588
24 марта 2017 в 11:14
«Сийиэскэ эрэнэр дьоммутун ыыттыбыт»
Уөһээ Дьааҥыттан сийиэскэ 20 делегат кэлээри оҥостор. «Сийиэскэ улуустан бэрэстэбиитэл быһыытынан барар дьону быыбардаан, үгүстүк ырытыһан таллыбыт. Бэйэлэрин тылларын тиэрдиэхтэрэ, атын дьокутааттар үлэлэрин уопутуттан элбэҕи ылыныахтара буоллаҕа», -- диэн үһүс ы ҥ ырыылаах улуус Сэбиэтин дьокутаата Екатерина Ноговицына санаатын үллэстэр.
Екатерина Васильевна улуустааҕы дьокутааттар Сэбиэттэрин социальнай политикаҕа хамыыһыйатын чилиэнэ, улуустааҕы култуура управлениетын начальнигынан үлэлиир. «Сийиэс буоларын истэн баран, ханнык боппуруостарынан ордук үлэлэһэрбитигэр бэйэбит бырагыраамабытын оҥостубуппут. Холобур, эдэр дьокутааттар үөрэх ыла түһэллэрин наадатыгар, уопут атастаһыахтара», — диэн этэр.
Ол курдук, дьокутаат кэпсээбитинэн, улууска баар сытыы суолталаах боппуруостарынан этии киллэрэрдии оҥостоллор. «Уөһээ Дьааҥыга туризм салаатын сайыннарарга турунабыт. Јрөспүүбүлүкэ биир саамай тымныы туочуката Саха сирин брендынан буолар. Суолбутун, инфраструктураны сайыннардахха эрэ, туризм сайдар кыахтаныаҕа. Онон бу хайысхаҕа туспа этиилээхпит», — диир Екатерина Васильевна.
Уөһэ Дьааҥыга биир үгүскэ киирбит тэрээһиҥҥэ дьокуттааттар көхтөөхтүк кыттыбыттар. «Соторутааҕыта улууспутугар Арктика форумун тэрийбиппит. Онно кыттааччылартан үгүс этиилэр киирбиттэрэ. Холобур, эдэр ыаллар, аҕалар түмсүүлэрин тэрийэн, үлэ ыытар курдук. Аны, эдэр дьонтон дьокутаат буолуон баҕалаахтар аҕыйахтар. Тоҕо диэтэххэ, үлэтин үчүгэйдик өйдөөбөттөр, билбэттэр. Ол иһин «Эдэр дьокутаат оскуолата» диэн өрөспүүбүлүкэҕэ кэмиттэн-кэмигэр тэрээһин ыытыллара буоллар», — диэн баҕа санаатын этэр.
Маны таһынан Екатерина улуустарын иһигэр парламентарий дьахталлар «төгүрүк остуолларын» тэрийэн, дьахтар оруолун үрдэтии туһунан кэпсэппиттэрин туһунан иһитиннэрдэ.
Екатерина Ноговицына — эдэр дьокутаат. «Эн эдэр сылдьан дьокутаат буолбут эбиккин. Тоҕо?» — диэн киниттэн ыйытабын. «Мин оҕо эрдэхпиттэн уопсастыба олоҕор көхтөөх этим. Дьокутаат дьон эрэнэр, кинилэр кыһалҕаларын быһаара сатыыр, интэриэстэрин көмүскүүр киһинэн буолар. Мин улууһум кэскилин туһугар ис сүрэхпиттэн долгуйар буолан, дьокутааттыырга санаммытым », — диир кини.
Екатерина Васильевна түмүгэр үөрүүлээх сонунун кэпсиир. «Биһиэхэ, үөһээ дьааҥыларга, биир үтүө сонун көтөн кэллэ. Учуутал идэлээх Акулина Трофимовна Стручкова Саха Јрөспүүбүлүкэтин Судаарыстыбаннай Мунньаҕын дьокутаата буолар мандааты тутта. Кини Кэбээйи-Уөһээ Дьааҥы уокуругуттан Ил Түмэн бэһис ыҥырыылаах дьокутаата Юрий Михайлов оннугар талылынна», — диэн кэпсээтэ.
