Ааспыт оттук кэмин түмүктэрэ уонна былааннар

СӨ ДьУоКХ уонна энергетика миниистирин э.т. Гаврил Левин сүрүн дакылааты оҥордо. 2012-2013 сс. көрдөрүүлэрин кытта тэҥнээтэххэ, технологическай кэһиилэр ахсааннара уопсайынан 40% намтаабыта бэлиэтэнэр.

Тиэйиллибит уматык кээмэйэ 2014-2015 сс. сезоҥҥа наадыйыыны сүнньүнэн хааччыйар, оттон сылдьарга эрэйдээх нэһилиэнньэлээх пууннарга предприятиелар уматыкка наадыйыылара кэлэр кыһыҥҥы суол аһыллыар диэри хааччыллыбыт.

Оттук кэмигэр бэлэмнэниини сыаналааһын саҥа быраабылаларыгар сөп түбэһиннэрэн, СӨ Ростехнадзор Ленскэй управлениета бэрэбиэркэни ыытар. Ааспыт 2014-2015 сс. оттук кэмигэр бэлэмнээх буолуу паспорын 4 эрэ оройуон ылбыта: Томпо оройуона, Дьокуускай куорат уокуруга, Хаҥалас, Усуйаана оройуоннара.

Гаврил Левин 2015-2016 сс. оттук кэмигэр бэлэмнэнии былааннарын туһунан кэпсээтэ. ДьУоКХ уонна ТЭК объектара кэлэр оттук сезонугар бэлэмнэниилэрин суһаллык салайыыга анаан бырабыыталыстыба бэрэссэдээтэлин солбуйааччы Игорь Никифоров салалтатынан бырабыыталыстыба хамыыһыйата тэрилиннэ. Кэлэр оттук кэмигэр бэлэмнэнии тэрээһиннэрин ыытыыга анаан араас источниктартан 22 859,11 мөл. солк. ыытыллара сабаҕаланар.

2015 сылга уматык-энергетическэй ресурсалары тиэйии кээмэйдэрэ СӨ Бырабыыталыстыбатын 2015 с. муус устар 30 к. дьаһалынан бигэргэммиттэрэ уонна 575 404,9 туоннаҕа тэҥнэһэллэр.

Норуот депутаттара олоххо тыын суолталаах сылааһынан уонна энергиянан хааччыйыы проблематын дьүүллэһиигэ актыыбынайдык кытыннылар. Кинилэр бэйэлэрин быыбардаммыт учаастактарынан элбэх ыйытыыны биэрдилэр.

Бырабыыталыстыба чааһын үлэтин Ил Түмэн бэрэссэдээтэлин бастакы солбуйааччы Анатолий Добрянцев маннык түмүктээтэ: «Дьиэ-уот-коммунальнай сектор үлэтигэр сүнньүнэн элбэх үтүө чахчылар бааллар. Бырабыыталыстыба үбү анааһыҥҥа да, үлэни тэрийиигэ да улахан болҕомтотун уурар. ДьУоКХ үлэтин сүрүн ирдэбилинэн сылаас режимэ буолар: оҕо садтарыгар, балыыһаларга уонна оскуолаларга кыһыҥҥы кэмҥэ температура 10-12 кыраадыска тэҥ буоллаҕына, ханнык табыгастаах олох туһунан этиэххэ сөбүй? 1-3 сыллааҕыта тутуллубут объектарга ыйытыы элбэх.

Саха сирин нэһилиэнньэтэ сылаас дьиэҕэ-уокка олорорун, бары социальнай объектар тиһигин быспакка үлэлииллэрин туһугар ДьУоКХ уонна энергетика министиэристибэтин уонна бары салаа министиэристибэлэр социальнай объектарынан кэлимсэ, биирдиилээн туочукаларынан, муниципалитеттар, салайар хампаанньалар туспа объектарынан үлэлииллэрэ ирдэнэр».