Өспөххө умнуллубат биир түгэн

Ити курдук спикер улуус биир саамай ыраах нэһилиэгэ хайдах олорорун, кытыы сир кыһалҕатын көрө-истэ кэлбититтэн дьон сэргэхсийдэ, КСК буолбут көрсүһүүгэ муһунна.

Александр Николаевич Өспөххө 25 миэстэлээх оҕо саадын таас дьиэтин тутуутун хаамыытын билистэ. Объект көҥдөйө, кырыыһата оҥоһуллубут, муостатын ититиитин 60 бырыһыанын бүтэрбиттэр. Билиҥҥитэ тутуу матырыйаалын тиэрдиини түргэтэтэр сорук турар. Бу боппуруос муостаттан иҥнэн турарын, ыарахан уйуктаах массыыналары кыайан аһардыбатын олохтоохтор этиннилэр. Көрсүһүүгэ кыттыбыт Уус Алдан улууһун баһылыга Алексей Федотов аукцион биллэриллэн, муостаны өрөмүөннүүр тэрилтэ быһаарыллыбытын, онон үлэ саҕаланыахтааҕын иһитиннэрдэ. Александр Николаевич таһаҕаһы сиринэн тиэрдиини сэргэ, ардах түһэр, суол алдьанар тµбэлтэтигэр, олорон хаалбат инниттэн, уунан аҕалыыны эмиэ толкуйдаан көрөллөрүн сүбэлээтэ. Олохтоохтор уһун сылларга ыра оҥостубут тутууларын сыл бүтүөр диэри үлэҕэ киллэрэр сорук турар. Итиэннэ бу объегы оҕо оонньуур былаґааккатынан ситэрэн биэ­рии боппуруоһун көтөхтүлэр.

Александр Жирков учаас­тактааҕы балыыһа капитальнай өрөмүөнµн кытта билистэ. Балыыһа дьиэтигэр өрөмүөн µлэтэ сүрүннээн бүппүтүн, бытархай өттүн ситэрэр хаалбытын, балаҕан ыйын ортото үлэлииргэ бэлэм буолуоҕун туһунан балыыһа сэбиэдиссэйэ Жанна Павлова иһитиннэрдэ. Эмчит киһи, оҕолор доруобуйаларыгар кыһаллар буолан, оскуола иккис куорпуһун тутуутун боппуруоһа түргэнник быһаарыллыан баҕарар. Спикер балыыһа өрөмүөнэ үчүгэйдик барбытын сыаналаата уонна коллектив бигэ туруктаахтык үлэлии олорорун бэлиэтээтэ. Улуустааҕы кииннэмит балыыһа салалтата Түүлээх уонна Өспөх балыыһаларын тэҥинэн биир күҥҥэ арыйан үлэлэтэргэ, онуоха диэри сөптөөх миэбэлинэн, оборудованиенан хааччыйыыны ситиһэрин туһунан боротокуолга сурулунна.

Өспөхтөр тыын боппуруос быһыытынан киин ититэр ситими күүһүрдэри туруорсаллар. Саҥа объект холбонуутугар уонна чааһынай дьиэлэргэ сылааһы биэриигэ ааспыт үйэ ортотутугар тутуллубут хочуолунай кыайан эппиэттээбэт. Александр Жирков Өспөххө СӨ Олох-дьаһах уонна энергетика министиэристибэтин мунньаҕын ыытарга этии киллэрдэ. Өспөх холобуругар маннык кытыы сытар дьоҕус нэһилиэктэргэ оттугунан хааччыйыы боппуруостарыгар кэпсэтии тахсыан сөп. Коммунальнай хаһаайыстыба улуустааҕы филиалыгар теплотрассаны ититиигэ үлэни ыытарга сорудах бэрилиннэ. Олохтоохтор маны сэргэ сэлиэнньэни уунан хааччыйыы боппуруоһун көтөхтүлэр.
Оскуола дириэктэрэ Иван Горохов ааспыт үөрэх дьылын 52 оҕо түмүктээбитин, 4 оҕо оскуоланы бүтэрэн үөрэххэ киирбитин, быйылгы үөрэх дьылыгар 46 оҕо үөрэниэхтээҕин билиһиннэрдэ. Каадырынан хааччыллыы быґыытынан 3 саҥа учуутал кэлбит, ол эрээри специалистары олордорго үчүгэй усулуобуйа суоҕунан, эдэр учууталлар уһаабакка, уларыйа-тэлэрийэ туралларын туґунан эттилэр.

Бүгүҥҥү күҥҥэ нэһилиэнньэ биир сүрүн туруорсуута – оскуола дьиэтин салҕааһынын тутуу. Сэлиэнньэ өрүс кытыытыгар турар буолан, урукку сылларга халааҥҥа ыллара сылдьыбыт кэмнэрдээҕэ. Икки мэндиэмэннээх эргэ оскуола дьиэтэ көтүрүллэн, саҥа оскуоланы уталыппакка тутар боппуруос турбута. Ол саҕана федеральнай бырагырааманан кэлбит үбү туһана сатаан суһаллык саҥа дьиэни тутан киллэрбиттэрэ. Инньэ гынан бу дьоҕус объект ханнык да надзор ирдэбилигэр эппиэттээбэт, кыараҕас уонна мөлтөх хаачыстыбалаахтык тутуллан, ардахха тэстэр, сиигирэр уонна тымныы. Ол иһин олохтоохтор таас да оскуолата туттарыахха, оччоҕо нэһилиэнньэ көһөн барыыта тохтуо, дьон олохсуйуо этэ эбэтэр билиҥҥи объегы кэІээн тутары эттилэр. Онон бу икки вариантан хайатыгар этии киллэрэргэ сүбэлээтилэр. Таас варианынан тутуу, биллэн турар, болдьоҕо тардыллан, уһуон сіп.
Көрсүһүүгэ нэһилиэнньэ санаатын сиһилии этиннэ. Александр Жирков олохтоохторго дойду, өрөспүүбүлүкэ үрдүнэн үөскээбит балаһыанньаны кэпсээтэ, нэһилиэнньэ олоҕун тупсарыы туһунан бу курдук салгыы кэпсэтэ, сүбэлэһэ, билсэ туруохпут диэн туран, ыраах сытар дьоҕус түөлбэлэр эстиэ суохтаахтарын, сайдыы барыахтааҕын туһунан бэлиэтээтэ, олохтоохторго түмсүүлээх, көхтөөх уонна этэҥҥэ буолууну баҕарда.

Түмүккэ, Александр Жирков Өспөх орто оскуолатын математикаҕа учуутала Саргылаана Неустроеваҕа Саха Өрөспүүбүлүкэтин үөрэхтээһинин сайдыытыгар үтүөлэрин иһин Саха Өрөспүүбүлүкэтин Ил Түмэнин Бочуотунай грамотатын, Өспөхтөөҕү ветеринарнай пуун фельдшерэ Маргарита Соловьеваҕа өр сыллаах кыһамньылаах үлэтин иһин Ил Түмэн Махтал суругун туттарда.

Саргылана ДАНИЛОВА.