678
14 августа 2017 в 11:26
Эрэллэригэр эрэл эбээри
Дьокуускай куорат Орджоникидзе болуоссатыгар атырдьах ыйын 9 күнүгэр Аан дойду аҕыйах ахсааннаах төрүт олохтоохторун күнэ уонна “Кочевье-2017” диэн үгэс национальнай бырааһынньык буолан аастылар.
Өрөспүүбүлүкэ аҕыйах ахсааннаах төрүт норуоттарын ассоциациятын президенэ Андрей Кривошапкин, вице-премьер Михаил Гуляев, Хоту сир аҕыйах ахсааннаах төрүт норуоттарын боппуруостарыгар уонна Арктика дьыалаларыгар Ил Түмэн сис кэмитиэтин бэрэссэдээтэлэ Елена Голомарева, гражданскай общества институтун сайыннарыы миниистирэ Сардана Гурьева бырааһынньыкка кэлбит дьону эҕэрдэлээтилэр.
Андрей Кривошапкин олохтоох былаас өтүттэн аҕыйах ахсааннаах төрүт хотугу норуоттарга болҕомтото улааппытын бэлиэтээтэ. Елена Голомарева өрөспүүбүлүкэбитигэр аҕыйах ахсааннаах төрүт норуоттар олохторун тупсарыыга туһаайыллыбыт 23 сокуон үлэлиирин иһитиннэрдэ. Норуот үгэс дьарыгын тэрийэр 59 территория сокуонунан харыстанарын, бу сир кэлэр көлүөнэҕэ туһалаах буолуоҕун эттэ.
Бу күн эвенк чулуу уолугар Иван Кульбертиновка пааматынньык туруорарга үп хомуйдулар. От ыйын 27 күнүттэн “Бары көмөлөһүөххэ” диэн халаан уутуттан эмсэҕэлээбит улуустарга гуманитарнай көмө оҥоһулларын, Атырдьах ыйын 19-20 күннэригэр “Туймаада” стадиоҥҥа национальнай общиналар күрэхтэһиилэрэ буоларын, онтон киирбит үп халаан уутуттун эмсэҕэлээччилэргэ ананарын туһунан иһитиннэрдилэр.
Бырааһынньыкка кэлбит дьон-сэргэ “Мир” шахта алдьархайыгар эмсэҕэлээбит шахтердары ис сүрэхтэриттэн өйүүллэрин биллэрэн, эрэллэригэр эрэл эбэр туһуттан флеш-моб тэрийдилэр.
