Техническэй идэни талбыт ыччаттар

Үрдүк үөрэхтээх специалист буолбут дьону үксүлэрин “Ханна үлэлии барабыный?” диэн ыйытык үүйэ-хаайа тутар. Сорох устудьуоннар үөрэх кэмигэр быраактыкаламмыт тэрилтэлэригэр дуогабардаһан үлэ миэстэтин түргэнник булаллар, сорохтор сылы-сыллаан көрдөнөллөр. Биллэн турар, дьон үрдүк хамнастаах, бастайааннай миэстэлээх үлэни көрдүүргэ дьулуһар. Гуманитарнай үөрэхтэри бүтэрбит дьон олох хайа баҕар эйгэтигэр бэйэлэрин миэстэлэрин булар кыахтаахтар дии саныыбын. Оттон техническэй үөрэхтээхтэр үлэ миэстэтин төһө булалларый? Быйыл университекка техническэй идэни ылар ыччаттартан салгыы ханна үлэлии баралларын, туох былааннаахтарын туһунан ыйыталастым.

Пахомов Ньургун Степанович, ХИФУ, ИТИ, ГСХ бөлөх устудьуона:
— Распределение диэн буолбута эрээри, билигин урукку курдук чопчу биир сиргэ үлэлии барарга анаабаттар. Үлэ миэстэтин бэйэҥ көрдөнөн булунаҕын. Университеппыт биһигини бу чааһыгар күүскэ өйүүр дии саныыбын. Ол курдук, саас государственнай эксээмэни туттарбыппыт кэннэ вакансия ярмарката ыытыллыбыта. Маннык ярмарка сыл аайы ыытыллар. Ярмаркаҕа үлэһиккэ наадыйар тэрилтэлэр кытталлар. Онно тиийэн үлэ көрдөнөр устудьуоннар резюме хаалларан, кылгастык кэпсэтэн да ааһар кыахтаахтар. Ордук хоту оройуоннарга үлэ миэстэтэ элбэх эбит дии санаатым. Ол эрээри, хоту үлэлии барыан баҕалаах ыччат ахсаана аҕыйах. Бары киин сиргэ хааларга талаһаллар. Мин тус бэйэм үлэ миэстэтин күн бүгүнүгэр диэри була иликпин. “Көрдөөбүт көмүһү булар” диэн бэргэн этии баар. Онон эрэлбин сүтэрбэппин, бэйэбэр сөптөөх үлэ миэстэтин булуом диэн эрэнэбин. Билигин дьупулуоммутун көмүскүүр аймалҕаҥҥа сылдьабыт. Дьупулуоммун көмүскэнним да, куоракка хаалан көрдөнөр былааннаахпын. Мин идэм – “Городское строительство и хозяйство” диэн, онон тутуу эйгэтигэр үлэлиэхтээхпин. Туох барыта кыраттан саҕаланар, онон бастаан кыра да үлэттэн саҕалыырга бэлэммин. Ыарахаттар хаһан баҕар, ханна баҕар бааллар, ону ол диэбэккэ, кыах баарынан иннин диэки баран иһиэххэ наада.

Аммосова Мария Семеновна, ХИФУ, ФТИ, ЭС бөлөх устудьуона:
— Мин идэбинэн инженер-электрикпин. Дьупулуоммун этэҥҥэ көмүскээн олохпун оҥостор былааннаахпын. Үлэ көрдөөһүнүгэр улахан ыарахаттары көрсүбэтим. “Якутскэнерго” тэрилтэни кытта дуогабар баттаспытым. Вакансия баар буолар түгэнигэр, күһүн онно үлэлии барабын.

Исаков Михаил Геннадиевич, ХИФУ, ИТФ, ПСМиК бөлөх устудьуона:
— Бэйэм кыра эрдэхпиттэн тутуу эйгэтигэр сыстан улааппытым. Онон Өрөспүүбүлүкэтээҕи лицейы бүтэрэн баран, тутааччы идэтигэр үөрэниэм диэн быһаарыммытым. Устудьуоннуур сылларым олус түргэнник аастылар, аҕыйах күнүнэн дьупулуом көмүскүүргэ бэлэмнэнэ сылдьабын. Дьупулуоммун көмүскээтэхпинэ, үрдүк үөрэхтээх тутааччы-инженер идэтин ылабын. Үөрэхпит чэрчитинэн, сыл аайы сайыҥҥы сынньалаҥ кэмигэр быраактыкаланабыт. Мин икки сайын устата быраактыкабын “Монтажник” ПК тэрилтэҕэ ааспытым. Маннык хабааннаах идэҕэ туһаайар быраактыка баар буолан, тус бэйэм уопут, сүбэ-ама ыллым, тутуу эйгэтигэр киэҥ билиини-көрүүнү иҥэринним дии саныыбын. Ол курдук, 2013-2014 сыллаахха төрөөбүт дойдубар Таатта улууһун Харбалаах нэһилиэгэр оскуола тутуутугар учаастак маастарынан үлэлээбитим. Онон, барыта табылыннаҕына, дойдум иннигэр ытык иэспин толоро аармыйаҕа сулууспалыы барар баҕалаахпын, кэлэн баран быраактыкаламмыт тэрилтэбэр үлэҕэ киирэр былааннаахпын.

Карпова Сюзанна Сергеевна, ХИФУ, ФТИ, ЭС бөлөх устудьуона:
— Саас университекка распределение буолан ааспыта. Идэм – инженер-электрик. Мин быраактыкабын ааспыт “Якутскэнерго” тэрилтэни кытта барыллааһын дуогабары баттаспытым. Билигин дьупулуоммун көмүскүүр туһунан эрэ толкуйдуу сылдьабын. “Оптимизация распределительных сетей 10/0,4 кВ с. Павловск Мегино-Кангаласского района” диэн тиэмэҕэ суруйдум. Бэс ыйын 22 күнүгэр дьупулуоммун хайдах көмүскүүрбүттэн барыта быһаарыллыаҕа. Өскөтүн иллэҥ вакансия баар буоллаҕына, дьупулуоммун үчүгэйдик көмүскээтэхпинэ, үлэҕэ ылыахтара диэн эрэнэбин.
Ол курдук, техническэй үөрэхтэри бүтэрэр ыччаттар үксүлэрэ устудьуоннуур кэмнэрин тухары быраактыкаламмыт тэрилтэлэригэр үлэлии бараллар эбит. Үөрэх кыһата маннык хабааннаах идэҕэ туһаайар быраактыкаларга устудьуоннары маҥнайгы куурустан ыытара хайҕаллаах уонна туһалаах. Үчүгэйдик үөрэммит, быраактыканы ааспыт усутудьуоннар үлэ буларга улахан уустуктары көрсүбэттэр.

Мария ПАВЛОВА.