454
23 октября 2017 в 10:06
Балык собуотун чыыра үсүһүн наҕараадаланна
«Туймаада-Агроснаб» хампаанньа иккис сылын Дьокуускайдааҕы балык собуотун чөлүгэр түһэриигэ үлэни ыытар. Бу собуот тэрилэ урукку моҥкурууттаабыт бас билээччиттэн атыылаһыллыбыта, бу иннинэ дьиэтэ тэрилтэ урукку иэһин суотугар “Алмаасэргиэнбааҥҥа” көспүт. Онон билигин дьиэни баантан арендалыыр. Бүгүҥҥү күҥҥэ собуот балаһфыанньата туруктанна.
Экология өттүнэн ыраас балык бородууксуйатын хамаҕатык ылаллар итиэннэ саамай үрдүк таһымнаах быыстапкаларга кыайыылаах тахсар. Быйыл алтынньыга “Кыһыл көмүс күһүн–2017” Бүтүн Россиятааҕы агропромышленнай быыстапка-дьаарбаҥкаттан собуот ыыһаммыт уонна кыра туустаах чыыр бородууксуйатын иһин кыһыл көмүс мэтээли аҕалла. Оттон эмиэ быйыл өрөспүүбүлүкэтээҕи “Ас-үөл–2017” быыстапка-дьаарбаҥкаҕа ыыһаммыт чыыр сиһин этин иһин 1-кы истиэпэннээх диплому ылбыттара.
“Белая рыба” диэн брендынан биллэр Дьокуускайдааҕы балык собуотун бородууксуйата иккис сылын наҕараада ылла. “Туймаада-Агроснаб” ААУо Дьокуускайдааҕы балык собуотун сүрүн технолога – оҥорон таһаарыыга сэбиэдиссэй Людмила Захарова ситиһиилэрин төрдүн туһунан маннык кэпсээтэ:
— Кыайыыга туох барыта суолталаах – бэлэмнээһин технологията, күрэстэһэр табаарынай көрүҥэ. Сэдэхтик амсайыллар балыгы астааһыҥҥа киниэхэ ытыктабыллаахтык сыһыаннаһыахтааххын, көннөрү тууһууруҥ, ыыһыырыҥ таһынан олус элбэх ымпыктаах-чымпыктаах. Онуоха эбии биһиги бородууксуйабыт барыта консерваннары итиэннэ “убаҕас буруо” курдук ароматизатордары туһаммакка эрэ оҥоһуллар.
Бүтүн Россиятааҕы “Кыһыл көмүс күһүн–2017” агропромышленнай быыстапка-дьаарбаҥкаҕа Россия 70 регионуттан уонна 15 омук дойдутуттан 1400 тэрилтэ кыттыбыта.
Ассортимеммыт сүнньүнэн чыыр буолар, тымныыга ыыһаммыт чыыр сиһин этин мэлдьи атыылаһаллар – бу биһиги визитнай карточкабыт курдук.
Уопсайынан, куораппытыгар саҥаны сэрэхэдийэ көрсөллөр, үөрэммиттэрин атыылаһаллар. Быйыл саас хатарыллыбыт сордоҥтон соломкалары оҥорон таһаарбыппыт, бу олус интэриэһинэй бородуукта уонна сыаната да удамыр.
Билиҥҥи кэмҥэ хаһаайкалар ас бэлэмнииллэригэр бириэмэлэрэ ыгым (балыгы ким барыта ыраастыыр, бэлэмниир буолбатах), онон номнуо ыраастаммыт балык куһуоччуктарын хаалаан оҥорор былааннаахпыт, ону туустаан-тумалаан баран, буһарыахха, ыһаарыллыахха эрэ наада – ким хайдах сатыырынан.
«Белая рыба» бородууксуйаны Киров уул. 13 нүөмэригэр “Купава” павильоҥҥа, Бааһынай ырыынагын иккис этээһигэр, “Айгуль” маркеттарыгар, “Алмаас”, “Поярков”, “Түмсүү” (“Сахаагропродукт”) маҕаһыыннарга, Покровскайга, Намҥа, Бэрдьигэстээххэ эргиэн кииннэригэр уо.д.а. булуохха сөп.
