Тутуу миниистирэ кыһалҕаламмыт тэрилтэҕэ сырытта

Дьокуускай куорат «Өктөөп 50 сыла Автострада» уулуссатыгар 12 этээстээх 389 кыбартыыралаах дьиэ тутуута түмүктэнэн эрэ. Ол эрээри дьон олохсуйарыгар бэлэмэ суох.

Өлүүлээн кыттыһыы бэрээдэгинэн дьиэни атыыласпыт дьон 2016 сылтан бэттэх кыбартыыраларыгар көһөн киирэллэрин күүтэллэр. Кэккэ кыһалҕалар үөскээннэр, «Строймонтаж-2002» ХЭТ тутар тэрилтэ дьиэ үлэҕэ киириэхтээх кэмин уһатан иһэргэ күһэллибит. Тутуу миниистирэ Павел Аргунов үлэни билсэр соруктаах уочараттаах оробуочай сырыытыгар тутуу бытаарыытын сүрүн төрүөтүн иҥэн-тоҥон билистэ. Кини бу аан бастакы эрэ сырыыта буолбатах, дьиэни түргэник ситэрэн-хоторон, үлэҕэ киллэрэр туһугар ылсан бу инниттэн үлэлиир. «Строймонтаж-2002» тутар тэрилтэ Мииринэйгэ, Дьокуускайга элбэх кыбартыралаах улахан олорор дьиэлэри, Зырянкаҕа, Орто Халымаҕа култуура-спорт комплекстарын тэҥинэн тута сылдьар. Манна кыбартыылары уонна олорорго анала суох эбийиэктэри дьон атыылаһыыта аҕыйах, итиинэн, уунан хааччыйар тэрилтэлэргэ иэс үөскээбит. Бу барыта түмүллэн улахан бытаарыыга тиэрдибит. Бүгүҥҥү туругунан дьиэ уунан хааччыллыбакка турар», — диир миниистир. Кини тэрилтэ үп-харчы өттүнэн туругун, үлэ хайдах бара турарын тус хонтуруолугар ылбыт. Кини этэринэн, төһө да итэҕэс-быһаҕас элбэҕин иһин, тутуу тэрилтэтэ сэмэлээһиннэри туоратыыга, дьиэни төһө кыалларынан түргэнник үлэҕэ киллэрэргэ дьулуһар.

Тутуу министиэристибэтин пресс-сулууспата