Александр Жирков бэтэрээннэргэ махтанна

Бастакынан спикер Алек­сандр Жирков бэтэрээн Нико­лай Петрович Олесовка сырытта.
Николай Олесов 1945 сылтан 1951 сылга диэри зенитнэй артил­лерия полкатыгар пулемет отделениетын хаман­дыырынан сулуус­палаабыт. Кэлин ИДьМ холуобунай ирдэбилгэ начальнигын солбуйааччытыгар тиийэ үүммүт, милиция пол­ковнигынан астаапкаҕа тахсыбыт. “Японияны кыайыы иһин”, “Аҕа дойду Улуу сэриитигэр килбиэннээх үлэтин иһин” мэтээллэрдээх, Аҕа дойду сэриитин II истиэпэннээх уордьанын кавалера.
Николай Петрович кэргэнэ Степанида Миронов­наны кытары 64 сыл бииргэ олорбуттар, 7 оҕону атахтарыгар туруорбуттар, аны сиэннэр, хос сиэннэр ки­ни­лэри үөрдэллэр. Николай Петрович Александр Николаевичка бэйэтин фроннааҕы суолларын, сэбиэскэй милииссийэ кэккэтигэр сулууспалаабыт сылларын туһунан кэпсээтэ. Кини аймахтара уһун үйэлээхтэр эбит. “14 сааспыттан монтерунан үлэлээбитим. Кол­легабын кытары ыраах Түүлээх нэһилиэгэр сибээс линиятын тарда сылдьан, аара суолга эһэни көрсүбүппүтүн, этэҥҥэ ааспытын бэҕэһээҥҥи курдук өйдүүбүн. Билигин сааһым 93-һүм, итиэннэ саамай баҕам – өссө хас да сыл күн сиригэр олоруу”, — диэтэ Николай Олесов.
Кини Александр Жирковтуун өрөспүүбүлүкэ, төрөөбүт улууһун уонна нэһилиэгин олоҕун-дьаһаҕын туһунан сэһэргэстэ. Бэтэрээн кыыһа Уус-Алдан улууһугар “уһук илиҥҥи” 6 гектар сири ылбыттарын кэпсээтэ.

Ил Түмэн спикерэ ыалдьы­тымсах хаһаайыттарга чэгиэн, этэҥҥэ буолалларыгар баҕа са­наатын тиэртэ.
Александр Жирков салгыы Суотту нэһилиэгиттэн сэриигэ кыттыбыт Роман Романович Охлопковка ыалдьыттаата.
Роман Романович 1943 сылга ыҥырыллан, Монголияҕа 846-с штурмовой авиаполкаҕа араадьыйа тэриллэригэр маастарынан сулууспалаабыт, Японияны утары бойобуой дьайыыларга кыттыбыт. Аҕа дойду сэриитин II истиэпэннээх уордьанынан, «Японияны кыайыы иһин», «Шанхай оборонатын иһин», «1941-1945 сс. Аҕа дойду Улуу сэриитигэр килбиэннээх үлэтин иһин» мэтээллэринэн наҕараадаламмыт. 1950 сылга старшай лейтенант буолан эргиллэн, Роман Охлопков өрөспүүбүлүкэ сибээһин сайдыы­тыгар олоҕун анаабыт.

Бүгүн бэтэрээн 92 саастаах, ол эрээри уокурук, куорат олоҕор билигин да көхтөөхтүк кыттар, социальнай ситимнэртэн аан дойдуга туох буола турарын билэ-көрө олорор.
Александр Жирков киниэхэ уһун сылларга доруобуйаны, са­наата бөҕөх, сарсыҥҥыга эрэллээх буоларыгар баҕарда итиэннэ Роман Романовиһы быйыл күһүн Суотту нэһилиэгэр Хоноҕор оскуолатын 125 сылыгар, Кыһыл Кырдалга оройуонтан дьону сэриигэ атаарар пуун тэриллибитэ 75 сылыгар анаммыт үбүлүөй тэрээһиннэригэр кыттарыгар ыҥырда.
Ил Түмэн бэрэссэдээтэлэ Николай Петрович Олесовка уонна Роман Романович Охлопковка Улуу Кыайыыга, сэрии кэнниттэн чөлүгэр түһэриигэ, бүгүҥҥү эйэ­лээх халлаан анныгар аныгы көлүөнэ олоҕун, кэскил туһугар тус кылааттарын иһин махтанарын биллэрдэ.
Спикер Аҕа дойду Улуу сэриитин бэтэрээннэригэр СӨ Ил Түмэнин Бэрэссэ­дээтэлин Махтал суругун туттарда.
Бэтэрээннэр хардатын Алек­сандр Жирковка болҕомтотун иһин махтаннылар уонна өрөс­пүүбүлүкэ уйгутун туһугар айым­ньылаах, таһаарыылаах үлэни баҕардылар.