17 кыбаарталга оҕо саадын саҥа дьиэтин арыйдылар

Дьокуускай куорат 17 кыбаарталыгар “Малышок” диэн 200 миэстэлээх саҥа уһуйаан малааһыннаата. Оҕо саадын арыйыы үөрүүлээх түгэнигэр норуот депутата Иван Данилов кыттынна.

СИА иһитиннэрбитинэн, оҕо саада судаарыстыба уонна чааһынай тэрилтэ бииргэ үлэлэһиитин бырагырааматынан “ГазЭнергоМонтад” ХЭУо көмөтүнэн тутуллубут. Эбиийэк болдьоҕун иннинэ тутуллубут уонна 2020 сыл бастакы кыбаарталыгар оҕолорго аанын тэлэччи арыйыаҕа.

Ил Дархан Айсен Николаев оҕо саадын саҥа дьиэтигэр оҕо сайдарыгар наадалаах барыта баарын бэлиэтээтэ, компьютернай технологияттан саҕалаан бассейыныгар тиийэ.

“Маннык оҕо саадтара Дьокуускайга, өрөспүүбүлүкэҕэ баар нуорманан буолуохтаахтар. Аныгылыы оҥоһуллубут уһуйаан оҕо-аймах сайдарыгар төһүү күүһүнэн буолуоҕа”, — диэн эттэ.

Айсен Николаев 17 кыбаарталга саҥалыы олорор дьиэ тутуллуоҕун туһунан эттэ. “Былааннаммыт курдук, социальнай эбийиэктэр олорор дьиэлэр тутуллуохтарын иннинэ тутуллаллар. Төһө да уустуктар баалларын иһин, куорат салалтатын кытта 17 кыбаарталга дьиэ тутуу бырайыагын олоххо киллэриэхтээхпит. Онон оҕо саадын арыйыы — бу улахан үлэҕэ бастакы хардыы”— диэн бэлиэтээтэ.

“Малышок” оҕо саада 1927 сыллаахха тэриллибит уонна Дьокуускайга саамай бастакы дьааһыла-саадынан буолбут. “Оҕо саадын саҥа дьиэтигэр оҕо сайдарыгар бары усулуобуйа оҥоруохпут. Куорат биир саамай “кырдьаҕас” оҕо саадын 95 сыллаах үбүлүөйүн көрсө уһуйаан саҥа дьиэтэ тутуллубута олус үөрүүлээх”, — диэн сэбиэдиссэй Жанна Бурнашева эттэ.