Уустук кэми төлө көттөхпүтүнэ…

Глоба Украина ыһыл­лыытын туһунан, этэргэ дылы, олох уот харахха эппит. Кини: «Сотору кэминэн Украина үс аҥы арахсыаҕа, ыһыллыаҕа. Ити ыһыллыы-тоҕуллуу 2014 сылга буолуоҕа. Икки бэйэ-бэйэтиттэн тутулуга суох администрациялар баар буолуохтара», – диэн суруйбута.
Биллэрин курдук, дойдуну Евросоюзка холбуур сыаллаах-соруктаах Евромайдаан тэриллибитэ. Ити болуоссакка мустуу, кылам гыммыт кыым төлөн уокка кубулуйарыныы, кэлин тиһэх судаарыстыба түҥнэстиитигэр тириэрпитэ. Оттон 2014 сыл ыам ыйын 25 күнүгэр уочарата суох Украина президенин быыбара буолбута. Кырдьык, судаарыстыба ыһыллыыта ити сылга саҕаламмыта. Оттон тутулуга суох судаарыстыбанан Донецкай уонна Луганскай өрөспүүбүлүкэлэр буоллахтара. Астролог өтө көрүүтүттэн киһи сөҕүөн сөҕөр.
Маны таһынан Глоба экономическай кризис 2020 сылга диэри салҕанан барыа диэн бэлиэтээбит. Евросоюз уонна Украина олох да суох буолуохтарын, Американы ыар кэмнэр күүтэллэрин туһунан эппит. Кини: «ХVI үйэҕэ нуучча астрологын Василий Немчин үлэтигэр АХШ 44-с президенэ кэллэҕинэ, аан дойду улахан кризискэ оҕустарыаҕа. Немчин ол киһини «хара киһинэн» ааттаабыт этэ», – диэн этэр. Күндү ааҕааччы, «хара киһи» ким буоларын тута сэрэйбит буолуохтааххын. Обама бардаҕына, Глоба Америкаҕа уустук кэм үүнүөҕүн туһунан бэлиэтээбит.
Астролог Евросоюз ыһыллан, хас да холбоһуктар үөскүөхтэрин туһунан эппит. Прибалтика уонна Скандинавия дойдулара Хотугу, Франция, Италия уонна Испания Соҕурууҥҥу Европатааҕы союзтары үөскэтиэхтэрин туһунан эппит. НАТО блогун эмиэ эстиэ, суох буолуо диэбит.
Кини 2014 сылтан саҕалаан киһи аймах үһүс аан дойдутааҕы сэрии саҕаланыытын кытта ыы муннунан кэтиллиэҕин туһунан эппит. Итини аан дойду араас муннуктарыгар бииртэн-биир уоттаах сэриилэр буолаллара туоһулуур.
2017-2018 сылларга доллар курса таҥнары түһүөҕүн туһунан эппит. Оннооҕор дьиэлэрбит эркиннэрин килиэйдиэхпитин сөптөөх үһү. Итиниэхэ диэри кылгас кэм хаалла. Көрүөхпүт турдаҕа.
Ааҕааччы, манна болҕомтоҕун ууруоххун сөп. Астролог ньиэп сыа­ната таҥнары түһүөҕүн, 30 долларга тиийиэҕин туһунан эппит. Итинтэн ордук түһүө суоҕун туһунан бэлиэтээбит. 2016 сыл кэнниттэн ньиэп сыаната үрдээн киирэн барыаҕа, ити Россияны кризистэн таһааран, аан дойду лидерэ буоларыгар тириэрдиэҕин туһунан кэскиллээх санааны эппит.
Астролог 2020 сыл бүтэһигэр диэри аан дойду экономикатыгар уонна геополитикатыгар чэпчэкитэ суох кэмнэр иһэллэрин туһунан этэр. Ити уустук кэми-кэрдиини төлө көттөҕүнэ, Россия аан дойду саҥа лидеринэн буолуоҕун туһунан бэлиэтиир. Ол курдук, кини: «2020 сыл ахсынньы 21 күнүгэр Юпитер уонна Сатурн планеталара холбоһоллорун көрөбүн. Итинтэн ылата аан дойдуга саҥа кэм үүнүөҕэ. Россия сверхдержава статуһун сүгүөҕэ», – диэн этэн турардаах.
Павел Глоба билгэ­лээһининэн, 2014-2016 сыллар Россияҕа бөдөҥ уларыйыылар кэмнэринэн буолуоҕун туһунан ыйбыт. 2017-2020 сылларга кризис үһүс долгуна кэлиэҕин туһунан эппит. Ол эрээри наһаа ыарахана суох кэмнэр үүнүөхтэрин туһунан бэлиэтээбит.
«Дьон-сэргэ тохтоло суох стресстэн олус сылайыахтара-сындалыйыахтара. Бу дохсун долгунтан олус куттанабын. Ити долгуну «Иккис Улуу депрессия» диэн ааттыахтара. 2020 сыл бүтэһигэр бу депрессия кэмин кытта букатыннаахтык быраһаайдаһыахтара», – диэн эппит.
Сайдыылаах, дьалхааннаах үйэҕэ киһи ис туруга олус улахан суолтаны ылар. Ол курдук, бөҕө-таҕа доруобуйалаах, ис туруктара, куттара-сүрдэрэ күүстээх, киэҥ көҕүстээх, холку эрэ дьон астына-дуоһуйа олорор кэмнэрэ кэллэ. Этэргэ дылы, өй-санаа тэтимнээхтик сайдар, оттон эт-сиин, ис турук мөлтүүр. Кистэл буолбатах, билиитээҕэр-көрүүтээҕэр психологическай, духуобунай турук ордук сыаналанар кэмэ үүннэ. Глоба этэр депрессиятын кэмин бөҕө ис туруктаах уонна итэҕэллээх эрэ буоллахпытына этэҥҥэ мүччү көтүөхпүт.
Астролог 2020-2050 сылларга Россия үүнүөҕүн-сайдыаҕын, өрө тахсыаҕын туһунан бэлиэтээбит.
Өссө биир билгэ­лээһинигэр Глоба: «Ирбэт тоҥ сыыйа бытааннык ириэҕэ. Россия Сибииригэр кыһалҕа баар буолуон сөп. Обь өрүс дельтата наһаа намыһах сиргэ сытар. Хас эмэ тыһыынча көһүнэн тайыыр кута-бадараан дойдутугар кубулуйуон сөптөөх. Ити 2020-2030 сыл кэнниттэн сыыйа буолуоҕа», – диэн эппитэ. Маны таһынан кини: «2020-2021 сыллартан саҕалаан Белоруссия, Украина, Казахстан Россияны кытары холбоһуохтара. Төрүт Сокуоммут, былаас, лидердэр уларыйыахтара. 70-80-нус сылларга төрөөбүт дьон былааска актыыбынайдык тардыһыахтара», – диэбитэ.

