Горнайдар остуолларыгар күннэтэ

Киин телевидениенэн доруобуйа туһунан биэриигэ маҕаһыыҥҥа атыыланар үүт аһы өр буортуйбатын ситиһээри дэлби оргутаннар, бороһуогунан эбииликтээн, туһалаах эттиктэрин ончу суох гыналларын туһунан истэн, санаабыт түспүтэ. Хата, кэлиҥҥи сылларга “Саха сиригэр оҥоһуллубут” диэн бэлиэнэн бэйэбит сирбитигэр-уоппутугар оҥоруллар бородууксуйаны ырыынакка таһаараллара элбээтэ. Чугас сытар улуустартан үүт, эт астары аҕалан хото атыылыыллар.

Олунньу 6 күнүгэр Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ Андрей Находкин Горнай Бэрдьигэстээҕэр тахса сылдьан, “Горнай-Ас” уонна “Горныймясопродукт” диэн тыа хаһаайыстыбатын бородууксуйатын оҥорон таһаарар кооперативтар (ТХПК) үлэлэрин кытары билистэ. Андрей Михайлович ол сырыытын туһунан биһиги хаһыаппытыгар кэпсээтэ:

— “Горнай-Ас” ТХПК бородууксуйата ас-үөл ырыынагар бэйэтин миэстэтин олохтоохтук булбут тэрилтэ. 2016 сылтан тэриллэн үлэтин тэтимин ыһыктыбакка, ону таһынан сайыннаран бэркэ үлэлиир. Дириэктэринэн Николай Николаевич Ефремов үлэлиир. 52 паайдаахтар, кинилэр истэригэр 6 кооператив, 46 бааһынай хаһаайыстыба бааллар. ТХПК-гар үүт, эт тутар пуун, 7 үүт собуота, икки арыы сыаҕа, ас-үөл комбината уонна бэйэлэрин маҕаһыыннара үлэлииллэр. 2018 сылга уопсайа 3418 туонна үүттэн бородууксуйаны оҥорон таһаарбыттар. 80 туонна арыы, манна диэн сөҕө эттэххэ, сыах 4 көрүҥ арыыны таһаарар эбит – ынах арыытын уонна чеснок, моркуоп уонна сакалаат амтаннаах арыылары, эксперименнииллэрэ кэрэхсэбиллээх. Маны таһынан 1,5 туонна үүттэн үүт ас 10 көрүҥүн оҥорон таһаарбыттар. Бородууксуйалара үксэ кэриэтэ олохтоохторго атыыланар, ол иһигэр оскуолаларга, оҕо саадыгар ылаллар. 30 бырыһыанын

“Сахаагропродукка” туттаралларын туһунан этэллэр. Былырыын Маҕараска күҥҥэ 500 лиитирэ үүтү оҥорон таһаарар үүт сыаҕын арыйбыттар. Бэрдьигэстээххэ 3 тыһыынча лиитирэ үүттэн оҥорон таһаарар комбинаты тута сылдьаллар, сотору үлэҕэ киллэрэр былааннаахтар.

Иккис сылдьыбыт тэрилтэбинэн 2015 сылтан үлэлии турар  “Горныймясопродукт” ТХПК буолар.  Дириэктэринэн Иван Егорович Ксенофонтов үлэлиир. Биир сменаҕа, ол эбэтэр биир күҥҥэ 10 сүөһүнү астыыр сыахтаахтар. Эттэн 40 көрүҥ ас оҥороллор, халадьыастан саҕалаан. Бородууксуйаларын атыылыыр фирменнэй маҕаһыыннарын аана сабыллыбат диэххэ сөп, ол курдук дьон сөбүлээн атыылаһар. Онон улуус иһигэр атыыланан бүтэр.

Дьэ, бу курдук Горнай улууһун оҥорон таһаарар кооператива күннэтэ сип-сибиэһэй үүт, эт бородууксуйатын атыыга таһаарар. “Горнай-Ас” уонна “Горныймясопродукт” кооперативтар тыа хаһаайыстыбатын оҥорон таһаарар салаата сайдар кыахтааҕын туоһулууллар диэтэхпинэ, сыыспаппын.

Дизайн Василий Прокопьев.