728
02 ноября 2018 в 14:10
Элбэх оҕолоох ыал аатын сүкпүттэргэ
Дойду демографическай балаһыанньатын тупсарарга туһуламмыт судаарыстыбаннай бырагыраамалар бааллар. Холобур, ийэ хапытаала, элбэх оҕолоохторго босхо учаастак биэрэр туһунан судаарыстыбаннай бырагыраамалар үлэлииллэр. 2018 сылга РФ Бырабыыталыстыбата элбэх оҕолоох дьиэ кэргэҥҥэ өссө биир судаарыстыбаннай өйөбүл бырагырааматын киллэрдэ. Ол – икки уонна онтон элбэх оҕолоох ыал дьиэ ыларыгар 6%-наах ипотеканан кредити көрүү.
Чэпчэтиилээх кэм 8 сылга уһатыллыан сөп
2018 сылтан Сбербаан уонна да атын бааннар саҥа сокуонунан элбэх оҕолоох дьиэ кэргэҥҥэ дьиэ ылалларыгар 6%-наах кредит биэрэллэр. Бу сокуон сүрүн соругунан элбэх оҕолоох ыал олорор усулуобуйаларын тупсарыы буолар. Маныахха кэккэ быраабылалар үлэлииллэр. Ол ханныктарый?
-Ипотеканан сылга 6%-наах кредит – бу РФ Бырабыыталыстыбата биэрэр субсидиятынан буолар. Бу субсидия 2018 сыл тохсунньутуттан 2-с, 3-с уонна онтон элбэх оҕоломмуттарга көрүллэр.
-Кредит суумата уратылаһар. Ол курдук, Москва, Санкт-Петербург курдук бөдөҥ куораттарга бэриллэр кредит муҥутуур суумата 8 мөл. солк. тэҥнэһэр, оттон регионнарга – 6 мөл. солк.
-Судаарыстыбаннай бырагырааманан тутулла турар дьиэни эрэ ылар кыахтаахтар. Дьон олоро сылдьыбыт дьиэтин уонна тутулла турар дьиэҕэ ылбыт киһиттэн хаттаан атыылаһар кыаллыбат.
-Атыылаһар дьиэҥ сыанатыттан 20%-ныгар тэҥнээх суума бэйэҕэр баар буолуохтаах.
-Сбербааҥҥа элбэх оҕолоох ыаллар ипотеканан кредит ылалларыгар саҥа сокуонунан киһи олоҕун булгуччулаах страховкалааһыны киллэрэллэр. Бу страховканы сылын аайы оҥоруу ирдэниллэр.
-6%-наах ставка кредит ылыллыбыт кэмин устата дьайбат. Чэпчэтиилээх кэмҥэ эрэ 6% ставка көрүллэр. Чэпчэтиилээх кэм диэн ханнык кэми ааттыылларый? 2018 сылга 2-с оҕоломмуттарга 3 сыл устата чэпчэтиилээх кэм үлэлиир, онтон салгыы 3-с уонна онтон элбэх оҕолоннохторуна – эбии 5 сыл үлэлиир.
-Өскөтүн 3 сыллаах чэпчэтиилээх кэмнэригэр ыал үһүс оҕолонноҕуна, чэпчэтиилээх кэмэ 5 сылынан уһаан биэрэр.
-Чэпчэтиилээх бырыһыаннаах (6%) кэм түмүктэннэҕинэ, кредит бырыһыана урукку киэбин ылар. Ол эбэтэр орто көрдөрүүгэ тэҥ буолар.
“Элбэх оҕолоох дьиэ кэргэн” статус кимиэхэ бэриллэрий?
Кэргэнниилэр сокуонунан холбоспут, эбэтэр соҕотох ийэ, соҕотох аҕа диэн статустаах буолуохтаахтар. Дьиэ кэргэҥҥэ үс уонна онтон элбэх оҕолоро сокуоннай саастарын ситэ илик буолуохтаахтар. Регион аайы элбэх оҕолоох дьиэ кэргэни билинэр быраабылалар уратылаһаллар.
Оҕолоох ыалларга 6%-наах ипотеканан кредит биэрэр туһунан сокуон 2018 сылтан үлэтин саҕалаата. Бу судаарыстыбаннай бырагыраама билиҥҥи быраабыланан 5 сылынан түмүктэнэр.
