“Кэшбери” партнердара 3 миллиардтан тахса солкуобайы сүтэриэхтэрин сөп

Хампаанньа тыыннаах буолуу иһин охсуһуута

Россия Киин баанын сэрэтиитинэн Ростовскай уобалас Миллеровскай суутугар Ростовскай уобалас прокуратурата “Кэшбери” микрофинансовай тэрилтэ  сайтарын үөрэтэргэ административнай ирдэбил түһэрбит. Киин баан “Кэшбери” үп тэрилтэтин Россия үрдүнэн бу бириэмэҕэ саамай баараҕай финансовай пирамиданы “тутууга”  буруйдаата. Маны таһынан Киин баан балаҕан ыйын 28 күнүгэр «Кэшбери» туһунан хомуйбут матырыйаалларын  генеральнай прокуратураҕа уонна ИДьМ ыыппыта. Генеральнай прокуратура сорудаҕынан Ростовскай уобалас Миллеровскай суута хампаанньа үп пирамидата буоларын туһунан чинчийиилэри ырытан көрдө, ол түмүгэр “Кэшбери”  хампаанньа Россия үрдүнэн регистрацияламмыт «кэшбери.рф» уонна «www.cashbery.com» сайтарын сабарга ирдэбил ыытта. Маны таһынан көрүллэр дьыала быһыытынан, хампаанньа тэрийээччилэрин  кытта Интернет социальнай ситимнэрин  нөҥүө хампаанньаҕа көхтөөхтүк ыҥырыынан уонна регистрациянан дьарыктанааччылар дьыалаҕа хабыллыахтарын сөп. Хампаанньа финансовай өҥөлөрү оҥорууга Россия бааннарыгар лицензията суох.

Билиҥҥи туругунан бу платформа сайтара уонна 130 тыһ. тахса киһилээх «ВКонтакте»  социальнай ситимҥэ платформа бөлөҕө тохтоло суох үлэлии тураллар. Суруналыыстар бэлиэтииллэринэн, “Кэшбери” платформаны төрүттээччилэр Интернет ситимигэр, дьон-сэргэ ортотугар биллибэттэр-көстүбэттэр.  Оттон дьон иннигэр көстөр-биллэр, дьону ыҥырар, үрдүк бырыһыаннаах уурунууну арыйарга угуйар Артур Варданян “Кэшбери” хампаанньаҕа туох да сыһыана суоҕа билиннэ. Хампаанньа регистрацияламмыт докумуонугар генеральнай директорынан урбаанньыт Алексеев Роман Алексеевич буолар. Хомойуох иһин, Алексеев Р.А. бу хампаанньаҕа эмиэ туох да сыһыана суох буолуон сөп, кини аатынан арыллыбыт атын хампаанньалар билигин тэрилтэни сабыы хаамыытыгар сылдьаллара көстөр.

Харчыны чэпчэкитик, кыһалҕата суох, “драйвка” сылдьан оҥоробут. Биһиги платформаҕа уурунуу счетун арыйдыбыт, харчыбыт тохтоло суох үлэлиир — диэн финансовай ситиһии боростуой ырысыабын «Кэшбери» хампаанньа роликтарыгар быыстала суох иһитиннэрэллэр

Экономика таһымыгар ылан көр­дөххө, Россия олохтоохторо (уопсайынан, биирдиилээн дьон) чэпчэки харчыны түргэнник “баһан” ыларга дьулуһуута    хаһан да уостуо, умуллуо суох. Ааспыт нэдиэлэҕэ Россиятааҕы Киин баан исписэлиистэрэ Россия үрдүнэн саамай  улахан финансовай пирамида баар буолбутун туһунан иһитиннэрбиттэрэ. “Кэшбери” хампаанньаҕа Киин баан дааннайынан,  10 тыһ. тахса киһи регистрациялааҕа уонна  1 млрд тахса солкуобай уу харчынан уонна криптовалютанан уурунуулаахтара ыйыллар.

