ХИФУ-га туттарсар абитуриент уопсай дьиэнэн хааччыллыа

ХИФУ-га туттарсар бары абитуриеннар уопсай дьиэнэн хааччыллыахтара. Бу туһунан кыһа дьаһалтатыгар иһитиннэрдилэр.

Урукку өттүгэр чугастааҕы улуустар оҕолорун уопсай дьиэнэн хааччыйбат буоллахтарына, быйылгыттан маннык хааччахтааһын суох буолла. Итини таһынан абитуриеннар олорор төлөбүрдэрэ биир хонукка 400 солк. буоллаҕына, быйыл ити суума 300 солк. диэри түстэ. Онуоха I, II уонна III группалаах инбэлииттэр, тулаайахтар босхо олоруохтара.
Уопсай дьиэҕэ миэстэ ыларга абитуриент 086 формалаах медицинскэй ыспыраапканы, ХИФУ-га киирэргэ докумуону туттарбытын туоһулуур ыспыраапканы, төлөбүр туһунан квитанцияны уонна флюорография түмүгүн аҕалар.

СӨ үөрэххэ уонна наукаҕа министиэристибэ пресс-сулууспатын
матырыйаалларыттан