Атын бааннарга элбэх оҕолоох ыалларга ипотека усулуобуйата
Баан | % | Болдьоҕо |
Элбэх оҕолоохторго ДельтаКредит баан ипотеката | 6%-тан саҕалаан | 36-300 ый |
Элбэх оҕолоохторго МТС баанын ипотеката | 8,7%-тан саҕалаан | 36-300 ый |
Элбэх оҕолоохторго Россельхозбаан ипотеката | 6%-тан саҕалаан | 12-360 ый |
Элбэх оҕолоохторго Связь-Баан ипотеката | 9%-тан саҕалаан | 36-360 ый |
Элбэх оҕолоохторго ТинькоффБаан ипотеката | 6%-тан саҕалаан | 12-300 ый |
Сбербаан элбэх оҕолоохторго биэрэр ипотеката (Дьокуускайга)
Аата | Суумата | Болдьоҕо | % |
Бэлэм дьиэни атыылаһыы | 3 мөл. солкуобайтан | 12 ыйтан 360 ыйга диэри | 9,2-10,8% |
Тутулла турар дьиэни атыылаһыы | 3 мөл. солкуобайтан | 12 ыйтан 360 ыйга диэри | 9,5-11,3% |
Куорат таһынааҕы дьиэ | 299 999 солк. | 12 ыйтан 360 ыйга диэри | 10,1 -11,4 |
Ипотека уонна ийэ хапытаала | 3 мөл. солкуобайтан | 12 ыйтан 360 ыйга диэри | 7,1% |
Оҕолоох ыалларга судаарыстыба өйөбүлэ | 3 мөл. солкуобайтан 8 мөл. солкуобайга диэри | 12 ыйтан 360 ыйга диэри | 6% |
Тутулла турар дьиэни атыылаһыы (субсидия бырагырааматынан) | 3 мөл. солкуобайтан | 12 ыйтан 144 ыйга диэри | 7,5-9,3% |
Элбэх оҕолоохтор өссө хайдах дьиэлэниэхтэрин сөбүй?
Өскөтүн элбэх оҕолоохтор үөһэ этиллибит судаарыстыбаннай бырагыраама усулуобуйатыгар сөп түбэспэтэхтэринэ, ол эбэтэр 2018 сылга оҕо төрөппөтөх, дохуоттара эппиэттээбэт буоллахтарына, атын судаарыстыбаннай өйөбүл дьаһалларын усулуобуйаларын үөрэтэн, онно кыттыһыахтарын сөп. Сбербаан нөҥүө кэккэ судаарыстыбаннай бырагыраамалар үлэлииллэр. Кэргэнниилэртэн биирдэстэрэ 35 сааһын туола илик буоллаҕына “Эдэр дьиэ кэргэн” бырагырааманан дьиэлэниэн сөп. Маны таһынан “Тоҕоостоох дьиэ” (“Доступное жилье”) бырагыраама үлэлиир, манна сааһынан хааччахтаныллыбат. Бу икки судаарыстыбаннай бырагырааманан оҕолоох ыал олорор усулуобуйатын хайдах баҕарар саҥардыахха сөп – саҥа дьиэни, дьон олоро сылдьыбыт дьиэтин атыылаһан, дьиэ туттан. Бу икки бырагырааманан ылыллар кредиттэр бырыһыаннара кыччыгый буолар.
2018 сылга дьиэ ыларга бырыһыана суох кредит
Нэһилиэнньэ сорох категориятыгар дьиэ ыларга бырыһыана суох кредити биэрии диэн эмиэ биир судаарыстыбаннай бырагыраама чэрчитинэн социальнай көмө үлэлиир. Ону кимнээх ылыахтарын сөбүй?
-“Элбэх оҕолоох ыал” статустаахтар;
-Ипотеканан ылыллыбыт иэһи ыйын аайы сабар дохуоттаахтар;
-Атыылаһыахтаах дьиэтэ бастакы атыылаһар уонна соҕотох бас билэр хамсаабат баайынан буоллаҕына;
-Өскөтүн олорор усулуобуйата сөбө суох буоллаҕына, атыылаһар дьиэтэ бастакы бас билэр дьиэтинэн буолуо суоҕун эмиэ сөп.
Бу судаарыстыбаннай бырагырааманан туһанар туһуттан олохтоох дьаһалтаҕа сайабылыанньа суруйуллар. Өскөтүн администрация ыал бу бырагыраамаҕа кыттыһыан сөбүн туоһулаатаҕына, бааҥҥа сайаапка биэриэххэ сөп.
Туһалаах сүбэлэр
Баан 6%-наах ипотекатынан биир оҕолоох уонна салгыы ыччаттанар былааннаах ыал туһаныан сөп. Маныаха бу судаарыстыбаннай бырагыраама 5 сыллааҕын умнумаҥ. Ол эбэтэр 2020 сылга түмүктэнэр. Онтон 2018 сылга элбэх оҕолоох ыал статуһун хайыы-үйэ ылан олорор буоллаххына, бырыһыана суох ипотеканан кредиккэ холонон көрүөххүн сөп. Ипотеканы ыларга ийэ хапытаалын үбүн бастакы усунуос быһыытынан туһаныаххын сөп.
Mainfin.ru үп эргиирин ырытар ресурса матырыйаала туһанылынна.