833
19 июня 2015 в 12:15
Университекка кэнэҕэски суруйааччылары бэлэмниэхтэрэ
2015-2016 үөрэх дьылыгар Хотугулуу-Илиҥҥи федеральнай университет Хотугулуу-илиҥҥи олохтоох омуктар тылларын уонна култуураларын үөрэтэр институтугар саха литературатын кафедратыгар «Литературное творчество» диэн саҥа идэ арыллыаҕа. Ол туһунан биһиэхэ кафедра сэбиэдиссэйэ, филология наукатын кандидата, доцент Валентина Григорьевна Семенова кэпсээтэ:
«В России поэт – больше чем поэт» диэн биллиилээх поэт Евгений Евтушенко суруйбута баар. Суруйар-айар үлэҕэ, ол иһигэр национальнай литератураларга урут-уруккуттан уһулуччу суолта бэриллэр. 1970-с сылларга суруйааччылары бэлэмниир сиринэн М.Горькай аатынан Литературнай институт буолара. Кэнники 30 сыл иһигэр дойдуга тахсар экономическай ыарахаттарынан сибээстээн бу үөрэх кыһатыгар биир да специалиһы бэлэмнээбэтилэр. Биһиги институппут литература үлэһиттэрин бэлэмнииргэ өр сыллаах уопуттаах. Араас сылларга саха тылын уонна литературатын салаатын бүтэрбит выпускниктартан 100-тэн тахса киһи суруйааччылар сойуустарын чилиэннэрэ буолбуттара, ол иһигэр 8 Саха сирин народнай суруйааччыта бааллар. 2001 сыллаахха, оччолорго өссө факультет эрдэхпитинэ, «Литературная критика и редактирование» диэн айар куттаах дьону бэлэмнээн таһаарар идэ арыллыбыта. Бу салааттан көмүс куорсун анньынан тахсыбыт устудьуоннарбыт билигин дойду араас муннугар айа-тута, үлэлии сылдьаллар. Кинилэр истэригэр РФ Суруйааччыларын сойууһун чилиэннэрэ Семен Маисов, Рустам Каженкин, Гаврил Андросов уо.д.а. бааллар.
Саҥа идэни арыйарга үөрэх уонна наука эйгэтигэр надзор Федеральнай сулууспатын лицензията 2012 сыллаахха ыам ыйын 15 күнүгэр бэриллибитэ. «Литературное творчество» идэҕэ саха литературатын уонна литературоведениетын эйгэтигэр үлэлиир специалистары, айар-суруйар дьоҕурдаах дьону үөрэтиэхпит. Инникитин суруйааччы буолуон баҕалаах устудьуоннары бэлэмнээн таһаарарга өрөспүүбүлүкэ народнай суруйааччылара Н.И.Харлампьева, Н.А.Лугинов, И.В.Мигалкин уо.д.а. күүс-көмө буолуохтара. Быйыл уопсайа 10 төлөбүрдээх миэстэ баарыттан, биэһин СӨ бюджета уйунар.
Төрөөбүт тылларынан уус-уран айымньылары суруйар литератордары тус сыаллаах бэлэмнээһин дойду Хотугулуу-илин өттүн норуоттарын төрөөбүт тылларын уонна литератураларын харыстааһын мэктиэтинэн буолуоҕа дии саныыбыт. Айар үлэни таһынан анал үөрэх региоҥҥа литературнай кириитикэ сайдыытыгар, саха тылынан үрдүк уус-уран таһымнаах айымньылар үөскүүллэригэр, бу эйгэҕэ кадрдары бэлэмнээһиҥҥэ тирэх буолуоҕа диэн эрэнэбит.
Мария ПАВЛОВА
