Аллараа Бэстээххэ сүүнэ спорт саалатын тутуохтара

Ыам ыйын 28 күнүгэр Аллараа Бэстээххэ бассейыннаах уонна улахан саалалаах спорт дьиэтин тутуута саҕаланна. Өрөспүүбүлүкэ салалтата, депутаттар, тутааччылар уонна олохтоохтор бу үөрүүлээх түгэҥҥэ кытыннылар.

“Дойду салалтата спорт уонна физическай култуура салаатын өйүүргэ соруктаммытын түмүгэр биһиги бөһүөлэкпитигэр маннык улахан спорт саалата тутуллар кыахтанна. Тутуу 90% федеральнай бюджеттан үбүлэнэр”, — диэн Айсен Николаев үөрүүлээх түгэни арыйыыга эттэ.
СӨ судаарыстыбаннай мунньаҕын бэрэссэдээтэлин бастакы солбуйааччы Александр Жирков Мэҥэ Хаҥалас олохтоохторун эҕэрдэлээтэ. “Эһиги улуускут дириҥ историялаах, баай үгэстэрдээх, улуу дьон мантан үүнэн-сайдан тахсыбыттара. Өрөспүүбүлүкэҕэ биир бөдөҥ спортивнай сааланан буолуохтаах дьиэ Мэҥэ Хаҥаласка тутуллара үөрүүлээх. Элбэх чулуу спортсменнар онтон иитиллэн тахсыахтарыгар эрэнэбин”, — диэтэ.
Спортивнай тутуу 2020 сыл бүтүүтэ түмүктэнэрэ былааннанар. Манна бассейн, 500 көрөр миэстэлээх саала, остуол тенниһигэр, аэробикаҕа уонна да атын спорт көрүҥнэригэр бэлэмниир саалалар баар буолуохтара. Бу тутууга 2019 сылга 349,7 мөл. көрүллүбүт, онтон 92% федеральнай бюджеттан.