Антонина Григорьева оскуолаҕа парламентаризм уруогун ыытта 

СӨ Судаарыстыбаннаһын күнүн иннинэ үгэс быһыытынан норуот депутаттара оскуолаларга гражданин буолуу туһунан уруоктары ыыталлар, патриот дьону иитиигэ, дойду, төрөөбүт кыраай историятын билиигэ анаммыт кылаас чаастарыгар кытталлар.

Ил Түмэн бэрэссэдээтэлин солбуйааччы Антонина Григорьева балаҕан ыйын 23 к. Өрөспүүбүлүкэ судаарыстыбаннаһын күнүн уонна Ил Түмэн 25 сылын бэлиэтээһин чэрчитинэн М.И.Кершенгольц аатынан 9№-дээх оскуола үөрэнээччилэрин кытта парламентаризм уруогун ыытта.

СӨ парламенын вице-спикерэ 6 уонна 9 кылаастар үөрэнээччилэригэр Саха сиригэр парламентаризм историятын, судаарыстыбаннай былаас үрдүкү сокуону таһаарар, бэрэстэбиитэллээх уонна хонтуруоллуур уорганын тутулун уонна үлэтин, норуот депутаттара регионнааҕы уонна федеральнай таһымҥа нэһилиэнньэ олоҕун тупсарыыга ханнык сокуоннары ылыналларын кэпсээтэ.

Чуолаан, Антонина Афанасьевна Ил Түмэн 4,5, 6 ыҥырыыларын депутатынан үлэлиир кэмигэр бэйэтин кэллиэгэлэрин кытта кэлин Россия Федерациятын сокуонунан буолбут сокуоннары көҕүлээһиҥҥэ уонна бэлэмнээһиҥҥэ  быһаччы кыттыбытыгар тохтоото. Саха сириттэн норуот итэҕэллээхтэрин көннөрүүлэрэ уонна этиилэрэ төрөөбүт тылларынан үөрэтэр уонна иитэр быраабы талыыга, национальнай өрөспүүбүлүкэлэр бэйэлэрэ телевидениенэн уонна радионан биэриилэри ыытыыга бырааптарыгар, уопсай үөрэхтээһин судаарыстыбаннай стандартыгар национальнай-регионнааҕы компонены тутан хаалыыга уо.д. а. сыһыаннаахтар.

Норуот депутата билигин Петр Гоголев бэрэссэдээтэллээх Ил Түмэн алтыс ыҥырыытын, ону сэргэ “Киһи хапытаала”, “Олорорго тупсаҕай эйгэ”, “Экономика үүнүүтэ”, “Ситиһии” уо.д.а. тутаах хайысхаларынан оҥоһуллубут национальнай бырайыактары олоххо киллэрии туһунан сиһилии кэпсээтэ.

Уруок кэмигэр үөрэнээччилэр талааннаах оҕолору өйөөһүн, үөрэххэ уонна олоххо сөптөөх суолу-ииһи буларга тупсаҕай эйгэни үөскэтии, кэнэҕэски кадрдары бэлэмнээһиҥҥэ анал бырагыраамалар уонна бырайыактар, өрөспүүбүлүкэҕэ үөрэх хаачыстыбатын боппуруостарын интэриэһиргээтилэр. Оҕолор ити боппуруостарыгар Антонина Афанасьевна сиһилии хоруйдары уонна сүбэлэри биэрдэ.

Оҕолорго барыларыгар үөрэтэр предметтэригэр интэриэстэрэ уҕараабатыгар, билиини-көрүүнү баһылыыр кыахтаналларыгар, учууталларыгар уонна төрөппүттэригэр махтанары сатыылларыгар, Россия гражданинын аатын үрдүктүк туталларыгар, төрөөбүт өрөспүүбүлүкэлэрин уонна дойдуларын дьиҥнээх патриоттара буола үүнэллэригэр баҕарарын эттэ. «Эһиги ситиһиилэргит учууталларгыт киэн туттуутунан буолуохтара, кинилэр идэлэригэр бэриниилээхтэрэ уонна маастарыстыбалара аныгы олох уустук боппуруостарын быһаарсар, олох сокуоннарын өйдүүр кыаҕы биэрэллэр, кэнэҕэски идэҕэ интэриэс кыымын күөдьүтэллэр», — диэтэ Антонина Григорьева.

Көрсүһүү түмүгэр норуот депутата оҕолорго уонна учууталларга судаарыстыбаннай бэлиэлээх значоктары уонна кинигэни бэлэхтээтэ.