Суруналыыстар Японияҕа сырыыларыттан

Японияҕа делегация састаабыгар «Кэскил», «Наш университет», улуус хаһыаттарын суруналыыстара, министиэристибэлэр, биэдэмистибэлэр, ХИФУ, «Сахатранснефтегаз» пресс-сулууспаларын бэрэстэбиитэллэрэ киирбиттэр.

Япония дириҥ култууратын, киһи аймахха инникилээн иһэр  технологиятын, кэрэ эйгэтин кытары билсиһиилэрин туһунан суруналыыстар көрсүһүүгэ кэпсээтилэр. Ол курдук, Император дыбарыаһыгар сылдьыбыттарын, Токио куоратын кэрийэн көрбүттэрин, национальнай таҥастарын кэтэн, оһуохайдаабыттарын кэпсээтилэр.
Биһиги дьоммутун ордук 13 мөл. тираһынан тахсар олохтоох «Асахи Сибун» диэн хаһыат уонна хаһыат бэчээттэнэн тахсар типографиятын үлэтин кытары билсиһиилэрэ сөхтөрбүт. Галина Бочкарева иһитиннэрбитинэн, Тулагы-Киллэмҥэ аһыллыбыт оҕуруот аһын сылы эргиччи үүннэрэр японскай теплица үлэтин кытта билсэ кэлэ сылдьыбыт «Асахи Сибун» анал корреспонденын кытары дуогабар түһэрсэн, Саха сирин суруналыыстара Токио биир саамай бөдөҥ редакциятыгар сылдьыбыттар.

«Биһиги делегациябыт икки чаас устата редакция үлэтин-дьаһаҕын көрдө-иһиттэ. Редакция 16 мэндиэмэннээх дьиэлээх,  сарайыгар бөртөлүөт былаһааккалаах. Суһаллык бэчээттэниэхтээх сонун баар буоллаҕына, суруналыыстар бөртөлүөккэ олороот, кыл түгэҥҥэ миэстэтигэр баар буолаллар уонна сонуну биэрэ охсоллор», — диэн Галина Бочкарева сөҕөн-махтайан кэпсээтэ.

«Асахи Симбун» японецтар биир киэн туттар хаһыаттарынан буолар эбит. Хаһыат сарсыарда 8 мөл., киэһэ 5 мөл.тираһынан тахсар. Редакция 40 дойдуга бэрэстэбиитэллээх, Москваҕа уонна Уһук Илиҥҥэ эмиэ хаһыат бэрэстэбиитэлэ үлэлииллэр. Тыһыынчаттан тахса киһи бу кумааҕы хаһыат тахсарыгар үлэлэһэр эбит.

Бу кэпсээннэрин истэ олорон японецтар дьиҥ чахчы муударай норуот буолалларын өйдүүгүн. Информационнай
технология балысханнаахтык сайдыбыт дойдутугар Интернетинэн информацияны тарҕатар ньымаларынан эрэ үлүһүйбэккэ, үгэстэрин умнубатахтара, эбиитин сайыннаран иһэллэрэ кэрэхсэтэр.

Суруналыыстар Япония олоҕун-дьаһаҕын кытары билсиһиилэрин түгэннэриттэн быһа тардан кэпсээтилэр. «Сахатранснефтегаз» пресс-сэкирэтээрэ Айталина Никифорова японецтар итэҕэллэрэ  күүстээҕин, ону сэргэ олус дириҥ философиялааҕын кэпсээтэ. «Кинилэр итэҕэллэринэн буддизм уонна синтоизм буолаллар. Мин сахалар итэҕэллэригэр ханан эрэ маарыҥнаттым. Ол курдук, кинилэр хас биирдии үүнээйилэригэр, тулалыыр эйгэлэригэр ураты харыстабыллаахтык сыһыаннаһаллар, тыыннаах ситим саҕаллар», — диэн этэр.

Эбээн-Бытантай оройуоннааҕы хаһыатын редактора Наталья Попова японецтар култууралара үрдүгэ бэрт буолан, төһө да тылларын билбэтэрбит, харахпытынан, туттуубутунан-хаптыыбытынан өйдөһө сырыттыбыт диэн сан
аатын эттэ.

Маннык ис хоһоонноох пресс-туур үтүө үгэскэ кубулуйара саарбахтаммат. Эһиил Монголия култууратын, кэрэхсэбиллээх сирдэрин, информацияны тарҕатар сириэстибэлэр үлэлэрин билсиһэр былаан баарын туһунан Галина Бочкарева иһитиннэрдэ.