Ылан көрдөххө, билигин боростуой киһи Интернет ситимин араас сайтарыгар хампаанньа туругун кыайан сыаналыыр кыаҕа суох, холобур, хампаанньа салгыы сайдарыгар төлөбүр киирэригэр интэриэстээх дьон кистэлэҥ сирэйдэнэн, бэйэлэрэ үрдүк сыанабылы суруйуохтарын сөп. Үлүннэрэн “кичэйэн” суруйуулара ардыгар саамай биллэр-көстөр фитнес кулууптары сырдатыы үлэлэригэр  тэҥнэһэр. Манна тутатына боппуруос үөскүүр: тоҕо Россия үрдүнэн саамай баараҕай хампаанньа тэрийээччитэ платформа партнердарыгар бэйэтинэн сирэй көстөн, бу хампаанньа тула үөскээбит айдааны быһааран биэрбэтий? Хата, ону билиммэккэ платформа сайтара быыстала суох араас көрүҥнээх өҥөлөрү: кылгас бириэмэҕэ үрдүк бырыһыаҥҥа харчы уларсык биэрэр, саҥа «криптовалюта 2.0» CashberyCoin оҥорор былааннаахтар. “Саҥа олоххо чэпчэкитик үктэнэрдии, биһиги аан дойду үрдүнэн бастыҥтан-бастыҥ специалистары мунньан ураты анал криптовалюта манньыатын оҥоробут”, — диэн сайтка хаһыытыыр суруктар көстөллөр. Ол курдук биткойны уонна  эфиры кытта тэҥнээтэххэ, Cashbery блокчейн нөҥүө харчы үлүннэриитэ хас да төгүл үрдүө диэн былаанныыллар. Инникитин бу ньыманан бырааттыы Дуровтар Gram криптовалюта манньыатын оҥорон экономикаҕа тосту уларытыыны киллэрэр былааннара билигин даҕаны туола илик. Билигин “Кэшбери” платформа  партнер­дарын сайтка регистрацияламмыт счеттарыгар күн ахсын уурунуу бырыһыаннарын, ону таһынан араас үрдүк бириэмийэлэри түһэрэ турар, ол эрэн уурунуулаахтар уу харчынан уста иликтэрэ иһиллэр. Уурунуу арыйарга киһи бэлиэтиирэ уонна сэрэнэ саныыра: уурунуу харчытын хампаанньа расчетнай счетугар  буолбакка, үһүс сирэй картатыгар ыыттараллар, биитэр счету QIWI электроннай төлүүр система нөҥүө уктараллар. Мантан сиэттэрэн, уурунуу харчытын ыыппыт саҥа партнер “Кэшбери”  хампаанньаҕа туох да сыһыана суох буолар. Атыннык эттэххэ, сөбүлэһии түһэрсиигэ салгыы уурунуу дьылҕатыгар «Кэшбери» хампаанньа тугунан да сирэйдэммэт уонна эппиэтинэһи сүкпэт.

Россиятааҕы Киин баан сэрэтэр: харчыны араас финансовай бырайыактар бөлөхтөрүгэр угар сэрэхтээх, уурунууну барытын сүтэрэр куттал үрдүк

Биһиэхэ “Кэшбери” хампаанньа  бэриниилээх партнера, биллэр биричиинэлэринэн аатын, араспаанньатын биллэрбэккэ эрэ санаатын үллэстэр. Ааҕааччыга чэпчэки буоллун диэн, ыстатыйа геройун “Х” диэн бэлиэтиэм.

