“Вызов – кузов!” экологическай акция кыттыылааҕа, Ил Түмэн депутата Дмитрий Семенов

“Вызов – кузов” тэрээһиҥҥэ Өрөспүүбүлүкэ биллиилээх политиктара, спортсменнар, артыыстар уо.д.а. кыттыыны ылаллара күүтүллэр. Кыттааччы Дьокуускай куорат сиригэр-уотугар быраҕылла сытар кузовтары булан, бэйэтин хармааныттан төлөөн манипулятордары туһаныахтаах. Акцияҕа номнуо Ил Түмэн депутаттара, улахан тэрилтэлэр генеральнай директордара көхтөөх кыттыыны ыллылар. Ол курдук, куорат хаһаайыстыбатыгар Дьокуускай куорат баһылыгын бастакы солбуйааччытын көмөлөһөөччүтэ Андрей Николаев, ДьУоКХ уонна энергетика миниистирин маҥнайгы солбуйааччыта Гаврил Левин, Ил Түмэн депутата Владимир Федоров, Конституционнай суут бэрэссэдээтэлэ Александр Николаевич Ким-Кимэн уо.д.а.

Муус устар 21 күнүгэр Ил Түмэн депутата, Хонтуруоллуур кэмитиэт чилиэнэ, тутууга уонна ДьУоКХ сис кэмитиэт чилиэнэ Дмитрий Александрович Семенов Дьокуускай куорат Луговая уулуссатыттан үс кузовы тиэйтэрэн “Якутвторчермет” ХЭТ илдьэн туттарда.

— Миэхэ акцияҕа кыттар туһунан ыҥырыыны Конституционнай суут бэрэссэдээтэлэ Александр Николаевич Ким-Кимэн бырахта. Бүгүн мин Автодорожнай уокуруктан үс кузовы тиэйэн эрэбин. Салгыы Ил Түмэн депутатыгар Акимов Андрей Афанасьевичка уонна Дьокуускай куорат Пригороднай уокуругуттан депутат Керегяев Геннадий Леонидовичка тиэрдэбин. Кинилэр мин ыҥырыыбын ылынан акцияҕа көхтөөхтүк кыттыахтара диэн эрэнэбин. Куораппыт чөл туруктаах буоларын туһугар хас биирдии киһи төһө кыалларынан бэйэтин кылаатын киллэриэхтээх дии саныыбын. Сыл аайы куораппыт тупсан иһэриттэн үөрэбин.

Өрөспүүбүлүкэбит биллэр-көстөр дьоно тус бэйэлэрин үтүө холобурдарынан нэһилиэнньэни маннык хабааннаах тэрээһиннэргэ көхтөөх кыттыыны ыларга ыҥыраллара киһини үөрдэр. Санатан суруйар эбит буоллахха, “Вызов – кузов” экологическай акцияҕа баҕалаах, кыахтаах дьон барыта кыттыан сөп.

Мария ПАВЛОВА.