Амма улахан спорт быраһынньыгар бэлэм

/Тыа сиригэр үлэлэр /

Бырабыыталыстыба бэрэссэдээтэлин солбуйааччы Ольга Балабкина, тутуу миниистирэ Павел Аргунов Амма улууһугар спорт эбийиэктэригэр сырыттылар

Бырабыыталыстыба бэрэссэдээтэлин солбуйааччы Ольга Балабкина уонна тутуу миниистирэ Павел Аргунов бу сайын Амма улууһугар ыытыллар Саха сирин норуоттарын VII-c Оонньууларын тэрийэр кэмитиэт көһө сылдьар мунньаҕар кытыннылар. Оробуочай сырыы чэрчитинэн, кинилэр 2018 сыллаахха тутуллан үлэҕэ киирбит спорт саалатыгар (сакаасчыт — «СӨ Судаарыстыбаннай сакаасчыт сулууспата”), Бөтүҥ, Чапчылҕан нэһилиэктэригэр үлэҕэ киирээри турар спорт эбийиэктэрин көрдүлэр-иһиттилэр. Чапчылҕан нэһилиэгэр баар спорт саалатын «Мин Саха сирэ — ХХ I үйэҕэ» бүтүн өрөспүүбүлүкэтээҕи үтүө дьыала хамсааһын чэрчитинэн тутулла турарын эбэн этиэххэ сөп. Сааланы бырайыактааччы «МОНОстрой» САО, бэдэрээт тэрилтэтэ — «Сардана-Строй» ХЭТ. Тутуу бүтэһик, түмүктүүр биэтэккэ кэлэн турар. Бүгүҥҥү туругунан ааннары, сырдатар тэриллэри туруоруу, саала иһинээҕи хааччыллыыны ситэрии хаалбыт.
Түмүгү таһаарар мунньахха сүрүн иһитиннэриини тутуу миниистирэ Павел Аргунов оҥордо. Спорт икки улахан эбийиэгин от ыйын 2 күнүгэр диэри түмүктүүр сорук туруорулунна.

СӨ тутуу министиэристибэтин пресс-сулууспата.