“Х” кэпсииринэн, кини “Кэшбери”  хампаанньа  хас да сыллаах ыстаастаах партнера. Эрдэ регистрацияламмыт буолан уурунуу харчыта алта бүк улаатан, 4 таһымнаах менеджерга тиийэ үүммүт. Регистрацияламмыт күнүттэн араас тэрээһиннэргэ, хампаанньа көрсүһүүлэригэр, ыҥырыылаах бырааһынньыктарга тохтоло суох  сылдьыбыт.  Уопсайынан, дохуота улам улаатан иһэр.  “Х” уурунуу харчыта счетугар мунньуллан улаатан истэҕин ахсын “уу харчынан илиибэр ыламмын туох да кыһалҕата суох олоруом” диир.  Кини уурунуулаах үлүннэрбит харчытын хос бүк үлүннэрэргэ укпутуттан үөрэрин кистээбэт. Дьиҥэр, дохуота элбэх, ол гынан баран уурунуу харчыта “виртуальнай” (Интернет счетугар сытар). Ону истэн баран, “Кэшбери” хампаанньа оччоҕо “лохотрон” буолар диэн этиэхпин баҕарбытым да, “Х” салгыы: “Хампаанньа үлэлээбитэ, үлэлиир, үлэлиэҕэ”, — диэн санаатын түһэрбэт. “Мин хат 50 тыһ. солк. эбии үлүннэрэ уктум, эн эмиэ түргэнник хампаанньаҕа регистрацияланан, харчыгын аҕалан ук”, — диэн рекламатын ыыта оҕуста.

Киһи туораттан көрдөҕүнэ, “Х” чугас дьонун, табаарыстарын, аймахтарын хампаанньаҕа киллэрбитинэн киэн туттара, мин санаабар, кутталлаах. Мөлүйүөнүнэн харчылаах счету арыйбатахтарын да иһин, пирамида сабыллар түгэнигэр, хас биирдии ыҥырыллыбыт киһи харчытын төттөрү “Х”-тан көрдүүрэ чахчы. Пирамида эмискэ суох буолуо, ол кэннэ ким да “баһыыба” диэ суоҕа.

Түмүккэ “Х” кэпсээнинэн сыаналаатахха, платформа партнердара уурунуу харчыларын ылбаттарын таһынан, сүтэрэр кутталлаахтар. Хампаанньа тэрийээччилэрэ харчыны оффшордарга баар счеттарыгар түһэрэн, билигин соҕуруу тас дойдуларга сынньана барбыттара буолуо диэн сабаҕалыыбын.

Санатан эттэххэ

Бу сылга аатыра сылдьыбыт “Максирайз”, устудьуоннарга биллэр “Currency Global”, “Limited Corporation” инвестиционнай платформалар, ону кытары Whatsapp нөҥүө тарҕаммыт харчы үлүннэриитин араас ньымалара сорох биир сылынан, сорох икки ыйынан суох буолбуттара. Хоромньуну ылан көрөр буоллахха, Саха сирин олохтоохторо төһө харчыны сүтэрбиттэрин бэйэлэрэ эрэ билэллэр.

* * *

Хас биирдии пирамида тэрийээччилэрэ боростуой “алгоритм” быһыытынан, нэһилиэнньэ араас араҥатыттан харчы хомуйан баран, дьон-сэргэ кэккэтиттэн соһуччу сүтэллэр, харчы бүтүөр диэри кыһалҕата суох тас дойдуларга сынньана тахсаллар. Икки биитэр үс сыл устатыгар бу “хайп” умнуллубутун кэннэ, харчы бүтэрин саҕана, тэрийээччилэр атын саҥа пирамида арыйан, атын схемалаах “лохотрон” үп пирамидатыгар ыҥырыыларын ыыталлар.

Үс нэдиэлэ ааста, хампаанньа сайтара үлэлии тураллар, партнердар саҥа дьону ыҥыра, угуйа тураллар. Биллэн турар, эмсэҕэлээбиттэртэн полицияҕа үҥсүү суох, уурунуу уһун болдьохтоох, онон бу саҕаламмыт дьыала тиһэҕэр ханна тиийэрэ иннэ-кэннэ биллибэт. Ааҕааччы, харчы уурунар, былаанныыр түгэҥҥэр сүүс төгүл толкуйдаан, араас ньымалары үөрэтэн көрөн баран хардыылыыргар сүбэлиибин. Билиҥҥи үйэҕэ хас биирдии киһи финансовай эйгэҕэ бэлэмнээх, билиилээх буолара ирдэнэр.