Кытаанах бөх тарыыбын кыччатыахтарын сөп

Дьокуускай куоракка уонна Жатай бөһүөлэгэр кытаанах бөҕү тиэйии иһин тарыып кээмэйин кыччатар туһунан кэпсэтии тахсыбыт. Оннук сорудаҕы Ил Дархан Айсен Николаев атырдьах ыйын 27 күнүгэр буолбут мунньахха эппит. Мунньахха ситэриилээх былаас бэрэстэбиитэллэрэ уонна регионнааҕы оператордар салайааччылара кыттыбыттар.

Билигин Дьокуускайга элбэх кыбартыыралаах дьиэҕэ олорор киһиэхэ тарыып кээмэйэ 131 солк., чааһынай дьиэлээхтэргэ — 138 солк. СӨ сыана политикатыгар судаарыстыбаннай кэмитиэт дааннайынан, бу тарыып 32% намтыан сөп. Урукку сыананан төлүү сылдьааччыларга хаттаан ааҕыы оҥоһуллуоҕа. Кэлэр үс ыйга бу өҥө иһин төлөөбөттөр, онтон сэтинньи ыйтан намтатыллыбыт тарыыбынан төлүөхтэрэ.
Айсен Николаев этэринэн, маннык быһаарыыны Саха сирин киин зонатын бөҕүн тийиэхтээх “Якутскэкосети” хампаанньа үлэтин ситэри толорботоҕуттан ылыллыбыт. “Бөҕү тиэйиигэ үгүс кыһалҕалар үөскээтилэр. Маныаха тутулуга суох төрүөттэр бааллар – бөҕү мунньар былаһаакка суоҕа, анал техника суоҕа. Ону кытта тэрилтэлэри уонна биирдиилээн дьону кытта дуогабар түһэрсии боппуруоһа турар. Бу үлэни муниципальнай тэриллии уонна регионнааҕы оператордар хардарыта үлэлэһэн ыытыахтаахтар”, — диэн эттэ баһылык.
Айсен Николаев юридическай уонна биирдиилээн дьону кытта дуогабар түһэрсии мэхэнньиисимин оҥорор наадалааҕын бэлиэтээтэ. Контейнердар былаһааккаларын оҥорорго улахан үлэ ыытыллыахтаах.
“Элбэх нэһилиэнньэлээх пуун­нарга бөҕү мунньар сир суох, контейнердар туруоруллуо суохтаах сирдэргэ туруорулаллар. Өрөспүүбүлүкэҕэ 4,5 тыһ. контейнер былаһааккалара баар, онно 12 тыһ. контейнер туруоруллубут. Билигин эбии 7 тыһ. былаһаакканы тэрийэр уонна 19 тыһ. контейнеры атыылаһар наада. Онно 1,5 млрд солк. ирдэнэр”, — диэн Айсен Николаев иһитиннэрдэ. Кини федеральнай бюджеттан контейнердар былаһааккаларын оҥорууга үп көрүү туһунан сайаапка РФ Бырабыыталыстыбатыгар ыытыллыбытын туһунан эттэ.

СӨ Баһылыгын уонна Бырабыыталыстыбатын пресс-сулууспата