күрэх –  “Ленские берега” кэрэ буолуу бэстибээлин араас сылларга кыайыылаахтара Валентина Варламова, Мария Сивцева, Ирина Ховрова, Ирина Дмитриева, Мария Дормидонтова сыаналаабыттар.

 Сатабылы  көрдөрүү

Маастардар сатабылларын көрдөрүүлэрэ хас да түһүмэҕинэн ааспыт. Билэргит курдук, идэтийбит баттах оҥорооччу биир хайысханан эрэ муҥурдаммат. Холобур, дьахтар баттаҕын эрэ кырыйарынан тохтообот. Онон дьүүллүүр хамыыһыйа кыттааччылары эр киһи баттаҕын кырыйыыга, дьахтар бырааһынньыктааҕы бүрүчүөскэтин оҥорууга уонна маастар бэйэтэ айан таһаарар (фантазийнай) бүрүчүөскэтигэр тургутан көрбүттэр. Оттон тыҥырах оҥорооччуларга кинилэр классическай (френч) уонна аквариум ньыманан тыҥыраҕы кырааскалыылларын сыаналаабыттар. Визажистарга эмиэ тыҥааһыннаах куоталаһыы буолбут. Визажистар киистэлэринэн, харандааһынан чэпчэкитик тарданнар, кыргыттар сэбэрэлэрэ саҥа тыллыбыт сибэккилии киэркэйбит.

“Көрөөччүлэр ордук маастардар фантазиялара тиийэринэн оҥорор уобарастарын көрдөрөр түһүмэхтэрин сэҥээрдилэр. Кинилэр моделлара киинэ геройдара да буолан ыллылар, баттахтара кэрэ сибэкки буолан тылынна, тыҥырахтара дьэп-дьэҥкир муора уутунуу долгуннурда. Маастардар киэргэппит моделлара култуура киинин сыанатыгар хааман көрдөрбүттэрэ, дьэ, ураты үчүгэй көстүү этэ!”,  — диэн Мария үөрэ-көтө кэпсиир.

Ол курдук, дьахтары кыра­һыабай оҥоруу эйгэтигэр саҥалыы технологиялар эмиэ киирэллэр. Биһиги билэрбитинэн, парикмахердар баттах лааҕынан эрэ тутталлар дии саныыбыт. Оттон бу курдук уустук бүрүчүөскэни оҥорорго элбэх сириэстибэни туһаналлар. Холобур, баттах пудрата, киһи баттаҕыттан оҥоһуллубут киэптэр (пастижи).

“Бу тэрээһин биир соругунан эдэр маастардарга экспердэр бэйэлэрин уопуттарын туһунан кэпсииллэрэ буолбута. Ол курдук, Арассыыйа таһымнаах куонкурус кыайыылаахтара кыттааччыларга маастар-кылаас көрдөрбүттэрэ. Маастардар олус астыммыттара. Аныгылыы технология көмөтүнэн баттах, сирэй тириитин, тыҥырах туругун тупсарыы туһунан элбэҕи билэн бардылар”,  — диэн Мария салгыы кэпсиир.

Кыайыылаахтар  кимнээхтэрий?

Парикмахердар күрэх­тэригэр эдэр маастардарга кыайыылааҕынан Дьо­куускайдааҕы сервиз техникумун устудьуона Ирина Николаева, оттон идэтийбит маастардарга Чурапчыттан сылдьар Ульяна Чупрова буолбуттар. Тыҥырах оҥорооччуларга Ньурбаттан эдэр маастар Жанна Иванова, идэтийбит маастардарга – Дьокуускайтан Татьяна Корякина кыайыылаахтар.

Визажистарга: эдэрдэргэ — Алена Ким, идэтийбит маастардарга  — Яна Федорова.

Аан дойду кэрэ аҥаардарын күнүгэр уонна сандал сааһы көрсө дьахтар аймах кэрэ буолар баҕата күүһүрэр. “Аан дойдуну кэрэ быыһыаҕа” диэн этии, төһө да хал буолбут этии курдугун иһин, олох ирдэбилэ. Сандал сааһы көрсө бары кэрэ буолуоҕуҥ!