Суррогатнай ийэ туһунан

Кэргэннии буолбатах эр киһи уонна дьахтар, ону тэҥэ соҕотох дьахтар суррогатнай ийэ көмөтүнэн төрөөбүт оҕоҕо төрөппүт быраабын ылыахтарын сөп.

Ити курдук аныгы репродуктивнай технологиялар көмөлөрүнэн төрөөбүт оҕо судаарыстыбаннай регистрациятын туһунан туһааннаах сокуон барылыгар Россия Бырабыыталыстыбатын сөбүлэҥэ миниистирдэр кабинеттарын сайтыгар таһаарылынна.

Бу докумуонунан Дьиэ кэргэн кодексыгар уонна “Гражданскай турук аакталарын туһунан” Федеральнай сокуоҥҥа уларытыылары киллэрэргэ этиллэр. Ол түмүгэр эр киһи уонна дьахтар регистрациянан холбоспуттарыттан тутулуга суох, ону сэргэ соҕотох дьахтар, өскөтүн кинилэр суррогатнай ийэ көмөтүгэр сөбүлэспит буоллахтарына, оҕо төрөөбүтүн туһунан кинигэҕэ кини төрөппүттэрин быһыытынан суруллар кыахтаналлар.

Оҕо төрөөбүтүн туһунан кинигэҕэ киллэриллибитин кэннэ аҕата уонна ийэтэ кимнээхтэрин саарбахтыыр түгэҥҥэ ити төрөппүттэргэ юридическай көмүскэли биэрэр.

Билигин Кодекс 51 ыстатыйатын быһыытынан, ыал буолбут уонна искусственнай ньыманан оҕолонууга, эбэтэр эмбриону имплантациялааһыҥҥа суругунан сөбүлэҥнэрин биэрбит дьон өҕө төрөөбүтүн туһунан кинигэҕэ төрөппүттэринэн суруллаллар.

Итинник быраабы ыал буолбут уонна эмбриону атын дьахтарга имплантациялыырга (оҕону төрөтөргө сөбүлэспит буоллаҕына) суругунан сөбүлэспит дьон ылаллар.

Онон саҥа сокуон барыла ыал буола илик уонна соҕотох дьахталларга төрөппүт быраабын тарҕатар.

Ол эрээри төрөппүттэр ыал буолбатах түгэннэригэр, оҕо ханнык аҕаттан төрөөбүтүн олохтуур наадатын миниистирдэр кабинеттара бэлиэтээбит.

Көҕүлээһин ааптара докумуоҥҥа баар терминнэргэ этиилэри учуоттаан, Госдумаҕа киллэриэх иннинэ сокуон барылын ситэрэригэр Бырабыыталыстыба сүбэлээтэ.

www.pnp.ru