24 апреля 2015 в 16:32

Үтүө үгэскэ кубулуйбут сиэр-туом

Кыргызстан Өрөспүүбүлүкэтин киин куоратыгар Бишкеккэ Дубовай паркаҕа 2015 сыл муус устар 18 күнүгэр Ил Түмэн Бэрэссэдээтэлэ Александр Жирков баһылыктаах Саха Өрөспүүбүлүкэтин делегацията Саха сирин уһулуччулаах судаарыстыбаннай, политическай деятелигэр, Саха сирин уонна Кыргызстан судаарыстыбаннастарын төрүттээччилэртэн биирдэстэрэ Максим Кирович Аммосов пааматынньыгар тыыннаах сибэккилэри уурдулар.

Сибэкки ууруутун сиэригэр-туомугар Кыргызстан Өрөспүүбүлүкэтин парламенын (Жогорку Кенеш) Бэрэссэдээтэлин солбуйааччы Торобай Зулпукаров, Кыргызстан парламенын норуоттар икки ардыларынааҕы дьыалаларга кэмитиэтин бэрэссэдээтэлин солбуйааччы Бахтияр Кадыров, М. Аммосовка пааматынньык автора, академик Тургунбай Садыков, онтон да атын биллэр-көстөр деятеллэр кытыннылар.

Кыргызстан Геройа, Кыргызстан Өрөспүүбүлүкэтин народнай суруйааччыта Бексултан Жакиев Бишкеккэ М.К.Аммосов пааматынньыгын арыйыы историятыттан кэпсээтэ. Кыргыз литературатын аксакала этэринэн, монумент 2012 сыллаахха ахсынньы 7 күнүгэр саха норуотун уһулуччулаах уола төрөөбүтэ 115 сылыгар аналлаах үөрүүлээх тэрээһин чэрчитинэн аһыллыбыта, ол Саха сирин, Кыргызстан уонна Россия общественнай-политическай олоҕор биллэр-көстөр түгэнинэн буолбута.

Кыргызстан Өрөспүүбүлүкэтин Президенигэр судаарыстыбаннай салайыы Академиятын тылы чинчийэр Киинин директора, «М.К.Аммосов. Кыргызский период деятельности» кинигэни хомуйан оҥорооччулартан биирдэстэрэ Калипа Омуралиева Кыргызстан уонна Саха сирин историческай, культурнай уонна литературнай сибээстэрин чөлүгэр түһэриигэ Саха Өрөспүүбүлүкэтэ уонна Александр Жирков тус бэйэтэ улахан кылааты киллэрбиттэрин бэлиэтээтэ.

М.К.Аммосов сиэнэ Максим Аммосов эһэтин туһунан үтүө өйдөбүлү харыстаан илдьэ сылдьарын иһин кыргыз норуотугар истиҥник махтанна. Кини Кыргызстан Өрөспүүбүлүкэтин судаарыстыбаннаһа олохтонуутугар, атаҕар туруутугар эһэтэ киллэрбит кылаатынан киэн туттарын туһунан бэлиэтээн эттэ.

Саха сирин парламенын спикерэ Александр Жирков М.К.Аммосов пааматынньыгын авторыгар, академик Тургунбай Садыковка уонна Кыргызстан Геройугар, Кыргызстан Өрөспүүбүлүкэтин народнай суруйааччытыгар Бексултан Жакиевка Кыргызстаҥҥа Максим Кирович Аммосов аатын үйэтитиигэ көмөлөрүн иһин махтал тылларын эттэ. Саха сирин Судаарыстыбаннай Мунньаҕын Бэрэссэдээтэлэ кыргыз уонна саха норуоттарын судаарыстыбаннастарын төрүттээбит судаарыстыбаннай деятель Максим Кирович Аммосов аатын үйэтитэр үлэ туһунан кылгастык кэпсээн билиһиннэрдэ.

Саха Өрөспүүбүлүкэтин Күнүгэр аналлаах тэрээһиннэр чэрчилэринэн Бишкеккэ Максим Кирович Аммосов пааматынньыгар тыыннаах сибэккилэри ууруу сиэрэ-туома быйыл үһүс төгүлүн ыытыллан, үтүө үгэскэ кубулуйда.

Ил Түмэн пресс-сулууспата.

Кыргызстан Өрөспүүбүлүкэтин парламенын (Жогорку Кенеш) пресс-сулууспатын хаартыскаҕа түһэриилэриттэн.