Кэлэр кэмҥэ Саха сирин туох күүтэрий?

Айылҕаттан айдарыылаах Наталья Иванова өтө көрүүлэрэ

Сахалар айылҕаттан айдарыылаах, талааннаах дьоммутунан «атаҕастамматах» омукпут. Итинник айдарыылаах дьонноох да буоламмыт, норуоппут инникилээх. Инникини өтө көрөр улахан дьоҕурдаах Наталья Иванова кэлиҥҥи үс өрөспүүбүлүкэ аҕа баһылыгын быыбарыгар ким кыайарын эндэппэккэ билбитин туһунан бэлиэтиибин.

Дойдубут тэбэр сүрэҕэр Москваҕа баар На­талья Дмитриевнат­тан кэлэр кэмҥэ өрөс­пүүбүлүкэбитигэр ту­гу түстүүрүн туһунан төлөпүөнүнэн ыйыталаһа сырыттыбыт.
— Бу аан дойду үрдүнэн сатыылаабыт уустук политическай-экономическай балаһыанньаҕа Сахабыт сирэ улаханнык оҕустарыа, дьалкыйыа суоҕа. Өрөс­пүүбүлүкэбитигэр кризистэн иҥнибэккэ, үүнүү-сайдыы барыаҕа, тутуу бөҕө ыытыллыаҕа. Дойду, норуоттар икки ардыларынааҕы таһымнаах тэрээһиннэр, спортивнай күрэхтэһиилэр бөҕө буолуохтара. Саха сирэ улахан сэҥээриини, болҕомтону ылыаҕа.
Мини-собуоттар аһыллан үлэлиэхтэрэ. Урукку өттүгэр ыспыт-тохпут бөхпүтүн-сыыспытын ыраастыахпыт, хомуйуохпут. Ол бөхпүтүнэн брикеттэри оҥоро-оҥоробут алмаас хостообут карьердарбытын толоро сатыахпыт. Айылҕабытын ыраастыы, чөлүгэр түһэрэ сатыахпыт. Сири, ойууру эрэ буолбакка, тиэргэммититтэн саҕалаан ыраастаныахпыт. Итэҕэллээх буоларга күүскэ турунуохпут.
Арай аччыгый бааннар үлэлэрин тохтотуохтара эбэтэр сорохторо бэйэ-бэйэлэрин кытта холбоһоннор үлэлиэхтэрэ. Инникитин былааска, салалтаҕа эдэр дьон кэлиэхтэрэ.
Дьон-сэргэ чааһынай­дарыгар, бэйэлэрин тустарыгар күүскэ үлэлиэхтэрэ. Сиргэ хаһаайын буоларга күүстэрин-уохтарын ууруохтара.
Ыччат чөл олоххо тардыһыыта күүһүрүөҕэ, куһаҕан дьаллыктан быыһана сатыахтара.
Аан дойдуга буола турар глобальнай уларыйыылартан ыраах «кэнсиэрбэлэнэн» сытар буоламмыт оҕустарыахпыт суоҕа. Түмсүүлээх, сомоҕолоһуулаах буоларга кыһаллыахпыт.
Мин көрдөхпүнэ, үгүс кэлии дьоммут көһөн барыах курдуктар. Ол оннугар кинилэри толорон, атын дьон көһөн кэлиэхтэрэ. Саха сирэ 1 мөлүйүөнтэн ордук нэһилиэнньэлэниэ суоҕа. Кылгастык эттэххэ, оччо киһи барыа, оччо киһи кэлиэ.
Бар дьонум доруобай, этэҥҥэ буолуҥ, кылаабынайа айгыр-силик айылҕабытын харыстаатахпытына, ааттаах үчүгэйдик ­экономическай балаһыанньаҕа Сахабыт сирэ улаханнык оҕустарыа, дьалкыйыа суоҕа. Өрөспүүбүлүкэбитигэр кризистэн иҥнибэккэ, үүнүү-сайдыы барыаҕа, тутуу бөҕө ыытыл­лыа­ҕа.

Людмила НОГОВИЦЫНА