Александр Жирков «Олоҥхо дьыктаанын» суруйда

Сэтинньи 24 күнүгэр Дьокуускайга Национальнай библиотека актовай саалатыгар өрөспүүбүлүкэҕэ аан бастакы «Олоҥхо дьыктаанын» суруйуу буолла. Бу тэрээһин Саха сиригэр өрөспүүбүлүкэтээҕи Олоҥхо декадатын ыытыы чэрчитинэн олохтонно.

Өрөбүл күн Национальнай библиотекаҕа «Олоҥхо дьыктаанын» суруйа уонунан ахсааннаах киһи: олоҥхону таптааччылар, чинчийээччилэр, учууталлар, иитээччилэр, ыччат дьон муһуннулар.

Мустубут дьону Саха Өрөспүүбүлүкэтин Ил Дарханын иһинэн олоҥхо иккис уон сылын бэлэмнээн ыытар национальнай тэрийэр кэмитиэт бэрэссэдээтэлэ Александр ЖирковОлоҥхо күнүнэн уонна өрөспүүбүлүкэҕэ Олоҥхо декадата саҕаламмытынан эҕэрдэлээтэ. Салгыы кини кэлбит дьону кытта бииргэ «Олоҥхо дьыктаанын» суруйда.

«Олоҥхо дьыктаанын» тиэкиһэ Нам улууһуттан төрүттээх аатырбыт олоҥхоһут П.П. Ядрихинскай-Бэдьээлэ «Дьырыбына Дьырылыатта», оттон оскуола оҕолоругар М.К. Аммосов аатынан Хотугулуу-Илиҥҥи федеральнай университет Олоҥхо научнай-чинчийэр институтун сиэктэрин салайааччыта Ю.П. Борисов «Баһырҕастаах аттаах Баабый Баатыр» диэн олоҥхолоруттан быһа тардан ылыллыбыт.

Бу бастакытын ыытыллыбыт тэрээһин сүрүн соруга – дьон-сэргэ саха тылынан уус-уран айымньытын туһунан билиитин кэҥэтэргэ, олоҥхоҕо дьон умсулҕанын тардарга аналлаах. Ол курдук, дьыктааны суруйуу балаһыанньатыгар «олоҥхо тылын баайын билиини чиҥэтии, олоҥхо тылын-өһүн иҥэринии, сахалыы таба суруйуу үөрүйэҕин сайыннарыы, төрөөбүт тылынан таба суруйар таһымы үрдэтии” диэн суруллубут.

Дьыктааны суруйууну уонна түмүгү таһаарыыны улахан дьоҥҥо библиотека үлэһиттэрэ, оттон үөрэнээччилэргэ уонна устудьуоннарга – үөрэх, култуура тэрилтэлэрэ тэрийэллэр. Дьыктааны сааһыттан, идэтиттэн уонна үөрэҕиттэн тутулуга суох, баҕалаах дьон барыта суруйар кыахтаах.

Дьыктааны туйгуннук суруйбут курэх кыттыылаахтарын ааттара алтынньы 10 күнүгэр Olonkho.info сайт «Диктант Олонхо» баһыгар тахсыахтара. Онтон бастакы үс миэстэни ылбыт улуустар олоҥхо уонна олоҥхоҕо аналлаах кинигэлэринэн бэлиэтэниэхтэрэ.