02 марта 2018 в 11:31

Юрий Баишев: «Чыпчаал» комплекс чыпчаалга угуйдун

Олунньу 28 күнүгэр Хара нэһилиэгэр өр сылтан күүтүллүбүт, «Үтүө дьыала» бырагырааматынан тутуллубут спорт саалатын саҥа дьиэтин үөрүүлээхтик аһыы сиэрэ-туома ыытылынна. «Чыпчаал» диэн ааттаммыт уораҕайга харалар биир дойдулаахтара, спортка үрдүк көрдөрүүлэри ситиспит, боксаҕа Россия үтүөлээх маастара, аан дойду үрүҥ көмүс призера, икки төгүллээх Европа, үс төгүллээх Россия чөмпүйүөнэ, Рио де Жанейроҕа Олимпийскай оонньуулар кыттыылааҕа Василий Михайлович Егоров аата иҥэрилиннэ.

Дьиэҕэ киирии аалай лиэнтэтин Саха Өрөспүүбүлүкэтин Ил Түмэнин дьокутаата Юрий Баишев, Саха Өрөспүүбүлүкэтин спортка миниистирэ Георгий Балакшин, оройуон баһылыга Николай Старостин, нэһилиэк баһылыга Дария Назарова, Саха Өрөспүүбүлүкэтин үтүөлээх тренерэ, аан дойду категориялаах судьуйа Аркадий Тастыгин, Россия спортка үтүөлээх маастара, боксаҕа Россия сүүмэрдэммит хамаандатын чилиэнэ Василий Егоров, тутуу тэрилтэтин салайааччы Эдуард Калачиков быстылар. Саҥа саала символическай күлүүһүн тутуу тэрилтэтин аатыттан «Тут Уус» ХЭТ дириэктэрэ Эдуард Калачиков Хара нэһилиэгин баһылыга Дария Назароваҕа үөрүүлээх быһыыга-майгыга туттарда.
Бу күн ыҥырыылаах ыалдьыттар, Василий Егоров дьиэ кэргэнэ, спорт бэтэрээннэрэ, оскуола үөрэнээччилэрэ, нэһилиэк олохтоохторо ыалдьыттаан эҕэрдэлэрин тиэртилэр. Дария Назарова нэһилиэк социальнай-экономическай сайдыытыгар кылааттарын киллэрсибиттэргэ бэлиэ наҕараадалары итиэннэ Василий Егоровка кини аата саалаҕа иҥэриллибитин туоһулуур суругу туттартаата.
Оройуон салалтатын аатыттан Николай Старостин нэһилиэк салгыы бөдөҥ нэһилиэктэр ахсааннарыгар киирэрдии сайдыы үктэллэринэн баран иһэригэр, саҥа саалаҕа дьарыктанан үрдүкү ситиһиилэр кэлэ туралларыгар баҕа санаатын тиэртэ, бэлиэ наҕараадалары анаата.

Ил Түмэн дьокутаата Юрий Баишев тыл этиитигэр Хара нэһилиэгин сириттэн-уотуттан тахсыбыт өрөспүүбүлүкэҕэ успуорду салайбыт, Саха Өрөспүүбүлүкэтин Бырабыыталыстыбатын бэрэссэдээтэлинэн, уһун сылларга Москваҕа Саха Өрөспүүбүлүкэтин Бастайааннай бэрэстэбиитэлистибэтин салайбыт Иннокентий Игнатьевтан саҕалаан спорт бары эйгэтигэр ситиһиилээх, өрүү инники кирбиигэ сылдьар спортсменнар элбэхтэрин, маннык үчүгэй дьиэ-уот ыччат сайдыытыгар, дьон-сэргэ чөл олохтоох буоларыгар, доруобуйаларын тупсаралларыгар көмөлөөх буолуоҕун бэлиэтээтэ.
Саха Өрөспүүбүлүкэтин спортка миниистирэ Георгий Балакшин оройуон, нэһилиэк салалталарыгар махталын биллэрэн туран, сылаас, сырдык саалаҕа чөмпүйүөннэр үүнэ-сайда туралларыгар баҕа санаатын тиэртэ, спорт тэрилин ыларга сэртипикээти туттарда.
Бүтүн Россияны ааттата сылдьар кэскиллээх спортсмен Василий Егоров нэһилиэгин дьоно-сэргэтэ, биир дойдулаахтара үрдүктүк чиэстээбиттэригэр, үрдүк эппиэтинэс сүктэриллибитигэр махтанан туран: «Олус үчүгэй саала тутулунна. Күүс-көмө буолбут бары дьоммор-сэргэбэр махтанабын. Салгыы боксаҕа анаан эбии тутуу тутулларыгар баҕалаахпын», ‒ диэтэ.
Үөрүүлээх тэрээһиҥҥэ спорт бэтэрээннэрин, спортка күн бүгүн ситиһиилээх спортсменнар ааттара чиэстээхтик ааттанна. «Саҥа тутуу кэлэр да кэмнэргэ чөл куттаах ыччаты түмтүн, үрдүк чыпчаалларга угуйдун», ‒ диэн алгыстарын анаан, нэһилиэк уус-уран самодеятельноһын кыттыылаахтара эҕэрдэ нүөмэрдэрин көрдөрдүлэр.

Марфа Птицына,
Мэҥэ-Хаҥалас.