“Ойуунускай өрөгөйө”

Маргарита Винокурова, пед.н.х., СӨ үөрэҕириитин үтүөлээх үлэһитэ, Арассыыйа суруналыыстарын Союһун чилиэнэ:
— “Сэтинньи 11 күнүгэр Саха норуотун улуу уолун Платон Алексеевич Ойуунускай 125 сааһын бэлиэтиир өрөгөйдөөх тэрээһин буоларын эрдэттэн истэн, 15 саастаах сиэммин кытта тиийбитим. Тэрээһин 16.00 чаастан буолуохтааҕа. Биһиги 15.00 чааска тиийбиппит киһи тобус-толору этэ, аан аһылларын кэтэһэн-манаһан анньыллан аҕай тураллара. Дьэ, 15.30 ааннары тэлэччи арыйбыттарыгар киириэн баҕалаах дьон тоҕо анньан киирэн, миэстэ былдьаһыыта буолбута. Өр-өтөр буолбакка, модун уораҕай туола охсубута. Хата, биһиги арыый эрдэ киирэн, көрөргө бэрт табыгастаах Д секторга 3 эрээккэ 44-45 миэстэлэргэ тиксэн үөрбүппүт аҕай. Дьэ доҕоор, киһи да киһи этэ, сотору кэминэн стадион иһигэр турар да, олорор да миэстэ бүппүтэ. Оруобуна анаммыт кэмигэр уот умуллан, тэрээһин саҕаламмыта. Элбэҕи этэ барбакка, биир тылынан эттэххэ, мин олус астына уонна дуоһуйа көрдүм. Улуу убайбыт Былатыан Ойуунускай олоҕо, айымньыта, кини үлэтэ-хамнаһа, үйэлэри уҥуордуур ыра гыммыт баҕа санаалара, былааннара киһи эрэ киэн туттуох курдук чаҕылхайдык көстөн ааста. Кырдьык даа, хайдахтаах курдук бу саха норуотугар сүдү талааннаах, айылҕаттан айдарыллыбыт өйдөөх киһи төрөөн-үөскээн ааспытай диэн бу хас да тыһыынча мустубут уонна күөх экран нөҥүө быһа биэриини көрбүт дьоҥҥо олох ураты санаа киирбитэ буолуой! Бэртээхэй туруоруу. Бу маннык улахан сыананы тэрийээччилэр олус табыгастаахтык туһаммыттар, киһи көрүүтүгэр туох да сыыһа-халты, итэҕэс-быһаҕас туттуу суох. Барыта өйдөнөр уонна үрдүк таһымнаах. Мин бу «Триумф» стадион аһыллыаҕыттан син балайда араас тэрээһиннэргэ сыдьыбытым, ол гынан баран маннык дьон мустубутун уонна маннык үрдүк таһымнаах, биир тыынынан көрөр туруорууну өссө көрө иликпин. Бу тэрээһини бэлэмнээбит айар бөлөхтөр олус бэриниилээхтик, дууһаларын ууран туран үлэлээбиттэрэ өтө көстөр.

Ирина Ханды, Алексей МАТВЕЕВ
бэлэмнээтилэр.
Василий КОНОНОВ хаартыскаҕа түһэриилэрэ.